PRIMERA CARTA DEL APOSTOL SAN PABLO A LOS
CORINTIOS
Pablo napaycun Corinto llajtapi hermanosta
1
Noka, Pablo, Cristo Jesuspa cachan cani. Cachan canaypaj Dios ajllawarka paypa munayninnejta. Hermanonchej Sostenes nokawan cashan. 2 Kelkamushayquichej, Corinto llajtapi Diospa sutinpi tantacojcunaman. Diosllaman tꞌakaskas carkanquichej Cristo Jesuswan ujchaska. Dios ajllacusorkachej paypa llimphu causayniyojcunan canayquichejpaj. Kancunatapis waj ashqha hermanostapis pay ajllarka. Ajinatamin ajllacuskasnin tucuynejpi yupaychashancu Señorninchej Jesucristota. Payka paycunaj Señornincu cashan, nokanchejpatapis. 3 Tatanchej Diospa, Señorninchej Jesucristojtapis cꞌacha yanapaynin kancunawan cachun allillanpi causacunayquichejpaj.Graciasta Diosman kon paycunaraycu
4 Diosniymanka graciasta koshanipuni kancunaraycu. Cristo Jesusnejta Dios cꞌacha yanapayninta kosorkachej. Chayraycu graciasta koni. 5 Dioska Cristonejta tucuy imaspi khapajyachisorkachej mosoj causayniyquichejpaj, tucuy parlaypi tucuy yachaypipis. 6 Caymin ricuchin Cristoj willanan causayniyquichejpi sumaj sayaska caskanta. 7 Ajinaka mana pisishanquichejchu Santo Espíritoj koskan atiycunapi. Cusiywantaj suyashanquichej Señorninchej Jesucristota Dios ricuchinanta. 8 Ricuchinancama Dios sayachisonkachej mana juchayoj canayquichejpaj Señorninchej Jesucristoj ñaupakenpi. 9 Dioska niskasninta juntꞌanpuni. Paytaj wajyasorkachej Wawan Jesucristo Señorninchejwan ujchaska causacunayquichejpaj.
Munan paycuna uj yuyayllapi canancuta
10 Hermanosníy, mayta nishayquichej Señorninchej Jesucristoj sutinpi tucuyniyquichej uj yuyayllapi causacuychej. Ama tꞌakaskaska caychejchu. Astawanpis allinyaskas uj yuyayllapi uj munayllapitaj caychej. 11 Cayta niyquichej, hermanosníy, imaraycuchus Cloepa wasinmanta cajcuna willawarkancu kancuna chaupipi phiñanacuycuna cashaskanta. 12 Caywan niyta munani, sapa uj nishaskayquichejta:
“Nokaka Pabloj tꞌakanmanta cani”, chayrí “nokataj Apolospa tꞌakanmanta cani”, chayrí “nokataj Pedroj tꞌakanmanta cani”, chayrí “nokataj Cristoj tꞌakanmanta cani”, nispa.
13 ¿Ujcunallapajchu Cristoka churaska carka? ¿Pablochu chacataska carka kancunaraycu? Chayrí ¿Pabloj sutinpichu bautizacorkanquichej khaticojcunan canayquichejpaj? 14 Graciasta Diosman koni kancunamanta Crispotawan Gayotawan, chaycunallata bautizaskaymanta. 15 Ni pi niyta atinchu nokaj sutiypi bautizacuskayquichejtaka. 16 Arí, Estefanascunatapis bautizallarkanitaj. Astawanrí mana yuyarinichu ujcunata bautizaskaytaka. 17 Cristoka mana bautizajtachu cachamuwarka, manachayrí sumaj willanasta willarajta. Nitaj yachaysapa parlanaswanchu cachamuwarka Cristoj chacatanapi wañuynin ama yankhapaj khawaska cananpaj.
Cristoka Diospa atiynin yachaynintaj
18 Cristo chacatanapi nokanchejraycu wañuskanmanta willanaska chincapushaj runaspaj mana yuyayniyojmin. Nokanchej wiñay causayniyojcunapajrí chay willanaska Diospa atiyninmin. 19 Palabranpipis nin:
Noka, Dios, yachayniyojcunaj yachaynincuta tucuchisaj.
Yuyayniyojcunaj yuyaynincutataj chincachisaj, nispa.
20 Cachun yachaysapa, cachun yachachej, cachun cay pacha imasmanta unanchajpis, Diospa ñaupakenpeka manacajmin. Cay pacha runaj yachayninta Dioska mana yuyayniyoj caskanta ricucherka. 21 Cay pacha runaska tucuy yachaynincuwan Diosta mana rejsiyta aterkancuchu. Caytaj carka Diospa yuyaskanmanjina yachayninpi. Willaraskaycunejta Dios qhuyacoj munayninpi juchamanta cacharichiyta yuyarka paypi japꞌicojcunata. Cay willarayka cay pacha runaspaj mana yuyayniyojman rijchꞌacun. 22 Israelcunaka jatun ricuchinata mañancupuni. Griegocunataj sumajta mascꞌancu cay pacha imasta yachayta. 23 Astawanpis nokanchejka Cristomanta willaranchej, pay nokanchejraycu chacataska caskanmanta. Cayri israelcunapaj miscꞌana, wajcunapajtaj mana yuyayniyoj. 24 Wajyaskanta uyarejcunapajrí Cristoka Diospa atiynintaj, Diospa yachaynintajmin. Wajyaskacunaka israelcunamanta griegocunamantapis cancu. Tucuy paycunapajpis Cristoka quiquinmin, Diospa atiynin yachaynintaj. 25 Runaspajka Diospa ruwaskan mana yuyayniyojman rijchꞌacun. Astawanrí Diosmanta mana yuyayniyojman rijchꞌacojka runaspa yachaynincumanta astawan yachayniyojmin. Diosmanta mana callpayojpaj khawaska cajtaj runasmanta aswan callpayoj.
Diosta jatunchananchejpaj wajyaskas canchej
26 Reparacuychej, hermanosníy, imaynata pisi cajpaj khawaskasta Dios wajyasuskayquichejta. Cay pacha runas uqhupi pisislla yachayniyojcuna canquichej. Pisislla atiyniyoj churaskas canquichej. Pisisllataj sumaj ayllumanta canquichej. 27 Astawanpis Dioska runaspaj mana yuyayniyoj cajta ajllacorka yachaysapacunata pꞌenkachinanpaj. Dioska runaspaj mana callpayoj cajta ajllacorka callpasapacunata pꞌenkachinanpaj. 28 Cay pachamanta wajcha, khesachaska runacunata Dios ajllacorka. Mana ima cajta Dios ajllacorka chaywan ima cajta tucuchinanpaj. 29 Ajinata ruwarka, ñaupakenpi ni pi jatunchacunanpaj. 30 Kancunari mosoj causayniyoj canquichej ujchaska Cristo Jesuswan. Dios churarka Cristota cheka yachayninchej cananpaj. Cay yachaymanjina Dios nokanchejta chekanpaj khawawanchej. Cristo Diosman allinyachiwarkanchej, causayninchejta llimphucharka, wiñay causaypajtaj cacharichiwarkanchej. 31 Chayraycu ruwananchej tiyan Diospa palabranmanjina: Jatunchacuyta munaj runaka Señorllata jatunchachun ruwaskasninmantaka.