3 Hermanosníy, Diosta agradeceycupuni kancunaraycu. Munaycupuni graciasta koyta, ari, astawan astawan Diospi japꞌicuskayquichejmanta. Chaywanpis sapa ujniyquichej astawan astawan munanacuskayquichejmantapis graciasta koycu. 4 Chayraycu tantaska hermanos chaupipi nokaycu quiquiycu may cusiywan parlaycu kancunamanta. Tucuy ñacꞌariyniyquichejpi llaquiyniyquichejpipis sinchꞌita Jesucristopi sayashanquichej, Diospi japꞌicushanquichejtaj. 5 Paypi japꞌicuspa ñacꞌariskayquichejwan Dios ricuchin chekanta khawaspa tucuyman ruwaskancumanjina cutichinanta. Pay munarka khepa pꞌunchaypeka pay camachenka, chayman yaycunayquichejpajjina khawaskas canayquichejta. Chayraycutaj kancuna ñacꞌarishanquichej.

6 Dios chekan ruwaj caspa ruwaskancumanjina runasman cutichenka. Kancunata ñacꞌarichejcunatataj pay ñacꞌarichenka. 7 Kancuna llaquichiskacunatataj nokaycuwan cusca Señorninchej Jesucristo samarichiwasun, atiyniyoj angelesninwan janaj pachamanta uraycamojtin. Laurashaj ninawantaj riqhurimonka. 8 Señorninchej Jesuska juchasnincuraycu ñacꞌarichenka sumaj willanasninta mana casojcunata, Diosta mana rejsejcunatawan. 9 Chaycuna wiñaypaj ñacꞌarichiskas cankancu Señorpa ñaupakenmanta tꞌakaskas paypa lliphipej atiyninmantawan. 10 Chay pꞌunchay Señor Jesús cutimonka yupaychaska cananpaj payman tꞌakaska runasninnejta. Paypi tucuy japꞌicojcunataj payta jatunpaj khawankancu. Kancunapis willaskaycuta japꞌicuskayquichejraycu paywan cusca canquichej.

11 Chayraycu nokaycupis Diosninchejmanta mañacushaycupuni kancunapaj. Mañacushaycu Diospa wajyaskasnin causanancu ajinata causanayquichejpaj. Chaywanpis tucuy sunaj munayta, paypi japꞌicuspa tucuy ruwanasniyquichejtapis Dios atiyninwan juntꞌachun. 12 Ajinata causaspaka Señorninchej Jesucristota jatunchanquichej paytaj kancunata jatunchan. Tucuy cayka Diosninchej Señor Jesucristowan cꞌachata yanapawaskanchejmanjinamin.