Pablo yachachin pisimanta pisi
3
Nokapis, hermanosníy, mana parlayta aterkayquichejchu Santo Espíritoj pusaskacunanmanjinaka. Manachayrí aycha runasmanjinalla parlanay carka mosoj causayniyquichejpi juchꞌuy wawasllaraj caskayquichejraycu. 2 Kancunawan cashaspa yachacherkayquichej pisimanta pisi. Imaynatachus wawitas lechellata japꞌincu, ajinallataj kancunapis carkanquichej. Jatuchej yachachiycunata sonkoyquichejpi japꞌicuspa sayachiyta mana aterkanquichejchu. Nitaj cunanpis atishanquichejrajchu, 3 aychaj camachiskacunallan caskayquichejraycu. Kancuna chaupipi cashan envidiawan phiñacuywan. Cayka ricuchin aycha runas caskayquichejta, manataj Espíritoj pusaskacunanjinachu causaskayquichejta. 4 Waquin kancuna chaupipi: “Nokaka Pabloj tꞌakanmanta cani”, chayrí: “Nokataj Apolospa tꞌakanmanta cani”, nincu. Chayka ricuchin cay pacha runasjinallaraj caskayquichejta.Dioswan cusca llancꞌajcuna
5 Chayraycu ¿imataj Pabloka? ¿Imataj Apolospis? Diospa yanapajcunallan caycu. Nokaycunejta Cristopi japꞌicorkanquichej. Sapa ujpis Dios churawaskaycumanjina ruwaycu. 6 Noka Diospa niskasninta sonkoyquichejpi tarporkani. Apolostaj uj karpajjina astawan yachachisorkachej. Diosllamin causayniyquichejpi niskanta wiñacherka. 7 Ajinaka tarpojpis karpajpis mana imachu. Astawanrí wiñachej Dioslla curajka. 8 Cunanka tarpojpis karpajpis uj yuyaylla caycu. Sapa ujpis japꞌinaycuta llancꞌaskaycumanjina japꞌisajcu. 9 Dios churawaycu paywan cusca llancꞌanaycupaj. Kancunataj Diospa chajran canquichej.
Diospa wasichaynin
Diospa wasichaynin canquichej. 10 Dios kowarka atiyninta uj sumaj yachachiska wasichaj canaypaj. Sumaj willanasta kancunaman ñaupajta willaraskaywan cimientota churarkani. Chaymantaj waj yachachej wasichajjina ruwashan. Astawanrí sapa uj sumajta khawacuchun imaynatachus cimientoj patanpi wasichashaskanta. 11 Cay wasej cimientonka ujlla, Jesucristo. Waj cimientota mosoj causaypaj mana pipis churayta atinchu. 12 Diospa wasinta ruwananpaj uj wasichajka wiñay sayachejcunata chayrí pisi ratullapaj sayachejcunatapis ajllayta atin. Caycunajina canman: Kori, kolke, valorniyoj rumicitus, cꞌaspi, chhala, ichhupis. 13 Sapa wasichajpa ruwaskan sutꞌi ricuchiska canan tiyan. Allin ruwaskanpis chayrí mana allin ruwaskanpis, Cristoj cutimunan pꞌunchaypi ninapi sutꞌinchaconka. Ninamin ricuchenka sapa wasichajpa ruwaskan imaynachus caskanta. 14 Sichus paypa ruwaskan ninata muchun chayka, Diosmanta japꞌenka. 15 Sichus paypa ruwaskan ruphaycunman chayka, mana japꞌenkachu. Quiquin wasichajrí mana chincaponkachu. Manachayrí nina chaupintajina cachariska canka.
16 ¿Manachu yachanquichej Diospa wasin caskayquichejta, Diospa Espirituntaj kancunapi tiyacuskanta? 17 Sichus uj runa Diospa wasinta tucuchinman chayka, paytapis Dioska tucuchillankataj. Diospa wasenka payman tꞌakaskamin. Chaymin kancuna canquichej.
Kancuna Cristojta canquichej
18 Ama ni pipis payllataj pantachicuchunchu. Kancuna chaupipi cay pachapi yachayniyoj caskanta yuyajka mana yuyayniyojman tucuchun. Ajinaman tucuchun cheka yachayniyoj cananpaj. 19 Cay pachaj yachaynenka Diospajka mana yuyayniyojmin. Palabranpipis nin: “Dios yachaysapa runasta japꞌin paycunaj quiquin pantachej yachaynincupi trampawanjina”. 20 Nintaj: “Señor yachan yachaysapacunaj tanteyacuskancoka yankha caskanta”. 21 Chayraycu ama ni pi runaspi confiacuchunchu tucuymin kancunajta caskanraycu. 22 Cachun Pablo, Apolos, Pedro, cay pacha, causay, wañuy, cunanpacha caj, jamojpacha cajpis, tucuynin kancunajtamin. 23 Kancunari Cristojta canquichej, Cristotaj Diospata.