Phutiy pꞌunchaycuna jamonka
3
Cayta reparay: Khepa tiempospi manchay phutiy sajra pꞌunchaycuna jamonka. 2 Cankancu runas pay quiquillancuta munacojcuna, kolke munacojcuna, mentacojcuna, jatunchacojcuna, sajra parlajcuna, tatasnincuta mana casojcuna, mana graciasta kocojcuna, Diosta mana manchachicojcuna. 3 Cankancu animaljina mana munacuyniyojcuna, mana allinyanacojcuna, chꞌataycojcuna, millay munaynincuta sajsachejcuna, phiña alkojina mana qhuyaspa makajcuna, allin cajta chejnejcuna. 4 Callankancutaj amigosnincuta jaywaycojcuna, mana yuyaywan sinchꞌichacojcuna, machu machucuna. Yankha cusiyta astawan munankancu Diospa munacuyninmantaka. 5 Rijchꞌaconkancu Diosta yupaychajcunallaman. Causaynincupirí Diospa atiyninta khesachankancu. Chayjina runasmantaka carunchacuy. 6 Chaycunamanta cancu yachachinasnincuwan wasisman satꞌicojcunaka. Yaycuncu jucha kꞌepi pisi sonko warmista engañaj. Chay warmiska tucuy sajra munaycunawan apaycachaskas cancu. 7 Paycunaka yachachichicuyllatapuni munancu, manataj ni jaycꞌajpis cheka cajta rejsincuchu. 8 Imaynachus unay Janeswan Jambreswan Moisespa contranpi churacorkancu, ajinallatataj chay llulla yachachejcunapis cheka cajpa contranpi churacuncu. Paycunaka millay yuyayniyojcuna cancu. Cheka ñanmantapis pantaskas khesachaskas ima cancu. 9 Astawanrí mana ñaupajman renkancuchu. Paycunaj mana yuyayniyoj caynincutaka tucuymin sutꞌita yachankancu. Ajinallataj carka chay unay churanacojcunawanpis.Imaynachus Pabloj causaynin caskan
10 Kanrí causayniyta sumajta khawaspa yachachiskayta khaticoj canqui. Tucuy imapi ujchacuwarkanqui, puriyniypi, imachus yuyaskaypi, Diospi japꞌicuyniypi, sajra imasta unayta muchuyniypi, munacuyniypi, llaquiycunata Diospi confiacuyniypi. 11 Quiquillantataj ujchacuwarkanqui Cristoraycu khatiycachachicuskaypi, ñacꞌariyniycunapipis. Ajinamin carka jakay Antioquía, Iconio, Listra llajtaspi. 12 Chekatapuni Cristo Jesuswan ujchaska paymanjina causayta munajcunaka tucuynincu ñacꞌariyta muchonkancu. 13 Astawanpis sajra runacunaka pantachejcunapis sajramanta astawan sajraman chayankancu, pantachispa pantachichicuspa.
Diospa niskasnin callpachasonka
14 Kanrí yachacuskayquipi sumajta japꞌicuskayquipipis sayay pimanta yachacuskayquita yachaspa. 15 Wawamantapachataj yacharkanqui Diospa palabranta. Chayka atiyniyojmin yachachisunanpaj wiñay causayniyoj canayquipaj Cristo Jesuspi japꞌicuyniyquinejta. 16 Diospa palabranpi tucuy kelkaskaska paymantamin. Chayraycu allinta sirven runata yachachinapaj, juchanta reparachinapaj, cheka cajman cutirichinapaj chekan causaypi wiñachinapajpis. 17 Chayka cashan Diospa runan sumaj waquichiska cananpaj tucuy cꞌacha ruwanaspaj.