3 Yachanquichejjina Cristopi japꞌicuspa bautismonejta ricucherkanchej Cristowan ujchaska caskanchejta. Cayka, wañuyninpi ujchacuymin. 4 Wañuskajinataj paywan cusca bautismonejta pꞌampachicorkanchej. Imaynatachus Dios Tataka jatun atiyninwan Cristota causarichimorka, ajinallataj nokanchejwanpis carka mosoj causaypi purinanchejpaj. 5 Imaynatachus Cristo wañorka, ajinallatataj juchapaj wañorkanchej paywan ujchacuspaka. Chayraycu chekatapuni causarimuyninpijinallataj ujchacusunchej. 6 Cayta yachanchej: Ñaupa causayninchejka Cristowan cusca wañuchiskajinañamin carka. Ajinapi juchaj atiynin manaña cuerponchejta camachinchu. Juchaj atiynenka tucuchiskamin manaña munayninchejta ruwananchejpaj. 7 Sichus runa wañunña chayka, juchamanta cachariskamin. 8 Yachanchej maucꞌa causayninchejka Cristowan cusca wañuska caskanta. Chayraycu creenchej paywan cusca mosoj causayniyoj caskanchejta. 9 Yachanchejtaj Cristo wañuymanta causarimuspaña ni jaycꞌaj wañonkachu. Wañuypa atiyninmantaka wiñaypaj cachariskaña. 10 Juchanchejpaj Cristoka uj cutillata wañorka tucuy juchata atipananpaj. Cunanrí Diospaj causashan. 11 Ajinallataj kancunapis juchapaj wañuskajina khawacuychej juchamanta tꞌakaskaña caskayquichejraycu. Cristo Jesuswan ujchaskataj Diospaj causaychej.

12 Chayraycu amaña jucha camachichunchu, sajra camachejjina, cay pacha causayniyquichejtaka. Amañataj juchata casuspa sajra munayninmanjina ruwaychejchu. 13 Niñataj juchaj yuyaskanmanjina cuerpoyquichejwan sajrata ruwaychejchu. Manachayrí wañuskamanta causarimuskasjina tucuy causayniyquichejta Diosman jaywacuychej. Cuerpoyquichejtapis payman jaywacuychej chekanta ruwanayquichejpaj. 14 Manañamin juchaj camachisninchu canquichej, manaña camachiskasta ruwaynejta chekanpaj khawaska yuyaskayquichejraycu. Astawanpis Dios cꞌacha yanapayninnejta chekan runaspaj khawasunquichej.

15 Cunanka, manaña camachiskasta ruwayllawanchu causanchej, manachayrí Dios cꞌachata yanapawaskanchejmanjina. ¿Chayraycuchu juchallicusun? ¡Ni imaynamanta! 16 Cayta sumajta yachanquichejjina: Patronman casunayquichejpaj churacuspaka payta casuspataj camachisnin canquichej. Juchata camachejtajina casuspaka casuskayquichejmanta wañunquichej. Diosta casuspataj chekanta causanquichej. 17 Ñaupajpi juchaj camachisnin carkanquichej. Cunanrí, gracias Diosman, tucuy sonkowan cheka yachachinata casorkanquichejña yachachiska caskayquichejmanjina. 18 Juchamanta cachariskas caspataj cunanka chekan ruwanaman camachis canquichej. 19 Caytaka cay pacha causayninchejmanjina camachismanta quiquinchanawan parlani kancunapaj aswan sutꞌilla cananpaj. Ñaupajpi millay imasman mana Diosta casuymantaj cuerpoyquichejta camachisjina jaywacorkanquichej mana casojcunaman tucunayquichejcama. Cunanka ajinallatataj camachisjina chekan ruwanaman cuerpoyquichejta jaywacuychej Diosman tꞌakaska canayquichejpaj.

20 Ñaupajpi juchaj camachisnin cashaspaka libre carkanquichej chekan ruwayman churacuymantaka. 21 Chay ruwaskasniyquichej ¿imata kancunapaj ruwarkarí? Ni ima allintapis. Astawanrí cunanka pꞌenkachisunquichej. Chay ruwaskasmantataj runaka wiñaypaj wañun. 22 Cunanrí juchamanta cacharichiskaña canquichej Diospa camachisnin canayquichejpaj. Payman tꞌakaska llimphu causayniyoj caspataj cꞌacha ruwanasta ruwanquichej. Chay ruwanasmantari runaka wiñaypaj causan. 23 Runaka juchamanta pagotajinamin wiñay wañuyta japꞌenka. Diosrí cꞌacha munacuywan Señorninchej Cristo Jesusnejta wiñay causayta kowanchej.