Diosmanta mañapuwaycu
3
Cunanka hermanosníy, Diosmanta mañapuwaycu. Mañacuychej Jesucristoj niskan may callpawan tucuynejpi uyariska casuskataj cananpaj. Kancuna Diospa palabranta sumajpaj khawaspa japꞌerkanquichej. Ajinallatataj tucuynejpi japꞌiska cananta mañacuychej. 2 Chaywanpis mañapuwaycu chay mana cheka yuyayniyoj, sajra ruwaj runas ama jarcꞌanawaycuta. Imaraycuchus mana tucuy runaschu Diospi japꞌicuncu. 3 Señor Jesucristorí niskanta juntꞌanpuni. Paytaj callpachasonkachej wakaychasonkachejtaj sajra cajmanta. 4 Señorpi japꞌicuspataj chekata yuyaycu kancunamanta. Camachiskaycutaka casushanquichej, casunquichejpunitaj. 5 Mañacunitaj Señor Jesús munacususkanta sonkosniyquichejpi reparachisunayquichejta. Ñacꞌarichiskas cashaspapis payllapipuni japꞌicunallayquichejtataj mañacuni.Allin yuyaywan llancꞌacushaychej
6 Hermanosníy, kancunata camachiycu tucuy atiyniyoj Señor Jesucristoj sutinpi: Sichus mayken hermano khella, mana ima ruwanayojjina causacunman, yachachiskaycuta manataj casunmanchu chayka, paymanta carunchacuychej. 7 Kancuna quiquiyquichejka yachanquichejña nokaycujina ruwanayquichejta. Nokaycu kancunawan cashaspaka manapuni khellaschu carkaycu. 8 Ni pejpa miqhunanta miqhorkaycuchu khasillamanta. Manachayrí cusiywan llancꞌarkaycu mayta saycꞌorkaycupis. Causanayniycupajka tuta pꞌunchay llancꞌarkaycu mana maykenniyquichejmanpis llaquichinaycupaj. 9 Atiycuman carka kancunamanta imatapis mañacuyta causayniycupaj, manataj munarkaycuchu. Astawanrí munarkaycu uj yachacunapajjina cayta, kancuna quiquillantataj ruwanayquichejpaj. 10 Kancunawanraj cashaspa kancunaman camacherkaycupuni mana llancꞌay munaj runaka ama miqhuchunchu. 11 Imaraycuchus uyarishaycu kancunamanta waquin mana llancꞌaspa pꞌunchaycunata usuchishaskayquichejta, wajcunaj ruwanasnincumanrí chajrucuskayquichejtawan. 12 Chayjina runastaka camachiycu, tucuy atiyniyoj Señorninchej Jesucristoj sutinpi niycutaj: Cay pachapi causayniyquichejpaj allin yuyaywan llancꞌacuychej.
13 Tucuy kancunari, hermanosníy, sumaj cajta ruwayta amapuni sakeychejchu. 14 Sichus mayken cay cartapi niskaycuta mana casunmanchu chayka, reparaychej payta. Amataj paywanka chajrucuychejchu, ajinamanta pꞌenkacunanpaj. 15 Amataj chejnisojtajinaka khawaychejchu. Manachayrí munacuywan payta cꞌamiychej waukeyquichejtajina.
Napaycucuna
16 Allinyanachej Señor Dios tuta pꞌunchay tucuy imapi allillanpipuni kancunata causachisuchun. Señorninchej tucuy kancunawan cachun.