Abraham Diospi japꞌicuskannejta chekanpaj khawaska
4
Runamanjina unay tataycu Abrahammanta chay quiquin yachachinallatataj Diospa palabranpi willawanchej. 2 Abrahamka ruwaskasninnejtachus chekanpaj khawaska carka chayka, jatunchacunman carka. Diospa ñaupakenpirí mana jatunchacuyta aterkachu. 3 Palabranpi Abrahammanta nin: “Pay Diospi japꞌicorka. Diostaj japꞌicuskanraycu payta chekan runapaj khawarka”, nispa. 4 Llancꞌaj runamanrí pagonka mana regalopaj khawaskachu. Manachayrí llancꞌaskanmanta pagonta japꞌinanpuni. 5 Astawanpis uj runa ni imata ruwaspapis Diospi japꞌicuspaka chekanpaj khawaskamin. Diostaj juchasapataka paypi japꞌicojtin juchasninta khechuspa chekanpaj khawan. Ajinata chekanchaj Diospi japꞌicuspa runaka chekanpaj khawaska.6 Chaywanpis unay camachejniycu Davidpis kelkarka cusiska runamanta. Chay cusiska runata Dios chekanpaj khawan paypi japꞌicuskanraycu manataj ruwaskanraycuchu. 7 Palabranpi nin:
Runas cusicuyniyoj cancu Dios sajra ruwaskasnincuta khechuspa pampachajtin, juchasnincutaj manaña cajtin.
8 Runaka cusicuyniyojmin juchasninta Señorninchej manaña juchachananpaj japꞌejtin.
9 Chayjina cusicuyniyojcuna mana israelcunallamantachu cancu, manachayrí waj llajtayojcunamantapis callancutaj. Nerkanchejña paypi japꞌicojtin Abrahamtaka Dios chekanpaj khawaskanta. 10 Ajinaka ¿imayna cashajtintaj chekanpaj khawaska carkarí? ¿Señalpaj cuerponpi circuncidaska cashajtinchu chayrí manaraj chayjina señalaska cashajtinchu? Dios paytá chekanpaj khawarka manaraj chayjina señalaska cashajtin. 11 Manaraj cuerponpi señalaska cashaspa sonkonwan Diospi japꞌicorka. Chaymantaña Dios camacherka Abrahamta cuerponpi señalaska cananta. Chayka carka ricuchinanpaj paypi japꞌicuskannejta chekanpaj khawaska caskanta. Ajinapi ñaupa tatancujina cashan Diospi japꞌicoj waj llajtayojcunapajpis. Cuerposnincupi mana chayjina señalaska cashajtincupis sonkowan japꞌicojtincu Dios paycunata chekanpaj khawan. 12 Diospi japꞌicoj israelcunajtapis tatallancutajmin. Chaywanpis paycunaka mana chay señalniyojllachu cancu. Manachayrí Abraham Diospi japꞌicuskanmanjina japꞌicuncu. Payka manaraj chay señalniyoj cashaspa chekanpaj khawaska cananpaj Diospi japꞌicorka.
Abrahamman Dios sumaj niskanta juntꞌarka
13 Dioska sumaj niskanta Abrahamman mirayninmanpis willarka: “Kanman cay pachata kopuskayqui”, nispa. Caytaka mana camachiskasta casuskanraycuchu willarka. Astawanpis japꞌicuskannejta chekanpaj khawaskanraycu chay sumaj niskanta willarka. 14 Ajina cajtenka sichus camachiskasta casuskancunejllata sumaj niskanta japꞌincuman chayka, Diospi japꞌicuskancu khasilla, sumaj niskanpis manacaj canman. 15 Sitajchus camachiskas mana canchu chayka, ni pi juchachaskachu canman mana casuskanmantaka. [Astawanrí Dios camachiskasninta kowarkanchej. Mana camachiskasninta casojmantaj Diospa cꞌajaj phiñacuynin jamun.]a Ajinapi camachiskasmantaka Diospa phiñacuynillan jamun jucharaycu. 16 [Abrahamri camachiskasta casuyta mana aterkachu.]b Astawanpis Diospi japꞌicuskanraycu Dios sumaj niskanta paypaj churarka. Ajinata ruwarka sumajta yachananchejpaj cꞌacha yanapayninnejllata sumaj niskanta nokanchejpaj juntꞌananta. Tucuy Abrahampa mirayninpajpis sumaj niskanta Dios juntꞌankapuni Abrahamjina Diospi japꞌicojtincu. Camachiskasninpi cajcunapajpis tucuy nokanchejpajpis juntꞌanka. Abrahamka tatanchejmin Diospi japꞌicuskanchejraycu. 17 Dios palabranpipis payman nin: “Ashqha llajtaspa tatancupaj kanta churarkayqui”, nispa. Diospa ñaupakenpi Abrahamka sumaj niskanpi japꞌicorka. Chay atiyniyoj Dioska wañuskacunata causarichimun. Yuyaskanmanjinataj parlan mana ruwaska imasmantapis cunan cashaskantajina.
18 Ni ima suyananpaj cashajtin Abrahamka Diospi japꞌicuspa suyarka. Ajinamanta sumaj niskanmanjina ashqha llajtaspa tatancupaj tucorka. Diospa sumaj niskan carka: “Mirayniyqui mana yupay atina canka”.
19 Abrahamka pachaj watayojjinaña carka. Cuerpontapis wañuskapajña khawacorka. Sara, warminpis, ashqha watasniyoj caspa manaña wawata rejsejjinachu carka. Chaywanpis Abraham sonkonwan Diospi japꞌicuyninpi mana pisiyacorkachu. 20 Sumaj niskanmantapis mana iscayrayarkachu. Astawanpis Diospi japꞌicuyninpi astawan callpachacorka. Ajinapi Diosta jatuncharka, 21 chekata yachaspa Dioska atiyniyoj caskanta sumaj niskanta juntꞌananpaj. 22 Dioska payta chekanpaj khawarka ajinata japꞌicuskanraycu.
Diospi japꞌicuskanchejnejta chekanpaj khawaska canchej
23 Manataj Abrahamllapajchu kelkaska carka Dios payta chekanpaj khawaskantaka. 24 Manachayrí nokanchej tucuy paypi japꞌicojcunapajpis nillantaj. Ajinapi cunanka Diospi japꞌicuspa chekanpaj khawaskas casunchej. Paymin Señorninchej Jesusta wañuymanta causarichimorka. 25 Juchasninchejraycu Dios payta wañuyman jaywarka. Chekanpaj khawaskas cananchejpajtaj causarichimorka.