Jerusalén hermanosta yanapanapaj kolketa tantancu
9
Jerusalenpi hermanosninchejpaj chay yanapana konanchejmanta yachanquichejña. Chayraycu chay imasmanta manaña kelkamusunayquichejchu tiyan 2 munayniyquichejta yachaspaka. Kancunamantataj Macedonia hermanosman cusiywan willashani: Acayapi cajcuna kayna watamantaña cay koskata tantayta kallarinancupaj waquichiskas carkancu, nispa. Kancunamanta uyarispataj ashqhas sonkochaskas cashancu konancupaj. 3 Chaywanpis hermanosniycuta cachamuyquichej waquichiskas caskayquichejmanta chay willanay ama khasilla cananpaj. 4 Ajinaka Macedoniamanta ajllaskacuna nokawan jamuspa waquichiskasta taripasonkachej. Sichus mana waquichiskaschu cawajchej chayka, kancunapi confiacuskaycumanta pꞌenkaypi riqhuriycuman. Kancunapajpis pꞌenkay canman. 5 Chayraycu manaraj jamushaspa chay llancꞌaj-masisniycuta cachamuyta yuyarkani. Ajinamanta chay koska tantaskaña canka niskayquichejmanjina. Cꞌacha munayniyquichejmanta cananta munani, manataj allinniyquichejllapaj nitaj michꞌacuy yuyaywan koskachu canantapis.6 Caytapis niyquichej: Pisita tarpojka pisillata okharin; ashqhata tarpojrí ashqhallatataj okharin. Hermanosta yanapananpaj kojtiyquichej quiquillantaj cashan. 7 Sapa uj ñaupajta sonkonpi yuyanan tiyan. Chaymanjinataj tucuy sonkowan kochun, ama llaquicuspa nitaj camachiskajinaka, Dioska cusiywan kojta munacuskanraycu. 8 Tucuy imapi may cꞌachata yanapasunayquichejpaj Dioska atiyniyojmin. Ajinamanta tucuy imapi, tucuy imaymanapi, tucuy cꞌacha ruwanapaj sumaj callpachaskaspuni canquichej. 9 Ajinallatataj sumaj runamanta Dios palabranpi nin:
Pisichicojman mana michꞌacuspa tucuynejpi kon.
Chekan ruwaskasnin wiñaypaj canka.
Paycunamanta Diosman graciasta konkancu
10 Diosmin tarpojpaj mujuta waquichin, tꞌantatapis miqhunapaj. Ajinallatataj payka kancunapaj sumaj ruwanasta waquichin. Astawan astawanraj yapaspa chekan ruwaskasniyquichejta pay wiñachenka. 11-12 Ajinaka Diospa cꞌacha yanapayninwan khapajyachiskas, uj yuyayllamunacuywan astawan konquichej. Cay sumaj ruwanaka pisichicoj hermanosta llaquiynincupi yanapan. Astawanpis mana chayllachu. May astawanraj ashqhas graciasta Diosman konkancu. Chayraycutaj nokaycunejta Diosman gracias koska canka. 13 Chaywanpis tucuypa ñaupakencupi Cristopi japꞌicuskayquichejta sumaj willanasninta casuskayquichejtapis willarkanquichejña. Munacuywan yanapayniyquichejka ricuchin chay willaskayquichej cheka caskanta. Chaytaj ricuchin munacuypi uj yuyaylla caskayquichejta Jerusalén hermanoswan tucuy hermanoswanpis. Tucuy chay imasmanta paycunaka Diosta jatunchankancu. 14 Dios cꞌacha yanapayninta mana michꞌacuspa kosuskayquichejmanta yachaspa, munacuywan kancunapaj Diosmanta mañaconkancupuni. 15 ¡Diosman graciasta kona mana yuyay atina koskanmanta!