Jesucristota suyaychej waquichiskas
5
1-2 Hermanosníy, kancuna munashanquichej yachayta: Unaytachus suyananchejta Señor Jesucristoj cutimunanta. ¿Imaspiwantaj cankancu? Kancunarí sumajta yachanquichejña pay mana yuyaymanta cutimunanta. Uj suwa tutapi ujllata jamun, ajinata jamonka. Chayraycu mana chay jawa kelkamunaycuchu tiyan. 3 Maypachachus runas nishankancu: “Allinta tiyacushanchej, manataj imamanta manchachicunapajjinachu”, nispa. Chaypacha ujllapi tucuchiskas cankancu. Wijsalliska warmeka onkocunanpuni tiyanjinallatataj canka. Nitaj pipis Diospa phiñacuyninmanta aykecuyta atenkachu. 4 Kancunarí hermanosníy, mana lakhayaj juchapichu causashanquichej. Chayraycu Señor Jesús cutimojtin manamin mancharicunquichejchu, runasta suwa mancharichin ajinataka. 5 Imaraycuchus pꞌunchay cꞌanchaypijinamin tucuy kancuna causashanquichej Diospa palabranta casuspaka. Manataj juchapichu tutapijina purishanquichej nitaj lakhayajpijinachu. 6 Chayraycu ama puñunachu, Diospa palabranmanta mana yuyaricuspa chay wajcunajina. Manachayrí rijchꞌariskas wakaychacuspa yuyayninchejpi suyananchej tiyan. 7 Arí, tutapi runaska puñuncu. Tutapitaj machancu. 8 Nokanchejrí pꞌunchaypi causashaskanchejraycu mana puñuspa waquichiskas cananchej tiyan. Wakaychacuna sonkosninchejta Diospi japꞌicuspa munanacuspataj. Chaywanpis wakaychacuna yuyayninchejta suyaspa Jesucristo jamunanta. 9 Dios ajllawarkanchej mana phiñacuyninta nacꞌarinanchejpajchu. Manachayrí ajllawarkanchej Señorninchej Jesucristo juchasninchejmanta cacharichinawanchejpaj. 10 Jesucristo nokanchejraycu wañorka paywan wiñaypaj causananchejpaj, causashajcunapajpis, Cristopi japꞌicuspa wañuporkancu chaycunapajpis. 11 Chayraycu cunan ruwashanquichej ajinallatapuni purajmanta callpachanacushaychej sonkoyquichejpi wiñachinacushaychejtaj.Camachiskas mosoj causaypaj
12 Hermanosníy, mayta niycu may allinpaj khawanayquichejta Señor Jesuspi curaj yuyaychajcunayquichejta. Paycuna sinchꞌita llancꞌancu allinniyquichejpaj kancunata yuyaychaspa. 13 Chayraycu munacuspa paycunataka llancꞌaskancuraycu may curajpaj khawaychej. Kancunapura allillanpi causacuychejtaj.
14 Mayta niycutaj, hermanosníy, yuyaychanayquichejta khellacunata Diosta casuspa llancꞌanancuta. Callpachaychejtaj pisi sonko cajcunata. Yanapaychejtaj sonkosnincupi pisi callpayojcunata. Qhuyaspataj, tucuy runaswan cꞌachaspuni caychej. 15 Ama pipis sajramanta sajrallatataj cutichichunchu. Wajjinamantaka tucuy atiskayquichejwan purajmanta cꞌachata causacuychej tucuy runaswanpis.
16 Cusicuychejpuni. 17 Dioswan parlaspa payta uyariychejpuni. 18 Imapis cachun tucuy causayniyquichejpi Diosman graciasta kollaychejpuni. Arí, Dios munan ajinata causananchejta Jesucristowan ujchaskas.
19 Santo Espíritoj munayninta amapuni thasnurpaychejchu uj ninatajinaka. 20 Paypa atiyninwan runas willarajtincu chay sutꞌinchanasta ama manacajtajina khesachaychejchu. 21 Manachayrí sumajta khawaychej tucuy imata yachanayquichejpaj cheka Diosmantachus caskanta manachus. Diosmanta cajtin chay allin cajta japꞌispa wakaychaychej. 22 Mana Diosmanta cajtenka tucuy chay sajra cajmanta tꞌakacuychej.
Dioska palabranta juntꞌanpuni
23 Diosllamin sonko tiyaskaswan allillanpi causachiwanchej. Mañacuni pay quiquin kancunata kꞌalata payman tꞌakananta mana juchayoj canayquichejpaj. Wakaychachun sonkoyquichejta, tucuy cayniyquichejtapis cuerpoyquichejtapis —Señor Jesús cutimojtin mana juchayoj canayquichejpaj. 24 Wajyasojniyquichejka palabranta juntꞌanpuni, niskanmanjinataj ruwanka.
Napaycuychej
25 Hermanosníy Diosmanta mañapuwaycupuni.
26 Cristopi tucuy hermanosta napaycuychej cheka munacuywan. 27 Señor Jesuspa atiyninpitaj camachiyquichej sutꞌita leenayquichejta cay cartayta tucuy hermanosman.
28 Señorninchej Jesucristoj cꞌacha yanapaynin kancunawan cachun. Ajina cachun.