Juchaka tꞌantaj levaduranjinamin
5
Tucuyña uyarishancu kancuna chaupipi khenchachacuy caskantaka. Cayjina khenchachacuyka mana canchu ni chay mana Diosta rejsejcuna uqhupipis. Uyaricun tatanpa warminwan uj tiyacushaskan. 2 Chaywanpis kancunaka jatunchacushanquichejraj. Aswan allin canman wañojniyojjina phuticushanayquichej pꞌenkaywan. Chay juchata ruwajtaka kancuna chaupimanta wijchꞌunayquichej carka. 3 Manapis chaypichu cashani, yuyayniypirí kancunawan cashani. Chaypipis cashaymanjina chay khenchachacojta yuyayniypi juchacharkaniña. 4 Kancuna Señor Jesuspa sutinpi tantacojtiyquichej nokapis yuyayniypi kancunawan casaj. Señorninchej Jesuspa atiyninwan 5 chay khenchachacoj kharita kancuna chaupimanta wijchꞌuychej. Ichapis Dios sakenka supay Satanás payta aychanpi muchuchinanta. Ajinapi chay muchuynejta Cristo cutimojtin espiritunta wiñay causaypaj Dios cacharichinman.6 Jatunchacunayquichejka manapuni allinchu. ¿Manachu yachanquichej pisi levaduralla tucuy tꞌanta masata pokochiskanta? Ajinamin juchaka. 7 Cunanka kꞌalata pichaychej maucꞌa causayniyquichejpa juchanta mosoj tꞌanta masajina canayquichejpaj. Kancunaj mosoj causayniyquichej mana juchayojmin canan tiyan. Nokanchejpa pascua corderonchej, Cristoka, juchanchejraycu ñacꞌaskaña cashan. 8 Ajinaka pascuanchejta ruwanachej ama maucꞌa causaypa levaduranwanchu, nitaj sajra ruwanaj levaduranwanchu. Manachayrí mosoj causayninchejpi cꞌacha sonkowan pascuanchejta ruwanachej.
Cristopi hermanosta juchancuta reparachiychej
9 Ñaupaj cutipi kelkamorkayquichej ama khenchacunawan chajrucunayquichejta. 10 Mana niytachu munarkani tucuy cay pachapi tiyacoj khenchacunamanta tꞌakacapunayquichejta. Nitaj aykecunayquichejchu tiyan michꞌasmanta, suwaspa runata ñacꞌarichejcunamanta, ruwaska dioscunata yupaychajcunamantapis. Ajina cajtenka cay pachamanta llojsipunayquichejchá canman. 11 Astawanpis kelkamorkayquichej: Ama chajrucuychejchu, “Cristowan ujchaska hermano cani”, nej juchapitaj causashaj runawanka. Sichus pay khencha, michꞌa, ruwaska dioscunata yupaychaj, sajrata parlaj, machaj, suwaspa runata ñacꞌarichej cashan chayka, paywanka ama ni miqhullaychejpischu. 12-13 Cristowan mana ujchaska runaspa juchancuta mana juchachanaychu tiyan. Diosmin paycunaj juchancuta juchachanka. Kancuna uqhupi cajcunataka kancuna juchancuta reparachinayquichej tiyan. Wijchꞌuychej chay juchallicojta kancuna chaupimanta.