2 Pabloka hebreo parlaynincupi paycunaman parlarerka. Chayta uyarispa paycunaka astawanraj chꞌinyacorkancu. Chanta Pabloka nerka:

3 —Nokapis Diospa ajllaskan israelcunamanta cani. Cilicia jallpꞌa Tarso llajtapi naceska, cay Jerusalén llajtapi uywaskataj. Chaywanpis sumaj yachaj wirakochi Gamaliel escuelanpi yachachiwarka Moisés unay tatasninchejta camachiskasninmanjina. Cunan tucuy kancuna Diosta casuyta munashanquichej, ajinallatataj nokapis tucuy sonkoywan casuyta munanipuni. 4 Jesucristoj ñanninpi purejcunata mayta ñacꞌarichej cani wañuchinaycama. Kharista warmistawan wataycuchispa carcelman churaycuchej cani. 5 Yupaychana-wasimanta curaj runapis tucuy curajcunapis nokamanta sutꞌita yachancu willanancupaj. Paycuna cartasta kelkarkancu Damasco llajtapi israel-masisninchejman Jesucristopi japꞌicojcunata apamunaypaj. Jakaypi cajcunatataj wataskasta Jerusalenman apamoj risharkani ñacꞌarichiskas canancupaj.

6 ‘Nokaka Damasco llajtaman rishaspa ñapis chayman kayllasharkaniña. Chaypi chaupi pꞌunchaytajinataj ujllata uj sinchꞌi cꞌanchay janaj pachamanta cꞌancharispa nokata muyuycuwarka. 7 Nokataj pampaman chokacamorkani. Chaymanta uj parlapayawajta uyarerkani: “Saulo, Saulo ¿imaraycutaj ñacꞌarichinawayquipaj khatiycachawanquirí?” nispa. 8 Nokataj tapuspa nerkani: “¿Kanchu cawaj, Señor Dios?” nispa. Cutichispa niwarka: “Kan khatiycachashanqui, chay cani, Nazaret llajtayoj Jesús”, nispa. 9 Nokawan cajcunaka chay sinchꞌi cꞌanchayta ricorkancu. Chay parlawaskantarí mana uyarerkancuchu. 10 Nokataj tapurispa nerkani: “Tucuy atiyniyoj Señor, ¿imatataj ruwasajrí?” nispa. Señor Jesustaj niwarka: “Cunanpacha jataricuy, Damasco llajtaman riy. Chaypitaj uj runa nisonka Diospa tucuy munaskanta ruwanayquita”, nispa. 11 Chay ancha sinchꞌi cꞌanchaymanta manaña ricuyta aterkanichu. Chayraycu nokawan cajcuna maquiymanta aysaspa Damasco llajtaman pusawarkancu.

12 ‘Chaypi carka uj runa, Ananías sutiyoj. Payka Diospa camachiskasninta chekanta casoj. Tucuy chaypi tiyacoj israelcunataj payta sumaj runapaj khawaj cancu. 13 Chay Ananías nokata watucoj jamuspa niwarka: “Hermano Saulo, thañicuspa ricullayña”, nispa. Nokari chaypachita watejmanta ñawiyoj capuspa ricorkani, paytapis ricullarkanitaj. 14 Paytaj niwarka: “Unay tatasninchejpa Diosnincu kanta unayña ajllacusorka munayninta yachanayquipaj. Chekanta ruwaj camachin Jesusta ricunayquipaj, parlaskantapis uyarinayquipajtaj ajllacusorka. 15 Chayraycu kanka ricuskayquita uyariskayquitapis tucuy runasman willanayqui tiyan. 16 Cunanrí ni ima jarcꞌasunquichu. Cunanpacha Jesús tucuy atiyniyoj caskanta tucuy sonkowan japꞌicuspa bautizacuy juchasniyqui llimphuchaskas canancupaj”, nispa.

17 ‘Ajinataj nokaka Jerusalén llajtaman cutimporkani. Yupaychana-wasimantaj yaycuytawan Diosmanta mañacushaspa, uj moskoypijina riqhurirparkani. 18 Jesustataj niwashajta ricorkani: “Uskhayta cunanpacha Jerusalenmanta ripuy. Caypi tiyacojcunaka nokamanta willaskayquita manamin japꞌiconkancuchu”, nispa. 19 Nokataj nerkani: “Señor Jesusníy, kanpi japꞌicojcunata carcelpi wiskꞌachej caskayta sumajta yachancu, tantacuna-wasipi jasutꞌichej caskaytapis. 20 Estebanta wañuchishajtincu chaypi noka quiquiy casharkani. Wañuchiska cananpajpis paycunawan cusca yuyaysicorkani. Chaywanpis nokaka wañuchejcunaj ponchosnincuta wañuchinancucama khawaporkani”, nispa. 21 Señortaj niwarka: “Riy, noka caru waj llajtayojcunamanmin cachaskayquiraycu”, —nispa.

22 Waj llajtayojcunaman ninancamaka chay israelcuna Pablota uyarishallarkancu. Chanta khapariyta kallarerkancu:

—¡Wañuchun cay runaka! ¡Manamin causanapajjinachu! —nispa.

23 Paycunaka astawan sinchꞌiwan khaparerkancu. Manchayta phiñacuskas caskancuta ricuchinancupaj pꞌachasnincuta chokararkancu. Jallpꞌata khallaspataj wayrachiyta kallarerkancu Pablo Diospa contranta ruwashaskanta yuyaspa. 24 Chayraycu curaj camachejka Pablota soldadocunaj cuartelnincu uqhuman pusaycunancuta camacherka. Nerkataj jasutꞌinancuta yachanancupaj imamantachus contranpi runas khapariskancuta. 25 Payta jasutꞌinancupaj wataycojtinña Pabloka chaypi caj camachejta nerka:

—¿Manaraj juchachaspa uj romano runata aticullanchu jasutꞌinayquichejka?

26 Camachejka chayta uyariytawan curajninman willamorka:

—Sumajta reparay. ¿Imatataj ruwashanquirí? Cay runaka romanomin, —nispa.

27 Chayraycu curajka Pabloman kayllaycuspa nerka:

—Kanka ¿romano runachu canqui?

Paytaj cuticherka:

—Arí, romano runa cani, —nispa.

28 Curajtaj nerka:

—Romano llajtayoj canaypaj nokaka ashqha kolketa korkani, —nispa.

Pablotaj nerka:

—Nokarí tatasniymantapachapuni romano cani, —nispa.

29 Ajinapi jasutꞌinayashajcunaka chaypachita payta manaña imanarkancuchu. Curaj camachejpis manchachicorka Pablota wataycuchiskanmanta, romano runa caskanta yachaspa.

30 Curaj camachejka kꞌayantin Pablota phascararka. Paytaj munarka sutꞌita yachayta imamantachus israelcuna Pablota juchachaskancuta. Ajinamanta camacherka yupaychana-wasimanta curajcunata tucuy curajcunatawan jatun tantacuyman tantacunancuta. Chanta Pablota uraman pusachimuspa paycunaj ñaupakencuman sayacherka.