Jesucristonejta allinyachiskas canchej Diosman
5
Cunanka Diospi japꞌicuskanchejraycu chekanpaj khawaskas caspa payman allinyachiskas canchej Señorninchej Jesucristonejta. 2 Ajinapi cꞌacha yanapayninwan causacojcuna canchej. Paynejtataj cusicunchej atiyniyoj Dioswan cusca wiñaypaj cacunanchejmanta. 3 Mana chayllachu astawanraj llaquiycunapi cusicunchejpis yachaspa llaquiyka mana saycꞌuspa muchuyta yachachiwaskanchejta. 4 Ajinata muchuskanchejtaj ricuchin paypi japꞌicuspa callpayoj caskanchejta. Ajina callpachaskastaj Diospi confiacunchej jamoj imaspaj yanapanawanchejpaj. 5 Ajinata confiacuspataj yachanchej Dios niskanta juntꞌananta. Espirituntataj kowarkanchej sonkonchej munacuyninwan juntꞌa cananpaj. Chayraycu ajinata Diospi confiacunchej. 6 Ajinapimin mana callpayoj cashajtinchejpis Diospa ajllaskan pꞌunchaypi Cristoka wañorka sajra ruwajcunapaj. 7 Chekatapuni yakha mana pipis wañunmanchu uj chekan ruwajpajka. Uj cꞌacha runapajka ichapis mayken causayninta konman. 8 Cristorí juchasapasllaraj cashajtinchejpis wañupuwarkanchej. Ajinapi Dioska munacuyninta nokanchejman chekata ricuchiwarkanchej. ¡Chayjina munacuyka Diospallata! 9 Chayraycu cunan Cristoj wañuyninnejta chekanpaj khawaskas canchej. May astawanraj Diospa cꞌajaj phiñacuyninmantapis cachariskas casunchej. 10 Payta mana casuspa enemigonjina cashajtinchej Wawanpa wañuyninnejta Dios allinyachicuwarkanchej. Ajina cajtenka may astawanraj causarimoj Cristowan ujchaska wiñaypaj cachariskas causasunchej. 11 Mana chayllachu astawanraj Diospipis mayta cusicushanchej Señorninchej Jesucristonejta, cunan Diosman wiñaypaj allinyachiskas caskanchejraycu.Adannejta tucuy wañuncu
12 Yachanchejjina uj runanejta jucha cay pachaman yaycumorka. Juchanejtataj tucuy wañuncu. Ajinamanta tucuy runaspaj wañuy jamun tucuy runas juchallicuskancuraycu. 13 Ajinapi manaraj Moisespa camachiskasnin koska cashajtin juchaka cay pachapi carkapuniñamin. Manachus camachiskas tiyan chayka, runaka mana juchachaskachu. 14 Astawanrí Adanmantapacha Moisescama tucuy runas wañorkancu mana Adanjina juchallicojcunapis. [Payka Diospa contranpi churacorka Dios payman niskanta mana casuspa.]a Adanka ñaupaj runa caskanraycu tucuy cay pacha runaspa curajnincu cashan. Payka Diospa cachamuskan Runaman rijchꞌacun. [Cristorí mosoj causayniyojcunaj Curajnincu cashan.]b
15 Paynejta Dioska ashqhasman munacuyninta ricucherka. Astawanka aswan jatunmin Diospa cꞌacha yanapaynenka Adanpa juchanmanta niskaka. Chay mana casuskan juchamanta tucuy runas wañuncu. Diosrí may astawanraj cꞌacha yanapayninta mana michꞌacuspa kowarkanchej Jesucristonejllata. 16 Nitaj chay ujpa juchanjinachu Diospa koskanka carka. Chay ujpa juchanmanta juchachayka jamun nokanchejpaj. Astawanpis may ashqha juchasta khechuspa Dioska cꞌacha yanapayninnejta chekanpaj khawawanchej. 17 Adannejtaka, paypa mana casuskanraycu, tucuy wañuncu. May astawanraj Dioska munacuyninwan chekan cayta korillan. Chay chekan cayta japꞌejcunari Jesucristonejllata japꞌincu. Paywan cuscataj jatunchaska wiñaypaj causankancu.
Jesucristowan ujchaska wiñaypaj causanchej
18 Cunanka, Adanpa mana casuskanwan tucuy juchachaskas carkancu. Ajinallataj Cristoj casuskanwanka tucuypaj chekan cayka wiñaypajmin. 19 Imaynachus Adanpa mana casuskannejtaka tucuy juchayojcuna carkancu, ajinallataj Cristoj casuskannejta ashqhas chekan ruwajcuna cankancu. 20 [Dios camachiskasninpi munayninta ricucherka. Runasrí camachiskasta mana casuspa]c astawanraj juchallicorkancu. Aswan jucha cajtintaj may astawanraj Diospa cꞌacha yanapaynin runasman chayamorka. 21 Ajinapi imaynatachus juchanejta runas wañorkancu chaymanjinallatajmin cꞌacha yanapayninnejta chekanpaj Dioska khawawanchej. Señorninchej Jesucristonejtataj wiñay causayta kowanchej.