LA CARTA DEL APOSTOL SAN PABLO A
TITO
1
Noka, Pablo, Diospa camachin cani, Jesucristoj cachan. Cachan cani Diospa ajllacuskasnin paypi japꞌicunancupaj, chekan cajta Cristomanjina causaymanta rejsinancupajpis. 2 Ajinapi paycuna wiñay causayta suyankancu. Chayta ni jaycꞌaj llullacoj Dioska konanta nerka, cay pachata manaraj ruwashaspa. 3 Cunanrí ajllaskan pꞌunchaypi ricuchiwarkanchej wiñay causaymanta willanasta paypa niskanpi. Chay sumaj willanasta Cacharichejninchej Dioska nokaman confiawarka camachiwaskanmanjina. 4 Kelkamushayqui, Tito, Diospi japꞌicuyninchejmanjina wawáy. Tatanchej Diospa, Cacharichejninchej Cristo Jesuspatapis cꞌacha yanapaynin kanwan cachun allillanta causanayquipaj.Titoj ruwanasnin Creta jallpꞌapi
5 Cretamanta ripushaspa puchoj ruwanasninchejta tucunayquipaj, sapa llajtapi iglesiapaj pastorcunataa churanayquipajwan sakerkayqui. Nokaj nisuskaymanjina paycunata churay. 6 Pastorpajka churay mana juchachana cajllata, uj warmiyojlla cajta, Diospi japꞌicoj wawasniyoj cajllata. Astawanpis wawasnenka ama runata rimachejka cachuncuchu, ni manacaj puriymanta nitaj mana casucoj caymantapis. 7 Pastorka mana juchachanamin canan tiyan Diospa runasninta khawapunanpaj churaska caskanraycu. Canan tiyan llampꞌu sonkoyoj, mana phiñacoj, manataj machaskajinaka phiñacoj, nitaj runaswan makanacoj, nitaj kolketa munapayajpis. 8 Astawanrí canan watucojcunata forasterocunatapis wasinman wajyaj, allin cajta munacoj. Cꞌacha yuyayniyoj, chekan cajta ruwaj, llimphu sonkoyoj, munaynintapis allinta camachej canan tiyan. 9 Cheka willanasta sinchꞌita japꞌicoj canan tiyan. Ajinapi yachachiska caskanmanta allin yachachinaswan hermanosta callpachayta atenka. Churanacojcunamanpis pantaskancuta reparachiyta atenka.
Llulla yachachejcuna Cretapi
10 Chayta niyquichej ashqha mana casucojcuna, engañacojcunapis caskancuraycu. Israelcunamanta ajina runaska astawan tiyan. 11 Paycunaka chꞌinyachiska canancu tiyan. Wasisnintintaña cheka ñanmanta pantachishancu. Mana yachachinancuta yachachishancu kolketa munapayayrayculla. 12 Uj llajta-masincu sutꞌinchajnincupaj khawaska carka. Payka nerka: “Creta runaska llullaspuni, phiña alkojina, khella wijsasapaspuni cancu”, nispa. 13 Chekatapuni ajina cancu. Chayraycu paycunaman juchasnincuta sinchꞌita reparachiy cheka willanasta allinta japꞌicunancupaj. 14 Ajinata ruway israelcunaj llulla cuentosnincuta runacunaj camachiskasnincutapis khesachanancupaj. Chayjina yachachejcunaka cheka cajta khesachajcuna cancu. 15 Llimphu sonkoyoj runaspajka tucuy ima llimphullatajmin. Millay sonkoyojpaj mana Diospi japꞌicojpajka ni ima llimphu canchu. Astawanrí paycunaj yuyaskancupis sonkoyuyaynincupis millaymin. 16 Diosta rejsiskancuta nincu. Ruwaskasnincutaj ricuchin mana ajina caskanta. Millay, mana casucojcuna cancu. Ima sumaj ruwanapajpis manacaj cancu.