Sajrawan juntꞌaska runaj riqhurimuynin
2
Hermanosníy, Señorninchej Jesucristoj cutimunanmanta, payman tantanawanchejmantawan kancunata mayta niycu: 2 Amapuni iscayrayaychejchu Señor Jesuspi yachachiskas caskayquichejmanta. Señorninchejpa cutimunan pꞌunchay chayamushaskantaña waquin llullacuspa nincu. Cachun llulla willajcuna moskoypijina ricuskancuta nejcunapis nokaycoj cartaycu caskanta llullacuspa nejcunapis. 3 Ni imaynamanta ni ima runawanpis pantachicuychejchu. Señorninchej Jesuspa cutimunan ñaupajtaka runas sinchꞌita jatarenkancu Diospa contranpi. Chaypachataj Diosta mana casucoj, chay cꞌullu, sajrawan juntꞌaska runa riqhurimonka. Payka wiñaypaj uqhu pacha laurayman rinanpajmin cashan. 4 Paymin churanacuspa jatunchacun dios niskacuna contranpi, tucuy yupaychaska cajcunaj contrancupipis. Chaycunaj curajnincu canmanjinapis Diospa yupaychana-wasinpipis tiyaycuspa pay diosjina yupaychachicuyta munan.5 Yuyaricushanquichejrajchá caytaka kancunawan cashaspa nerkayquichejña. 6 Nisuskayquichejmanjina yachanquichej sajra cajta uj atiyniyoj jarcꞌaj caskanta. Paytaj chay sajrata jarcꞌashan riqhurimunan pꞌunchayllapi riqhurimunanpaj. 7 Cunan pꞌunchaycuna sajra caj pacaypi llancꞌashanña. Chay jarcꞌaj caypi canancama chay cꞌullu runa jarcꞌaska canka. 8 Chanta chay cꞌullu, sajrawan juntꞌaska caj sutꞌita riqhurimonka. Paytaka tucuy atiyniyoj Señorninchej Jesús palabranwan wañuchenka. Lliphipej atiyninwan jamuspa payta kꞌalata atipanka. 9 Chay sajrawan juntꞌaska cajtaj supay Satanaspa atiyninwan jamonka ashqhasta pantachinanpaj. Ruwankataj jatuchej ricuchinasta, tꞌucunapaj ruwanastawan. Caycunarí llullaspuni cankancu. 10 Chay llullaswantaj uqhu pacha laurayman rishajcunata astawan pantachenka. Imaraycuchus Diosmanta cheka cajta khesachaspa mana japꞌicorkancuchu juchamanta cachariskas canancupaj. 11 Chayraycu Dios paycunaman apachin sinchꞌi pantachej yuyayta chay llulla cajta japꞌicunancupaj. 12 Ajinamanta cheka cajta tucuy mana japꞌicojcuna juchachaskas cankancu. Diospa cheka palabrantataj manapuni japꞌicorkancuchu. Astawanpis paycunaka sajrata ruwaspapis cusicorkancu.
Kancunata Dios ajllacusorkachej
13 Nokaycurí kancunaraycu Diosman graciasta konallaycupuni tiyan. Hermanosníy, Señorninchejpa munacuskasnin canquichej. Pay ñaupajmantapacha ajllacusorkachej juchamanta cachariskas canayquichejpaj Santo Espiritunejta. Payka kancunata tꞌakasorkachej Cristoman. Cheka caj palabranta japꞌicuyniyquichejnejtataj cachariskas canayquichejpaj ajllasorkachej. 14 Chaypajmin pay yanapawarkaycu sumaj willanasta willasuyta kancunaman. Ajinamanta wajyasorkachej Señorninchej Jesucristowan janaj pachapia canayquichejpaj.
15 Hermanosníy, kancunata yachacherkaycu Jesucristoj yachachiskasninmanjina causanayquichejta. Chayllatataj kelkamorkaycupis. Chayraycu sumajta japꞌicuychej yachachiskaycuta. Sinchꞌitataj sayaychej Diospi japꞌicuspa. 16-17 Quiquin Señorninchej Jesucristo Dios Tatanchejwan mayta munacuwarkanchej. Cꞌachas caskanraycu callpachaska sonkowan causachiwarkanchej nokanchejta cusichicuspa. Astawanpis mayta suyachiwarkanchej khepa pꞌunchaycunapi wiñaypaj paywan causacunanchejpaj. Ajinamanta yanapasonkachej kancunata allin cajtapuni ruwanayquichejpaj cꞌachata parlanayquichejpajpis.