3 Paypi japꞌicuspa yachanchej niskanta parlaskallanwan tucuy pachacunata ruwaskanta. Manaraj ima cashajtinpis niskallanwan riqhurichiskantapis yachanchej.

4 Diospi japꞌicuskanraycu Abelka aswan sumaj jaywanata Diosman korka Cainmanta niskaka. Ajinapi chay jaywaskanwan Diosta cusicherka. Chayraycu Dioska palabranpi willarka payta chekan runapaj khawaskanta. Chaymanjinataj Abelka wañupuspañapis yanapanawanchejpaj parlashanraj.

5 Diospi japꞌicuskanraycu Enocka mana wañupuspa janaj pachaman okhariska carka. Runastaj payta mascꞌaspa mana tarerkancuchu Dios payta pusacapuskanraycu. Diostaj willawanchej cay pacha causashaspa Enoc payta cusichiskanta. 6 Ajinaka uj runa mana Diospi japꞌicuspaka ni jaycꞌaj atinchu Diosta cusichiyta. Payman jamojka creenan tiyan Dioska chekapuni cashaskanta. Payta rejsiyta munajcunaka Dios yanapanantapis tucuy sonkowan creenan tiyan.

7 Diospi japꞌicuskanraycu Noeka Diospa sutꞌinchaskanta creerka. Manaraj ricuska imasmanta sutꞌinchaskanmanjinataj barco arcata waquicherka ayllunpaj. Chay arcaman yaycuspa Noella ayllunwan yacupi wañuymanta libraska carka. Ajinapi Noeka ricucherka cay pacha runas juchachaska caskancuta. Paytataj Dioska chekanpaj khawarka paypi japꞌicuskanraycu.

8 Diospi japꞌicuskanraycu Abrahamka Diospa wajyaskanta casorka. Payka llajtanmanta llojserka mana rejsiska jallpꞌaman. Sumaj niskanwan Dios payta nerka: “Cay jallpꞌata koskayqui”, nispa. Abrahamri Diospa wajyaskanta casorka maymanchus rishaskanta mana yachaspapis. 9 Diospi japꞌicuskanraycu Abrahamka Diospa sumaj niskanmanjina koska jallpꞌapi mana llajtayojjina toldospi tiyacorka. Paywan cuscataj Isaacpis Jacobpis ajinata tiyacorkancu. Paycunamanpis chay jallpꞌaka koska caskanta, Dios nerka. 10 Ajinata tiyacuspari Abrahamka ricucherka wiñaypaj ruwaska llajtata suyashaskanta. Chay llajtatataj Dios ruwarka yuyaskanmanjina.

11 Diospi japꞌicuskanraycutaj warmin Sarawan wawayoj canancupajjina Dios payta ruwarka. Payka ashqha watasniyojña cashaspapis creerka Dios sumaj niskanta juntꞌananta. Chayraycu wawata rejserka. 12 Ajinaka Abrahamllamanta ashqha miraynenka jamorka, payka wañuskajinaña casharkapis. Cunantaj paypa miraynenka mana yupay atina cancu, janaj pachapi chꞌascacunajina kocha cantopi tꞌiyujinapis.

13 Diospi japꞌicuspataj tucuy chay runaska causarkancu. Paycunaka manaraj Dios sumaj niskanta juntꞌashajtin wañuporkancu. Astawanpis manaraj ricushaspa creerkancu, chay sumaj niskanraycutaj cusicorkancu. Ajinapi paycunaka cay pachapi mana llajtayojpis puricojcunallapis caskancuta willacorkancu. 14 Chayta willacojcunaka ricuchincu uj llajtallancuta mascꞌaspa rishaskancuta. 15 Chekapuni sichus llojsimuskancu llajtamanta yuyaricushancuman carka chayka, cutipuyta atincuman carka. 16 Astawanpis tucuy sonkowan munasharkancu astawan sumaj llajtata. Chay llajtari janaj pacha llajtamin. Ajinamanta Dioska mana pꞌenkacunchu Diosnincu, niska cayta, llajtata paycunapaj waquichipuskanraycu.

17 Abrahampa wawan Isaacka Diospa sumaj niskanmanjina nacecorka. Chay cꞌata wawan jatitunña cashajtintaj uj jaywanatajina konanta Dios mañarka. Ajinatataj mañarka Abrahampa japꞌicuynin chekachus cashaskanta yachananpaj. 18 Isaacnejta mirayniyoj cananta yachashaspapis Abrahamka Diospi japꞌicuspa casorka. Cꞌata wawan Isaactataj uj jaywanatajina wañuchinayasharka. 19 Abrahamrí yuyarka Dios atiyniyoj caskanta wawanta wañuymantapis causarichimunanpaj. Ajinaka atinchej niyta Abrahamka wañuskamanta Isaacta ujtawan causashajta japꞌicapuskanta.

