Pabloman Señor atiyta korka
10
Cunanka Cristoj cꞌacha yuyayninnejta qhuyacuyninnejtapis noka, Pablo, uyarinawayquichejta nishayquichej: “Nokamanta waquin nishasunquichej: Kancunawan caspalla may llampꞌu sonko payka. Carupi caspataj mana manchachicuyniyoj”, nispa. 2 Waquintaj nokaycumanta nincu: “Cay pacha runasjinalla causashancu”, nispa. Noka jamuspa chekatapuni mana manchachicuspa paycunata cꞌamisaj. Chayjina sinchꞌi parlaywan kancunata niytaka mana munanichu. Chayraycu tucuy sonkowan kancunamanta mañacuyquichej: Ama paycunajinaka yuyaychejchu. Ajinamanta mana kancunaman sinchꞌita parlanaychu canka. 3 Arí, runas caspa cay pachapi causashaycu. Astawanrí mana cay pacha runasjinachu makanacushaycu. Manachayrí sajra imasta atipanaycupaj makanacuycu. 4 Makanacuna imasniycupis mana cay pachamantachu. Manachayrí Diosnejtamin atiyniyoj, callpayoj jarcꞌaj imasta tucuchinanpaj, niskasninpa contranpi cajtapis tucuchinanpaj. 5 Pantachej yuyaskasta tucuchiycu. Diospa yuyayninpa contranpi tucuy okhariska yuyayta urmachiycupuni. Tucuy yuyaytapis atipaycu runas Cristota casunancupaj. 6 Kancuna tucuy imapi casucojña cajtiyquichej tucuy mana casucojcunata chekanchanaycupaj waquichiskasña caycu.7 Ñaupakeyquichejpi sutꞌi imasta sumajta reparaychej. Sichus maykenpis Cristojta caskanta yuyan chayka, ujtawan yuyachun cay imasmanta. Reparachuntaj nokaycupis Cristojta caskaycuta. 8 Sitajchus atiyniycumantapis mentacuni chayka, mana pꞌenkacunichu Señorninchej kowaskaycuraycu. Chay atiyta kowarkaycu mosoj causaypi wiñachisunaycupaj, manataj kancunata urmachinaycupajchu. 9 Chayta nishani mana kelkaskaynejllata manchachejjina rijchꞌacunaypajchu. 10 Yachani waquin nishancu: “Pabloj kelkaskasnenka sinchꞌitaj atiyniyojtaj. Caypi cashasparí pisi callpa runaman rijchꞌacun, niskasninpis ni imapaj cancu”, nispa. 11 Chayjina parlaj runaka yachachun: Imaynachus carumanta kelkaskapi cashaycu quiquillantaj kancunawan cashaspapis ruwanaspi casajcu.
Pablo Corintoman cachaska willarananpaj
12 Cayta yachaychej: Mana atiycuchu chay jatunchacojcunajina churacuytaka ni paycunawan quiquinchacuytapis. Paycuna quiquincumanta tupunata ruwacuncu. Chaywan paycunapura tupunacuncu quiquinchanacuncutaj. Ajinata ruwaspaka mana yuyayniyoj cancu. 13 Nokaycurí manamin chay mana tupuy atina imaswanchu mentacuycu. Astawanka Dios llancꞌanaycuta ricuchiwarkaycu. Chaymanjina llajtamanta llajtaman Cristoj sumaj willanasninwan purispa kancunacama chayamorkaycu. 14 Diosmanta koska llancꞌanaycu jallpꞌajina caskayquichejraycu ñaupaj willarajcuna kancunapaj carkaycu. Chaywanpis chay llancꞌanaycu jawaman mana llojserkaycuchu. 15 Llancꞌanaycu jawapi wajcunaj llancꞌanasnincumantaka mana mentacuycuchu. Manachayrí munaycu Diospi japꞌicuyniyquichejpi astawan wiñaskas caspa, aswan jatuchej llancꞌanaspaj callpachanawaycuta. 16 Ajinapi llancꞌanaycumanjina kancunamanta aswan caru jallpꞌasman puriyta atisajcu Cristomanta willaraspa. Manataj mentacuyta munanichu wajcunaj waquichiskancupi kallariskaymanta. 17 Mentacuyta munajka Señormanta mentacuchun. 18 Runasman pay quiquillan rejsichicuyta munajka mana chayraycuchu allinpaj khawaska canka. Manachayrí Señor payta rejsichejtinmin allinpaj khawaska.