Camachismanta
6
Tucuy camachis patroncunancuta sumajpaj khawachuncu. Ajinata ruwachuncu Diospa sutinmanta yachachiyninmantapis runas ama sajrata parlanancupaj. 2 Waquin camachis Diospi japꞌicoj patroncunayoj cancu. Cay camachis patroncunancuta ama pisipi khawachuncuchu Cristopi hermanosnincu caskancuraycu. Manachayrí astawanpis paycunapaj allinta ruwachuncu Diospi japꞌicojcuna munaskapis caskancuraycu. Patronpis camachipis Diospa cꞌacha koskasninta quiquinta japꞌicuncu.Capuwaskallanchejwan cacuna
Cay imasta yachachiy camachiytaj. 3 Waquenka waj imasta yachachishancu. Paycunaka mana cacuncuchu Señorninchej Jesucristoj niskasninpi, nitaj Diosmanjina yachachinaspipis. 4 Jatunchacuspa mana yuyayniyoj cancu. Ni imata yachancuchu. Onkoskajina yuyaynincu mascꞌan phiñacuy tapunasta makanacu palabrastapis. Chaymanta jamun envidia chhokonacuy, tꞌakanacuy, sajra parlay, sajra yuyaypis. 5 Cheka ñanmanta carunchacuspa paycunaka, sajra runaspura, makanacuncupuni. Cheka yuyayta chincachiporkancu manañataj atincuchu cheka cajta rejsiyta. Diosmanjina puriyta munancu kolkechacunancurayculla. Chayta yuyaspaka pantancu. 6 Chekatapuni Diosmanjina purispa uj runa cheka khapaj capuyniyoj canka sichus capuskallanwan cacunman chayka. 7 Chekatapuni ni imata apamorkanchejchu cay pachaman yaycumuspaka. Nitaj imata apacuyta atinchejchu. 8 Chayraycu miqhunapis pꞌachapis capuwajtinchejka, chaywan cusiska cacuna. 9 Khapajyacuyllata munaj runasrí urmaycuncu supay Satanaspa trampanman. Chay trampanejta Satanás munan paycunata juchallichiyta. Chaywanpis sonkoncuman yaycumun ashqha mana yuyayniyoj sajra munaycuna. Cay munaycuna runasta pꞌampaycun. Caywantaj chincachiska tucuchiskastaj cankancu. 10 Kolketa munacuyka tucuy sajra cajcunamanta saphijinamin cashan. Waquin khapajyacuyta anchata mascꞌaspa cheka ñanmanta tꞌakacuspa pantarkancu. Tꞌujsichicorkancutaj muyuynintinmanta ashqha llaquiycunawan.
Mascꞌay Cristomanjina causayta
11 Kanrí, Diospa runanka, chay sajra munaycunamanta aykecuy. Sumajta mascꞌay chekan cayta, Cristomanjina causacuyta, Diospi japꞌicuyta, munacuyta, mana saycꞌuspa tucuy imata muchuyta, llampꞌu sonko caytawan. 12 Mosoj causaypi sinchꞌita makanacuypuni tucuy juchallichej cajta atipanayquipaj, Diospi sumajta japꞌicuspa. Wiñay causayta sinchꞌita japꞌiy. Chaypaj Dios wajyasorka. Ashqha runaspa ñaupakencupitaj willarkanqui chay wiñay causayta ajllaskayquita. 13 Yachanquichej Cristo Jesús wiñay causaymanta Poncio Pilatoj ñaupakenpi chekata willaskanta. Chayraycu tucuyman causayta koj Diospa naupakenpi Cristo Jesuspa ñaupakenpi camachiyqui: 14 Wakaychay cay camachiskata. Mana pantayniyoj manataj juchachanapajjina causacuy. Ajinata causacuy Señorninchej Jesucristo ricuchiska canancama. 15 Yupaychaska Dios ajllaskan pꞌunchaypi Cristota ricuchenka. Dios sapan atiyniyoj, camachejcunaj Camachejnincu, señorcunaj Señornincu. 16 Payllamantamin wiñay causay jamun. Payka cꞌanchaypi tiyacun. Chay cꞌanchayman ni pi kayllaycuyta atinchu. Ni jaycꞌaj pipis payta ricorkachu nitaj ricuyta atinchu. Payman cachun yupaychay atiypis wiñaypaj. Ajina cachun.
Cay pacha khapajcunapaj yachachinas
17 Cay pacha imaspi khapaj runasta camachiy ama jatunchacunancuta. Paycunata camachiy ama confiacunancuta khapaj capuynincupi uskhayta tucucojlla caskanraycu. Astawanrí Diospi confiacuchuncu. Pay nokanchejman tucuy imata ni jaycꞌaj michꞌacuspa kowanchej cusichinawanchejpaj. 18 Camachillaytaj cꞌacha imastapuni ruwanancuta. Ajinapi khapaj cankancu cꞌacha ruwanaspi. Mana michꞌacuywan wajcha runasman llaquiynincupi kospa cuscachacuncu. 19 Ajinapi cay pacha khapaj capuynincuwan mana tucucoj cajta jallchꞌankancu jamoj pacha causaypaj. Chayka cheka jallchꞌaskamin. Chay jamoj pacha causaytaj cheka causaymin.
Khepa caj camachiska
20 Timoteóy, Diospa khapaj yachachinasninta jaywarkayqui, chayta wakaychay. Khesachay mana Diosmanta yankha thautiycunata, Diospa contranpi yachaytapis. Chayta waquin, pantaspa, yachaypaj japꞌincu. 21 Paycuna chayta japꞌispa cheka ñanmanta pantarkancu.
Diospa cꞌacha yanapaynin kancunawan cachun. Ajina cachun.