20 Diospi japꞌicuskanraycu Isaacka jamoj imasmanta sutꞌincharka Jacobman Esaumanwan. Paycunaman Dios sumaj niskasninta juntꞌananta willarka. 21 Diospi japꞌicuskanraycu Jacobka wañuy patapiña cashaspa, jamoj imasmanta Josej iscay wawasninman sutꞌincharka. Dios sumaj niskanta paycunaman juntꞌananta willarka. Chaymantataj bastonninpi cꞌumuycucuspa Diosta yupaycharka. 22 Diospi japꞌicuskanraycu Joseka wañupushaspa sutꞌincharka israelcuna Egipto jallpꞌamanta llojsipunancuta. Nerkataj tullusninta Canaán jallpꞌaman apanancuta.

23 Diospi japꞌicuskancuraycu Moisespa tatanwan mamanwanka nacecojtincama payta pacarkancu quinsa quillata. Ajinata ruwarkancu ancha cꞌacha wawita caskanta ricuskancuraycu, manataj manchachicorkancuchu camachej Faraonpa camachiskanta. 24 Diospi japꞌicuskanraycu Moiseska runaña caspa, khesacharka Faraonpa ususinpa wawan sutichaska cananta. 25 Astawanpis payka Diospa runasninwan cusca muchuyta ajllarka. Manataj munarkachu juchaj yankha cusiyninpi pisi ratupaj causaytaka. 26 Imaynatachus Cristota runas pꞌenkaypaj khawancu, ajinallataj khawaska cayka aswan khapaj caskanta yuyarka. Yuyarka aswan khapaj caskanta Egiptopi khapaj imasmanta niskaka. Payka tucuy sonkowanpunitaj creerka Dioska sumaj niskanta payman juntꞌanantapuni. 27 Diospi japꞌicuskanraycu Egiptota sakerka camachejpa phiñacuyninta mana manchachicuspa. Yuyaskanmanjinapunitaj purerka, mana ricuy atina Diosta ricushanmanpisjina.

28 Diospi japꞌicuskanraycu pascua corderota wañucherka. Chay jaywana uywaj yawarninwanpis israelcunaj wasi puncusnincuman chꞌajchucherka, curaj wawancuta wañuchej angel ama wañuchinanpaj. 29 Diospi japꞌicuskancuraycu israelcunaka puca kocha chaupita chimparkancu chꞌaqui pampatajina. Egipto runasrí quiquillantataj chimpayta munaspa yacuwan chincachiskas carkancu.

30 Diospi japꞌicuskancuraycu israelcunaka Jericó llajtaj perkasninta urmacherkancu, kanchis pꞌunchayta llajtata muyuspa. 31 Diospi japꞌicuskanraycu Rahab, khencha warmipis, israelcunamanta watekajcunata allillanta wasinman wajyarka. Ajinapi mana wañuchiskachu carka mana casucojcunawan cusca.

32 ¿Imatataj astawan niyman? Nichá tucuyta atiymanchu willaspa Gedeonmanta, Baracmanta, Sansonmanta, Jeftemanta, Davidmanta, Samuelmanta, Diospa unay willajcunanmantawanpis. 33 Diospi japꞌicuskancuraycu paycunaka llajtacunata atiparkancu. Chekan cajta runaspaj ruwarkancu. Diospa sumaj niskanta juntꞌaskata causaynincupi ricorkancu. Leoncunaj simincumanta cacharichiskas carkancu. 34 Paycunaka manchay laurashaj ninasta wañucherkancu. Espadawan wañuna peligromanta aykecorkancu. Pisi callpayoj cashaspapis, Diospi japꞌicuskancunejta callpachaskas carkancu. Guerrapi makanacushaspa callpachaskas carkancu. Contrancupi waj llajtasmanta soldado tropas jamojtincu aykecherkancu. 35 Warmiska wañuskasnincuta causarimuskata ricucaporkancu.

Waquinrí sinchꞌi ñacꞌarichiskas carkancu. Cacharichiska caytaka mana munarkancuchu, aswan sumaj wiñay causarimuy caskanraycu. 36 Wajcunataj sinchꞌita asipayaskas sekꞌoskastaj carkancu Diospi japꞌicuskancuraycu. Chaywanpis wataskas carcelpi wiskꞌaskas carkancu. 37 Rumiswan chꞌankaskas, serruchuwan iscayman qhuchuspa wañuchiskas, ñacꞌarichiskas, espadawan wañuchiskapis carkancu. Wajchajina oveja karawan cabra karawanpis pꞌachalliska caynejta jakaynejta puricusharkancu. Pisichicuypi carkancu. Llaquichiskas ñacꞌarichiskastaj carkancu. 38 Paycuna may cꞌacha runas caskancuraycu cay pacha runaska mana paycunapajjinachu carkancu. Chꞌin pampaspi, orkospi caynejta jakaynejta puricusharkancu. Orko juscꞌuspi, pampa juscꞌuspipis aykecuspa tiyacorkancu. 39 Diospi japꞌicuskancuraycu tucuy paycunaj Diosta cusichiskancu willacun. Chaywanpis paycunaka Dios sumaj niskanta juntꞌaskanta manaraj ricorkancurajchu. 40 Nokanchejpajka aswan sumaj cajtamin waquichipuwarkanchej. Yuyaskanmanjinataj tucuy sumaj niskasninta nokanchejmanwan cuscalla paycunamanpis Dioska juntꞌanka.