3 Sumajpaj khawaspa yanapay wajcha mana piniyoj viudasta. 4 Sitajchus uj viuda wawasniyoj chayrí allchhisniyoj chayka, paycuna payta yanapachuncu Diospa runasninpa ruwanancumanjina. Ajinata ñaupajta yachacuchuncu qhuyacuyta allinta cutichipuyta quiquin paycuna uqhupi tatasnincuman. Chayka sumajmin Diosta cusichintaj. 5 Uj wajcha viudari Diospipuni confiacun. Tuta pꞌunchaytaj Diosmanta mañacuspa causacun. 6 Astawanri chay yankha cusiypi tucuy munayninman causaj viudaka causashanpis wañuskajina. 7 Ajinallatataj runasta camachiy mana khawaraskas canancupaj. 8 Sapa uj quiquin ayllusninpaj, astawanka wasinpi cajcunapaj, waquichipunan tiyan. Manachus chayta ruwan chayka, cheka ñanta khesachan. Chay runaka Diospi mana japꞌicoj runamanta aswan manacajmin. 9 Kancuna uqhupi caj wajcha viudasmanta uj listata ruwaychej sutisnincutataj kelkaychej, sojta chunca watasniyojmanta wichayllaman. Chaywanpis canan uj sapan kharej warmin. 10 Runaspa ricuyninpi cꞌacha imasta ruwaj warmitaj canan. Paycunamanta tapuychej: ¿Wawasta sumajtachu uywarka, mana wasiyojcunata wasinman wajyarkachu, llampꞌu sonkowan pisi imaspi Diospa runasninta yanaparkachu,^a llaquiskacunata yanaparkachu, tucuy cꞌacha ruwanaman churacorkachu?

11 Sipas viudasta ama listaman churaychu. Paycunaka sinchꞌi munaynincuraycu Cristomanta carunchacuspa ujtawan casaracuyta munancu. 12 Chanta runas paycunata juchachankancu ñaupaj niskasnincuta mana juntꞌaskancuraycu. 13 Yachacuncu khella cayman. Wasimanta wasi muyuncu. Ni imata ruwaspa llulla cuentoswan wajcunaj ruwanasnincuman satꞌicuncu. Parlancutaj mana parlanancuta. 14 Chayraycu munani sipas viudas casaracunancuta, wawasta uywanancuta, wasincupi camachinancutataj. Ajinata ruwachuncu churancojcunaka ama khawaranancupaj. 15 Waquin viudaska pantaycuspa, supay Satanaspa ñanninpiña purishancu. 16 Diospi japꞌicoj runaj familianpi viudas cajtin, chay runa paycunata yanapachun. Ajinapi gastoswan mana llasachiskaschu cankancu iglesia hermanos. Chaywan tantaska hermanos yanapayta atenkancu mana piniyoj viudasta.

17 Tantaska hermanos chaupipi pastorcunaka sumajta khawapuskancumanta aswan curajta japꞌinancu, sumajpaj khawaskastaj canancu. Chayka aswan cachun Diospa niskanta willarajcunapaj yachachejcunapajwan. 18 Dios palabranpeka nin: “Ama jarcꞌaychu uywaj siminta trillashajtin”. Nintaj: “Llancꞌajpis japꞌinanpuni tiyan llancꞌaskanmanta”. 19 Uj curajtachus chꞌatancuman chayka, niskancuta uyarispa ama japꞌiychu. Manachayka iscay chayrí quinsa willasojtillancu uyariy. 20 Juchallishajcunaman juchasnincuta tucuypa ñaupakencupi reparachiy, wajcunapis Diospa ñaupakenpi manchachicunancupaj.

21 Cay camachiskasniyta wakaychay. Sinchꞌita camachiyqui Diospa, Cristo Jesuspa ñaupakenpi paypa ajllaska angelesninpa ñaupakencupipis: Cayta ruway tucuy runasta quiquin khawaspa. 22 Hermanos chaupipi Diospa llancꞌajnin cananpaj uj runamanka maquisniyquita ama uskhayta churaychu. Chayta ruwaspaka waj runaj juchanman cuscachaska cawaj. Tucuy juchamanta kan quiquiyquita wakaychacuy. 23 Amaña yacullata ujyaychu. Manachayrí uj pisi vinota ujyay wijsayquiraycu ashqha cutis onkoska caskayquiraycutaj.

24 Waquin runaspa juchasnincu cunan sutꞌita riqhurin juchachanapaj. Waquinpatarí Diospa ñaupakellanpi khepata ricuchiska canka. 25 Quiquillantaj cashan sumaj ruwaskasnincuwan. Waquin sutꞌita riqhurin cunan. Chaywanpis sumaj ruwaskasnincu mana atinchu pacaska cacuyta.