Cristo Jesuspa sumaj soldadonjina juntꞌaj caymanta
2
Kantaj, wawáy, Cristo Jesuswan ujchaska cꞌacha yanapayninwan callpachacuy. 2 Tucuypa ñaupakencupi yachachisuskaytapis, chayta cꞌacha causayniyoj runasman yachachiy. Ajinamanta waquichiskas cankancu wajcunaman yachachinancupajpis. 3 Llaquiycunapipis muchoj-masiycu cay, Cristo Jesuspa sumaj soldadonjina. 4 Ni mayken soldadopis cay pacha imaswan chꞌampaycucunchu comandantenta cusichinanpaj. Cristoka soldadonpaj wajyasorka. 5 Yachanquijina tincupi manachus camachiskasmanjina atipancuchu chayka, mana premiota japꞌincuchu. 6 Ajinallataj sinchꞌita chajranpi llancꞌajpis, payllamin ñaupajta pokoynintaka japꞌinan tiyan. 7 Tanteyacuy niskasniymanta. Señortaj tucuy cay imaspi yuyayta kosonka.Yuyaricuy causarimuska Jesucristota
8 Yuyaricuy Jesucristota. Payka wañuymanta causarimorka, Davidpa mirayninpis carka. Chay sumaj willanas nokaman jaywaskata willarani, 9 chayraycutaj sajra runajina watachicunaycama muchushani. Diospa niskanrí mana wataskachu nitaj jarcꞌaskachu cashan. 10 Chayraycu tucuy imasta muchushani Diospa ajllacuskasninraycu paycunapis juchamanta cachariskas canancupaj. Munanimin Cristo Jesuswan ujchacuspa wiñay causaytaa tarinancuta.
11 Cay niskaka chekamin:
Sichus paywan cusca wañunchej chayka, paywan cuscamin causasunchej.
12 Diospi confiacuspa muchunchej chayka, paywan cuscamin camachisunchej.
Astawanpis sichus nisunman payta mana rejsiskanchejta chayka, paypis mana rejsiwaskanchejta nillankataj.
13 Paypi mana japꞌicusunman chaypis, payka niskanta juntꞌanpuni.
Payka manamin llulla cayta atinchu.
14 Diospa ñaupakenpi chay cꞌacha causayniyoj runasta camachiy ama palabras jawa makanacunacuta. Chay makanacus ni pita yanapanchu. Astawanpis uyarejcunata tucuchin. 15 Tucuy atiskayquita ruway Diospa ñaupakenpi allinpaj khawaska canayquipaj mana pꞌenkacuyniyoj llancꞌajjina. Diospa cheka niskantapis cabalta willaraj cay. 16 Carunchacuypuni chay yankha thautiycunamanta. Chaycunaka astawan astawanmin runata pantayman pusanka. 17 Pantachejcunaj yachachiynincutaj gangrena onkoyjina tucuyta miqhuyconka. Paycunamanta cancu Himeneowan Filetowan. 18 Paycunaka cheka yachachiymanta pantaporkancu, wañuymanta causarimuyka chayamuskaña, nispa. Chay niskancuwan waquinta Diospi japꞌicuynincumanta urmacherkancu. 19 Astawanpis Diospa churaskan cimientoka sinchꞌi sayaskamin. Chay rumipi sellaskataj cayta nin: Señorninchej rejsin paypa runasnin cajcunata. Nillantaj: Sapa uj, “Diospa runan cani” nejka, sajra ruwanasmanta carunchacuchun.
Diospa sirvejnenka llimphu causayniyoj canan tiyan
20 Uj jatun wasipeka mana kori, kolke chuwasllachu tiyan. Manachayrí cꞌullu, tꞌuru chuwaspis tiyallantaj. Waquenka sumajpaj khawaska cancu. Waquintaj mana sumajpaj khawaskachu cancu. 21 Chayraycu uj runa chay sajra ruwaycunamantachus llimphuchacun chayka, sumajpaj khawaska chuwajina canka. Señorpa ruwananpaj tꞌakaska canka, waquichiskataj tucuy sumaj ruwaypaj.
22 Aykecuy waynajina yankha munaycunamanta. Astawanpis tucuy sonkowan munay chekan causayta, Diospi japꞌicuyta, munacuyta, allillanpi tiyacuytapis. Ajinata khatiy llimphu sonko Diosmanta mañacojcunawan cusca. 23 Mana yuyayniyoj mana yachayniyoj tapunacuycunatataj khesachay. Yachanquijina chaycunamantaka jamun sinchꞌi churanacuycuna. 24 Señorpa camachenka mana phiñanacojchu canan. Manachayrí tucuypaj cꞌacha, sumaj yachachej canan. Runas payman mana allinta ruwajtincupis mana phiñacuspa muchucunan. 25 Llampꞌu sonkowan churanacojcunata yachachinan, suyaspa Dios paycunata yanapananta. Ajinapi ichapis sajra ñanta sakespa cheka ñanta sumajta rejsenkancu. 26 Ichapis cutirenkancu cheka yuyayman supay Satanaspa trampanmanta aykecuspa. Paycunaka Satanaspa japꞌiskan carkancu paypa munayninta ruwanancupaj.