PRIMERA CARTA DEL APOSTOL SAN PABLO A
TIMOTEO
1
Noka, Pablo, Cristo Jesuspa cachan cani Diospa churawaskanmanjina. Dioska cachariwarkanchej juchasninchejmanta Cristo Jesusnejta; chayraycu suyashanchejpuni wiñaypaj paywan causacuyta. 2 Kelkamushayqui kanman, Timoteo wawáy. [Nokanejta Diospi japꞌicorkanqui; chayraycu wawayjina canqui.]a Dios Tataj, Cristo Jesús Señorninchejpatapis cꞌacha yanapaynin, qhuyacuyninpis kanwan cachun allillanpi causacunayquipaj.Timoteo Efeso llajtapi
3 Macedoniaman rishaspa camacherkayqui Efeso llajtapi caricunayquita. Chaypi caricuy waquin runasta camachishanayquipaj llulla yachachinasta ama yachachinancuta. 4 Chaywan niyta munani ama atipachicuchuncuchu llulla cuentoswan nitaj aylluncoj ashqha sutisnincuwan. Chaycuna mana tucucuyta atinchu. Chay pantaska yachachinaska hermanosta Diospi japꞌicuskancuta mana wiñachinchu. Manachayrí chaycunamantaka cꞌaminacuy tapunaslla jamun. 5 Cristorí camachiwanchej munacuypi causananchejta. Cay munacuyka llimphu sonkomanta, cꞌacha sonko-yuyaymanta, Diospi cheka japꞌicuymantawan. 6 Chay llulla yachachejcuna cay camachiskanmanta pantaycuspa waj yachachinaspi purishancu. Chayraycu paycunaj yachachinasnincu yankha thautiyllaman tucun. 7 Diospa camachiskasninmanta munancu mentaska yachachejcuna cayta. Chaywanpis mana entiendencuchu imatachus nishaskancuta. Sinchꞌita yachachispapis mana reparancuchu imatachus niyta munaskanta.
Diospa camachiskasnenka sumajmin
8 Yachanchej Diospa camachiskasnin sumaj caskanta Diospa yuyaskanmanjina japꞌicojcunapaj. 9 Manataj chekan ruwajcunapajchu koska, manachayrí sajra ruwajcunapaj. Caycunapaj: Camachiskasta mana japꞌejcunapaj mana casucojcunapajwan, Diospa contranpi cajcunapaj juchasapaspajwan, sajra runaspaj cꞌacha imaspa contranpi cajcunapajwan, tatancuta wañuchejcunapaj mamancuta wañuchejcunapajwan, runata wañuchejcunapaj, 10 khenchacunapaj, kharipura cuerposwan juchallicojcunapaj, runa suwajcunapaj, llullacojcunapaj, llullacuspa jurajcunapaj. Chaycunapaj Dios camachiskasninta churarka pillapis waj imata sumaj yachachinaj contranpi ruwajpajpis. 11 Chay yachachinaka sumaj willanasmanjinamin. Dios cꞌachapuni caspa sumaj willanasninta jatun atiyninmanta runasman willarka. Chaytapis nokaman confiawaspa jaywawarka.
Cristoka Pablota churarka yanapajnin cananpaj
12 Graciasta koni Cristo Jesús Señorninchejman willaranaypaj callpachawaskanmanta. Cheka ruwajninpaj khawawaspa paypa yanapajnin canaypaj churawarka. 13 Ñaupajpi paymanta sajrata parlarkani, paypa runasninta sinchꞌita muchucherkani. Jatunchacuspataj paycunata mayta insultasharkani. Astawanpis mana yachaspa manaraj paypi japꞌicuspataj ajinata ruwasharkani. Chayraycu Señorninchejka qhuyawarka. 14 Tucuy juchasniymanta paypa cꞌacha yanapaynin may aswan jatun carka. Cꞌachata yanapawaskanraycu paypi japꞌicuni paytataj munacushani. 15 Cay niskaka chekapunimin tucuy japꞌicunancupaj: Cristo Jesús jamorka cay pachaman juchasapasta cacharichinanpaj. Paycunamanta noka curaj juchayoj cani. 16 Astawanpis Dios qhuyacuwarka ñaupaj ricuchinajina canaypaj. Ajinapi nokamanta khepata may ashqha runas wiñay causaypaj paypi japꞌicushancu. Tucuy paycunamanpis Dios may jatun munacuywan suyawaskanta ricuchiyta munarka. 17 Chayraycu yupaychana Camachejninchejta, wiñaypaj camachin, ni jaycꞌaj wañoj, mana ricuy atina, yachayniyoj cꞌata Dios. Jatunchana, atiyniyojpaj khawana wiñaypa wiñayninpaj. Ajina cachun.
Timoteoka Diospa sumaj soldadonmin
18 Unayña hermanos willarkancu Diospa sutꞌinchaskasninta kanmanta. Chaymanjina, Timoteo wawáy, cay camachiskata jaywashayqui: Chay sutꞌinchaskasmanjina sumaj soldadojina makanacuy sajra cajta atipanayquipaj. 19 Chayta ruwaypuni Diospi japꞌicuspa, llimphu sonko-yuyayniyquiwan. Waquin runas sonko-yuyaynincuta khesachaspa mana casuncuchu. Chayraycu paycuna Diospi japꞌicuynincumanta chincaporkancu. 20 Paycunamanta cancu Himeneowan Alejandrowan. Paycunata supay Satanasman jaywarkani sekꞌoskas canancupaj. Chaywan yachancuman Diosmanta parlaspa ama llullata yachachinancupaj.