Llulla yachachejcunamanta
4
Chaywanpis Santo Espíritu sutꞌita parlan cay khepa pꞌunchaycunamanta. Nin: Waquin runas cheka ñanmanta carunchacuspa uyarenkancu supaycunanejta pusaska pantachej runasta. Paycunataj supaycunamanta caj yachachiskasta japꞌiconkancu, 2 puraj uyawan llullata parlaspa. Chay runas sonko-yuyaynincuta mana casuskancuraycutaj paycunaj sonko-yuyaynincupis wañuskamanjinaña tucun.a 3 Paycunataj camachincu runasta: “Ama casaracuychejchu”, nispa. Waquin miqhunasmanta nincutaj: “Ama chayta miqhuychejchu”, nispa. Astawanpis chayta Dios waquicherka graciasta kospa runas miqhunancupaj. Paypi japꞌicojcuna, cheka cajta rejsejcuna, Diospa kowaskanchej miqhunata miqhuyta atinchej. 4 Diospa tucuy ruwaskanka sumajmin. Graciasta kospa japꞌiskanchejtaka ni imata kꞌellicunanchejchu tiyan. 5 Llimphuchaskamin Diospa niskannejta payman graciasta kojtinchej.Cristomanjina causaymanta
6 Chay imasta hermanosman yachachispa Cristo Jesuspa sumaj yanapaj camachin canqui. Paypa cheka niskasninwan miqhunawanjina uywaskapuni canqui. Khaticushanquitaj sumaj yachachiskasninmanjina. 7 Astawanrí khesachay chay mana Diosmanta manacaj cuentosta. Yuyayniyquiwan sinchꞌita ruway yachacunayquipaj Cristomanjina causayta. 8 Cuerpota callpachayka pisillata runata yanapan. Cristomanjina causayrí tucuy imapaj runata yanapan. Payta yanapankapuni cay pachapi jamoj pachapipis. 9 Chay niskaka chekapunimin tucuy runas japꞌicunancupaj. 10 Ajinaka wiñaypaj cajta mascꞌaskanchejraycu llancꞌashanchej. Maytapunitaj mascꞌashanchej Cristomanjina causacuyta Diospi confiaskanchejraycu. Paymin juchamanta Cacharichej tucuy runaspaj, astawanka tucuy paypi japꞌicojcunapaj.
Ricuchinajina cay
11 Cay imasta camachiy yachachiytaj. 12 Ama pipis kanta pisipaj khawasuchunchu sullcꞌatajinaka. Astawanrí mosoj causayniyojcunapaj, niskasniyquipi causayniyquipipis uj ricuchinajina cay. Ajinapi paycunaman ricuchinqui imaynata cacunancuta munanacuspa, Diospi japꞌicuspa, cꞌachata causacuspapis. 13 Cutimunaycama sumaj yuyaywan causacuy Diospa palabranta runasman leespa, paycunata sonkochaspa, yachachispataj. 14 Unayña hermanocunamanta curajcuna maquisnincuta churasuspa Diosmanta mañacorkancu kanpaj. Sutꞌincharkancu Diospa runasninwan llancꞌanayquipaj pay ajllasuskanta. Chaypajtaj Santo Espíritu atiyta kosorka. Chay atiywan llancꞌaypuni. 15 Chayraycu cay imaspi yuyaspapuni causacuy. Chayjinapi tucuy ricusonkancu imaynata Señorpi wiñaskayquita. 16 Khawacuy causayniyquita yachachiskayquitawan. Cay camachiskasniyta casuypuni. Ajinapi tucuy sajra cajmanta cacharichicunqui, uyarisojcunatapis.