Dios cachasninta camachin
4
Cunanka Cristoj yanapajcunanpaj khawawaychej, Diospa pacaska yuyayninta sutꞌinchanaycupaj khawapojcunantajina ima. 2 Chaywanpis uj runa patronpaj khawapoj caspaka ruwanasninwan juntꞌaj canan tiyan. 3 Astawanrí imaynatachus kancuna chayrí runaspis khawashawaskancutaka pisipaj churani. Nitaj noka quiquiypis khawacunichu runalla caspa. 4 Reparaskaypeka ruwanasniypi juntꞌaj cani. Cayrí mana niyta munanchu tucuy imapi Diospaj juntꞌaj caskaytaka. Señorllamin khawawaytaka atin. 5 Chayraycu ama ni imatapis khawaraychejchu manaraj Señor jamushajtenka. Pay jamuspa lakhapi pacaska imasta cꞌanchayman orkhonka. Sapa uj runaj sonkonpi yuyaskantataj sutꞌinchanka. Chanta sapa uj runata ruwaskanmanjina Dios mentanka.Ama jatunchacuychu yachachejniyquimanta
6 Hermanosníy, cay imasta ricuchinatajinalla allinniyquichejpaj willayquichej. Nokamantawan Apolosmantawan yachacuychej Diospa palabranmanjinalla runasta khawayta. Ama kancunaka uj yachachejta jatunpaj khawaychejchu wajtataj manacajpajka. 7 ¿Imaynatataj yuyanqui jatunchaska cashaskayquita ujcunamanta? ¿Manachu Dios kosorka tucuy japꞌiskayquita? Sichus kosorka chayka, ama jatunchacuychu.
Corinto runas yuyancu camachejcuna caskancuta
8 ¡Kancunaka rijchꞌacunquichej sajsaskasmanña, mosoj causaypi khapajyachiskasmanñataj rijchꞌacapunquichej! ¡Mana nokaycullawan camachishanquichejña! ¡Munayman Dioswan camachishanayquichejta, nokaycupis kancunawan cusca camachiyta atinaycupaj! 9 Yuyayniymantaka, Dios churawaycu nokaycu cachasninta tucuy runasmanta khepapi wañuyman juchachaskacunajinata. Uj khawanapajjina churaska caycu tucuy pachapi, angelespaj, runaspajpis. 10 Nokaycoka Cristoraycu wampu runas caycu. Kancunarí Cristowan mosoj causayniyquichejpi yachaysapas caskayquichejta yuyanquichej. Nokaycoka pisi callpas caycu. Kancunarí callpasapas caskayquichejta yuyanquichej. Kancunata runas mentasunquichej. Nokaycutarí manacajpaj khawawaycu. 11 Cunancamataj yarkhayniyoj, chꞌaquiyniyoj, wajchajina pisi pꞌachayoj, muchuchiskas, purisquirisjina caycu. 12 Maquisniycuwan llancꞌaycu callpaycu tucucunancama. Runas insultawajtiycu, misqꞌi palabraswan cutichiycu. Nanachiwajtiycu, chꞌinmanta muchushaycu. 13 Chꞌatawajtiycu, munacuywan parlapayaycu. Runasmantaka millay kꞌopamanjina tucuycu. Ajinamin cashan nokaycupaj, Cristoj cachasninpaj, cunitancama.
Mosoj causaypi Pablo paycunaj tatancu
14 Cay imasta kelkamushayquichej mana pꞌenkacunayquichejpajchu. Manachayrí kancunata cꞌamiyta munani munaska wawasniytajina. 15 Cristopi japꞌicojcuna uqhupi chunca waranka yachachejcunayquichej canman chaypis, ni jaycꞌaj uj tatamanta aswanka capusonkachejchu. Sumaj willanasta kancunaman willaraskayraycu Cristo Jesuswan mosoj causayniyquichejpi noka tatayquichej caspa 16 nishayquichej nokajina ruwajcuna canayquichejta.
17 Nokajina ruwanayquichejpajmin Timoteota cachamorkayquichej. Payka Señorpa ruwayninpi munaska wawaymin. Paypi confiani. Paymin Cristowan ujchaska causayniymanta yuyarichisonkachej. Tucuy tantacoj hermanosmanpis tucuynejpi quiquillantataj yachachini. 18 Kancunamanta waquenka jatunchacuspa nishancu: “Pabloka mana jamonkachu”. 19 Astawanrí uskhayllata kancunaman jamusaj, Señor munajtenka. Ricusaj yachasajtaj cay jatunchacojcunamanta mana niskasnillancutachu astawanpis atiynincuta. 20 6.9 Manamin simiwan parlaspallachu ricuchinchej Diosta casuskanchejtaka,a manachayrí atiyninwan cꞌachata causacuspa. 21 ¿Maykentataj munanquichej, kancunata muchuchej jamunaytachu, chayrí sumaj munacuywan qhuyacuywan jamunaytachu?