Cheka willanasmanjina parlay
2
Kanrí cheka willanasmanjina parlay. 2 Curaj runaska munaynincuta allinta camachejcuna, respetachicojcuna, cꞌacha yuyayniyojcuna cachuncu. Cheka willanasta allinta japꞌicojcuna, munacuypi sayajcuna, muchuypipis Diospi confiacojcuna cachuncu. 3 Quiquillantataj curaj warmispis Diospa runasninjinalla purichuncu. Ama cachuncuchu chꞌatajcuna nitaj machayman koskapis. Manachayrí cꞌacha imasta yachachejcuna cachuncu. 4 Ajinamanta sipas warmista yuyaychankancu kosancuta munacoj cayta, wawasnincuta munacoj caytapis. 5 Yuyaychankancutaj cꞌacha yuyayniyoj cayta, llimphu sonkoyoj cayta, wasipi cajcunapaj ruwanasnincuta juntꞌaj cayta, cꞌacha ruwayniyoj cayta, kosancuta casoj caytapis. Ajinata causachuncu Diospa niskanmanta runas ama sajrata parlanancupaj.6 Waynacunatapis quiquillantataj yuyaychay cꞌacha yuyayniyoj canancuta. 7 Astawanka tucuypaj ricuchinajina cay Cristomanjina causayniyquipi. Ajinallataj yachachiskayquipipis llimphu sonkoyoj, respetachicoj ima cay. 8 Parlaskayqui sano mana juchachana cachun. Ajinapi pillapis contrallicojka pꞌenkaconka nitaj nokanchejmanta ni ima manacajtapis niyta atenkachu. 9 Ajinallataj camachispis patronnincuta tucuy imapi casuchuncu. Cusichichuncu amataj japꞌinacojcunaka cachuncuchu. 10 Ama imatapis patronnincumanta suwachuncuchu. Manachayrí tucuy imata juntꞌaspa cꞌacha causayniyoj cachuncu. Ajinapi tucuy imapi Cacharichejninchej Diospa yachachinan cꞌachapaj sumajpajtaj khawaska canka.
Cusiywan suyashanachej Jesucristoj cutimunanta
11 Diospa cꞌacha yanapaynenka ricuchiskañamin. Chaymin imaymana runata juchamanta cacharichin. 12 Chay cꞌacha yanapaynin yachachiwanchej khesachananchejta sajra yuyayta, cay pacha yankha munaycunamanjina causayta ima. Ajinapimin chayta khesachaspa cunan cay pachapi causanchej, cꞌacha yuyayniyoj, chekanta ruwaspa, Diosta cusichispataj. 13 Cusiywan suyashananchejpuni Jesucristo jatun atiyninwan cutimunanta. Payka jatun Diosninchej Cacharichejninchej. 14 Payka pay quiquinta nokanchejraycu jaywaycucorka tucuy juchasninchejmanta cacharichinawanchejpaj. Ajinapi llimphuchawarkanchej paypa ajllacuskasnin cananchejpaj tucuy sonkowan cꞌacha cajta ruwananchejpaj. 15 Tucuy sumaj atiywan chay imasta yachachiy, yuyaychaytaj, juchasnincutapis reparachiy. Parlaskayquita ni pi pisipaj khawachunchu.