Diosmanta mañacunayquichej tucuypaj
2
Ñaupajta cayjinata tantaska hermanos chaupipi camachini: Graciasta kospa Diosmanta mañacuychej tucuypaj. 2 Diosmanta mañacuychej camachejcunapaj tucuy autoridadcunapajpis. Ajinapi allillanta chekanta causacusunchej Diospa runasninjina paypa ñaupakenpi, tucuy runaspa ñaupakencupipis. 3 Chayjinata Diosmanta mañacuyka sumajmin, Cacharichiwajninchej Diostapis cusichin. 4 Pay munanpuni tucuy runas juchasnincumanta cachariskas canancuta rejsinancutataj cay cheka cajta: 5 Dioska uj sapan. Uj sapallantaj cashan Diosta runastawan allinyanachejpis. Chay allinyanachej Runaka Cristo Jesusmin. 6 Diosman allinyachinawanchejpajtaj pay quiquinta jaywacorka, nokanchej wañunanchejmanta wañuspa wiñaypaj Diospata cananchejpaj. Cristoka ajllaska horapi causayninta jaywacorka Diospa munacuyninta ricuchinawanchejpaj. 7 Paytaj nokata churawarka willarajta cachantataj. Churawarka waj llajtayoj runasman yachachejta paycuna Diospi japꞌicunancupaj paymanjina causaytataj rejsinancupaj. Chekata nini, mana llullacunichu. 8 Chayraycu munashani tucuy tantaska hermanos chaupipi kharis Diosmanta mañacunancuta, llimphu sonkoyoja Diosman tꞌakaskas. Runaswan mana phiñacuspa nitaj cꞌaminacuspa mañacuchuncu.Warmis Diospa wasinpi
9 Munashani warmispis ajinallatataj ruwanancuta, pꞌachallicunancutataj Diospa runasninjina, cacha yuyayniyoj, llampꞌu sonkoyoj. Amaña cꞌachachacuchuncuchu cꞌuyuska chujchawan, ni koriwan, ni perlaswan, nitaj ancha sumaj pꞌachaswan. 10 Manachayrí cꞌachachaskas cachuncu sumaj ruwaskasnincupi. Chayjina sumaj cashan Cristota khatej warmispaj. 11 Tantaska hermanosta yachachejtincu warmeka chꞌinllamanta yachacuchun, casucuspa tucuy imapi. 12 Warmita mana sakenichu yachachej cananta nitaj kharita camachinanta. Manachayrí chꞌinlla cacuchun tantaska hermanos chaupipi. 13 Imaraycuchus Dios ñaupajta ruwarka Adanta chaymantaña Evata. 14 Adantaj mana engañowan pantachiskachu carka. Warmirí engañachicuspa juchayojman tucorka. 15 Chaywanpis Dios warmita churarka wawasta uywananpaj. Cacharichiskastaj cankancu chayta ruwaspa, Diospi japꞌicuywan, munacuywan, payman tꞌakaskas, cꞌacha yuyaywantaj causacuspa.