Ajllaska runasninpis Diosta mana casuncuchu
3
Ajina cajtenka ¿ima sumajtaj canman israel runa cayrí? Chayrí ¿ima sumajtaj canman chay camachiskamanjina señalaska cayrí? 2 Tucuy imaymanapi aswan sumaj cashan. Astawan caskanka israelcunaman Dios niskasninta koskanmin. 3 Yachanchej waquin paycunamanta mana casuskancuta. Ni chaywanpis nisunmanchu Dioska niskasninta mana juntꞌanantaka. 4 Paycunaj mana juntꞌaskancoka ni jaycꞌaj jarcꞌanchu niskasninta juntꞌananta. Tucuy runas llulla cashajtincupis Dioska chekapunimin. Quiquillantataj palabranpi nin:Niskasniyquipi chekan caskayquita reparankancu.
Tucuypa ñaupakencupi chekan ricuchiska canqui.
5 Chaymantarí runamanjina parlaspa nisunman: Sichus juchanchejnejta Dios chekan caskanta ricuchisunman chayka, Dioska juchanchejmanta phiñacojtin ¿mana chekanchu? 6 Dioska chekanpunimin. Jakay juicio pꞌunchaypi tucuy runas Diospa ñaupakenman riqhurinancu tiyan. Dios chekan caspalla sutꞌinchayta atin. Ajinalla sapa uj runata juchachanapaj caskanta chayrí chekan caskanta nenka.
7 Cunan, runaka ninmanchá: “Sichus llullacuskaywan Diosta jatunchayman cheka caskantataj ricuchiyman chayka ¿imaraycutaj juchachaska canirí?” nispa. 8 Cayjinata nillanmantaj: “Sajrata ruwanachej allin caj jamunanpaj”. Waquin sajra parlaywan chayta nincu nokanchejpis nisunman carkajina. Chekatapuni chayjina parlajcunaka juchachaskas canancu tiyan.
Tucuy runas juchachaskas cancu
9 Cunanka ¿israelcunachu chayrí waj llajtayojcunachu aswan sumaj cancu? Tucuynin quiquin cancu. Sutꞌita ricucherkaniña israelcunapis waj llajtayojcunapis tucuynincu juchachaskas caskancuta. 10 Quiquillantataj Dios palabranpi nin:
Ni ujpis chekan runaka canchu.
11 Ni uj entiendenchu; ni uj Diosta mascꞌanchu.
12 Tucuy payta sakeporkancu.
Manacajman tucorkancu.
Ni uj canchu allin cajta ruwajka, ni ujllapis.
13 [Sajra sonkoncumanta millay parlanas llojsimun.]a
Simincuwan parlancu runasta pantachinancupaj.
Niskasnincu runasta nanachin catarej qhaniskanjina.
14 Simincoka maldicionwan jaya palabraswan juntꞌa.
15 Uskhayta rincu runasta wañuchinancupaj.
16 Puriskancumanta llaquiylla, nacꞌariylla jamun.
17 Mana yachancuchu allin causaypi puriyta.
18 Yuyaynincupeka Diosta manchachicuyllapis mana canchu.
19 Cayta yachallanchejtaj: Camachiskasta rejsejcunaman tucuy kelkaska chayjinata nin tucuy chꞌinyachiska canancupaj. Ajinaka tucuy cay pachapi cajcuna Diospa ñaupakenpi juchachaskas cancu. 20 Chayraycu camachiskasta ruwaskannejta ni pita Dios chekanpaj khawanchu. Astawanpis camachiskaska juchata rejsichinallawanchejpaj koska carka.
Paypi japꞌicojta chekanpaj Dios khawan cꞌacha yanapayninnejta
21 Cunanrí Dioska ricuchinña imaynatachus mana camachiskasta ruwaskancuraycullachu runasta chekanpaj khawananta. Chayta willan Moisespa kelkaskanpi Diospa unay willajcunanpa kelkaskasnincupipis. 22 Jesucristopi tucuy japꞌicojcunata chekanpaj Dios khawan japꞌicuskancunejllata, tucuyta quiquinta khawaspa. 23 Tucuymin juchallicorkancu. Diospa cꞌacha munayninmanta carunchacuspataj ni pi paymanjina causanchu. Nitaj pipis chekan cayta taripanchu. 24 Diosrí cꞌachata yanapawarkanchej khasillamanta nokanchejta chekanpaj khawaspa Cristo Jesús juchamanta cacharichiwaskanchejraycu. 25 Tucuypa ñaupakencupi payta Dios churarka juchanchejraycu wañunanpaj, yawarninta jichꞌaspa. Wañunanchejmanta Cristo wañuskanta japꞌicojtinchej juchanchejmanta Dios llimphuchawanchej. Ajinapi Cristo Jesuspa wañuynin ricuchin Dioska chekanpuni caskanta. Ñaupa tiempospeka qhuyacuyninpi manarajmin juchata cꞌajaj phiñacuyninwan jasutꞌerkarajchu. 26 Astawanpis cunancama suyarka chekan caskanta ricuchinanpaj. Cunantaj Dioska chekan caskanta ricuchin Cristo Jesús juchanchejraycu wañuskanwan. Ricuchillantaj Jesuspi japꞌicojta chekan runapaj khawaj caskanta.
Manamin ruwaskannejtachu runaka chekanpaj khawaska
27 Ajinaka ni pipis atinchu chekan caymanta jatunchacuyta. Chekan cayka mana runaj ruwaskannejtachu, manachayrí Diospi japꞌicuskannejllata. Chayraycu jatunchacuyka manacajllañamin. 28 Reparanchej, runaka Diospi japꞌicuskannejllatamin chekanpaj khawaska caskanta manataj camachiskasmanjina ruwaskanraycuchu. 29 Chaywanpis Dioska mana israelcunaj Diosnillancuchu. Waj llajtayojcunajtapis Diosnillancutajmin. 30 Dioska ujllamin. Israelcunata chekanpaj khawan paypi japꞌicuskancunejta. Quiquillantataj waj llajtayojcunatapis chekanpaj khawan paypi japꞌicuskancunejta. 31 Ajinaka ¿japꞌicuskanchejnejta tucuchinayanchejchu Diospa camachiskasninta? ¡Ni imaynamantapis! Aswanpis sinchꞌita sayachinchej camachiskasta.