LA CARTA DEL APOSTOL SAN PABLO A
FILEMÓN
1
Noka, Pablo, carcelpi wiskꞌaska cani Jesucristomanta willaraskayraycu. Hermanonchej Timoteo nokawan cashan. Nokaycu cusca napaycamushaycu kanta, munaska hermano llancꞌaj-masiycupis. 2 Hermananchej Apiata, Cristopi soldado-masiycu Arquipota, wasiyquipi tantacoj hermanosninchejtapisa napaycamushaycu. 3 Dios Tatanchejpa, Señorninchej Jesucristoj cꞌacha yanapaynin kancunawan cachun. Paytaj qhuyacuyninpi kancunawan cacuchun.Pablo graciasta kon
4 Diosmanta mañacuspa payman graciasta konipuni kanmanta, 5 imaraycuchus uyarini Señor Jesuspi japꞌicuskayquimanta tucuy runasninta munacuskayquimantawan. 6 Mañacushanitaj Cristowan ujchaska caspa japꞌinayquita sumaj cajta paypi wiñanayquipaj. Yachanquitaj Jesucristo tucuy sumaj cajta paypi japꞌicojcunaman kon. 7 Hermano, Diosman tꞌakaska cajcunata sonkoncupi sonkochaskayquita samachiskayquitawan uyarerkani. Chayraycu nokapis munacuyniyquimanta mayta cusicorkani sonkochacorkanitaj.
Camachin Onesimopaj mañapun qhuyacuyniyoj cananta
8 Cristoj cachan caskayraycu atiyman mana manchachicuspa camachisuyta chekanta ruwanayquita. 9 Munacususkayraycurí ajllani mayta niricusuyta. Noka, Pablo, ashqha watasniyojña cani. Cunantaj Jesucristomanta willaraskayraycu carcelpi wiskꞌaska, 10 mayta nishayqui waway Onesimoraycu. Caypi wiskꞌaska cashaspa payta pusamorkani Cristoman. Paypitaj japꞌicorka. Ajinamanta Onesimopajka tatanjina cani.
11 Ñaupajpi mana allintachu llancꞌarka. Cunanrí kanpajpis nokapajpis allinpuni cashan. 12 Payta kanman cachampushayqui. May munacuywan payta japꞌicapuy nokatajina. 13 Willaraskayraycu wiskꞌaska caspa munasharkani payka nokawan cacunanta sutiyquipi yanapanawanpaj. 14 Manataj munarkanichu ni imata ruwayta manaraj yachaspa yuyaskayquimanta. Manachayrí allin cajta ruwanayquita munani kanpa munayniyquimanjina amataj camachiskayraycullaka. 15 Ichapis Onesimoka kanmanta pisi pꞌunchaycunata tꞌakaska carka wiñaypaj kanpata cananpaj. 16 Manañataj camachillachu canka, manachayrí camachimanta aswanmin, uj munaska hermano. Payka nokapaj munaska hermano cashan. Kanpajtaj astawanraj cashan, camachiyqui caskanraycu Jesucristopi hermanoyquitaj.
17 Chayraycu sichus yuyanqui nokawan kanwan ujlla caskanchejta chayka, japꞌicapuy payta nokapis canmanjinata. 18 Sichus imapipis contrayquita ruwarka chayrí sichus imamantapis manu cashasunqui chayka, chayta churay noka manuyqui caskaytajina. 19 Cayta kelkamushayqui quiquin maquiywan. Chekatapuni cutichipuskayqui. Atiymanpis yuyarichisuyta kan nokaman manu caskayquita Cristopi nokanejta japꞌicuskayquiraycu. 20 Cunan, hermano, Onesimota japꞌicapuspa allinta ruwapuway Señorninchejraycu. Sonkoytataj cusiywan samachipuway Cristopi nokawan ujchaska caspa.
21 Casojpuni caskayquiraycu cayta kelkamuyqui. Yachanitaj nisuskaymanta astawanraj ruwanayquitapuni chay jawapis. 22 Chay tucuywanpis waquichipuway uj wasita chayacunaypaj. Suyani kancunata watucuyta Diosmanta mañacuspa yanapawaskayquiraycu.
Napaycucuna
23 Jesucristoraycu wiskꞌaska-masiy, hermano Epafras, napaycamusunquichej. 24 Llancꞌaj-masisniy Marcos, Aristarco, Demas, Lucaswan napaycamullasunquichejtaj.
25 Señorninchej Jesucristoj cꞌacha yanapaynin kancunawan cachun. Ajina cachun.