Pablo Jerusalén llajtaman rin
21
Hermanoswan ñacꞌayta cacharinacapuspa Cos sutiyoj llajtaman barcopi chekanta rerkaycu. Khepan pꞌunchaytaj Rodas llajtaman chayaspa rerkaycu Pátara llajtaman. 2 Jakaypitaj Fenicia jallpꞌaman rishaj barcota tariparkaycu. Chay barcoman yaycuspataj mama kochanejta riporkaycu. 3 Riskaycupitaj Chipre jallpꞌata ricorkaycu. Chayta pasaytawan llokꞌe ladopijina sakeporkaycu. Chaymantataj Siria jallpꞌaman chayarkaycu. Barcoka carganta sakenan carka. Chayraycu Tiro llajtaman yaycorkaycu. 4 Chaypitaj Jesuspi japꞌicojcunata tarispa paycunawan kanchis pꞌunchayta khepacorkaycu. Paycunatataj Santo Espíritu atiyninwan reparacherka Pablota yuyaychanancupaj ama Jerusalén llajtaman rinanta. 5 Chay pꞌunchaycuna pasajtintaj llojsipusharkaycu. Tucuynin hermanostaj kharis warmis wawasnintin llajta jawacama pusarpariwarkaycu. Kocha cantopi konkoricuspa Diosmanta mañacuytawan 6 cacharparinacorkaycutaj. Chaymanta abrazanacuspa nokaycu barcoman yaycorkaycu. Paycunataj wasisnincuman cutiporkancu. 7 Nokaycurí Tiro llajtamanta Tolemaida llajtaman chayarkaycu. Ajinapi yacusnejta purinaycoka tucucorka. Chay llajtapi uraycuytawantaj tantaska hermanosta napaycuspa uj pꞌunchayta paycunawan khepacorkaycu. 8 Kꞌayantintaj chaymanta llojsispa Cesarea llajtaman rerkaycu. Chaypitaj Felipej wasinman chayaspa paywan caricorkaycu. Payka sumaj willanasta willaj carka. Unayña Jerusalenpi kanchis ajllaskacunamanta ujnin carka, Diospa tantacoj wawasninta yanapananpaj churaska. 9 Paypata carkancu tawa ususisnin, mana kharí rejsejcuna. Paycunataj Diospa niskanta sutꞌinchaj cancu. 10 Nokaycurí chaypi ashqha pꞌunchaycunataña khepacorkaycu. Ajinallaman uj runa, Agabo sutiyoj, Judea jallpꞌamanta chayamorka. Payka Diospa willajnin carka. 11 Nokaycutataj watucoj jamorka. Pabloj chumpinta okharispataj maquisninta chaquisnintawan wataycucorka. Nerkataj:
—Santo Espíritu nin: “Cay chumpiyojta ajinata israelcuna Jerusalén llajtapi watayconkancu. Chaymantataj waj llajtayojcunaman jaywayconkancu”, —nispa.
12 Chay imasta uyariytawantaj nokaycupis chay llajtayojcunapis Pablota maytapuni nerkaycu:
—¿Imaraycutaj wakaspa sonkoyta nanachishawanquichejrí? Nokaka mana wataycuska canallaypajchu waquichiska cani. Manachayrí Jerusalenpi Señor Jesusraycu wañunaypajpis waquichiska cani, —nispa.
14 Manaña jarcꞌayta atispataj sakellarkaycuña. Nerkaycutaj:
—Tucuy atiyniyoj Señor Diospa munaynin ruwaska cachun, —nispa.
15 Chay pꞌunchaycunaj khepanta tucuy imata waquichicuspa Jerusalenman rinaycupaj llojserkaycu. 16 Cesarea llajtayoj hermanospis nokaycuwan rerkancu. Pusawarkaycutaj Mnasonpa wasinman chayacunaycupaj. Payka Chipre jallpꞌamanta unay hermanoñataj carka.
Pablo Jacobota watucamun
17 Jerusalenman chayajtiycutaj hermanoska cusiywan niwarkaycu:
—Walejta jamunquichej, —nispa.
18 Kꞌayantintaj Pablowan nokaycoka Jacobota watucoj rerkaycu. Chaypi hermanosmanta tucuy curajcunapis carkancu. 19 Paycunata napaycuspataj Pablo tucuyninta willarka. Nerka imaynatachus paynejta Dios ruwaskanta waj llajtayojcuna uqhupi. 20 Hermanosri chayta uyarispa Señor Diosta jatuncharkancu. Pablotataj nerkancu:
—Hermanóy, kan ricushanqui chay chhica israelcuna Jesuspi japꞌicojcuna caskancuta. Tucuynincutaj nincu Moisespa camachiskasninta casunapuni caskanta. 21 Caypi cajcunaka kanmanta uyariskancu yachachiskayquita. Waj llajtaspi tiyacoj tucuy ayllu-masisninchejta Moisespa contranta yachachiskayquita uyariskancu. Uyarillaskancutaj niskayquita: “Khari wawaspa cuerponcupi amaña señalta churaychejchua nitaj yachacuskanchejmanjina cajtapis ruwaychejchu”, nispa. 22 Cunanrí ¿imatataj ruwasunchej? Chayamuskayquita yachaspa runaka tantaconka. 23 Allin canman ruwanayqui cay nisuskaycuta. Nokaycu uqhupi tawa runas cashancu. Paycunataj Diosman palabrawan niskancumanjina ruwanancu cashan. 24 Kanpis paycunajina ruwaspa paycunawan cusca Diospaj chꞌuyachacamuspa llimphuchacuy. Llimphuchacamuskancumantataj kan pagapuy, chanta umancutapis kꞌalata cꞌutuchicuyta atincu. Chaywan runas yachankancu kanmanta parlaskancuta tucuy uyariskancoka mana chekachu caskanta. Astawanpis kanka camachiskasta casuspa ruwashaskayquita yachankancu. 25 Waj llajtayoj hermanosmanrí yuyaskaycuta paycunaman kelkarkaycuña. Nerkaycu ama miqhunancuta ruwaska dioscunaman jaywaska uywasta, nitaj uywa yawarta. Nitaj sipiska uywa aychata miqhunancuta yawarnin mana llojsichiska cajtin. Paycunatataj camacherkaycu ama khenchachacunancuta, —nispa nerkaycu.
26 Chanta Pabloka chay niskancu runasta pusarka. Kꞌayantintaj sonkonta llimphuchacamorka chay tawa runaswan cusca. Yupaychana-wasimantaj willaj rerka llimphuchacuy pꞌunchaycunata juntꞌaskanta. Willayta munarka maycꞌajchus jaywananta sapa ujnincumanta konan caskanta.
Yupaychana-wasipi Pablota japꞌiycuncu
27 Kanchis pꞌunchaycuna juntꞌacushajtinña Asia jallpꞌamanta waquin israelcuna Pablota ricurparerkancu yupaychana-wasipi. Paycunataj tucuy chaypi caj runasta chꞌajwacherkancu. Pablota japꞌiycuspataj khaparisharkancu:
28 —¡Diospa ajllaskan israelcuna, yanapawaycu! Caymin chay tucuynejpi tucuyman yachachispa purej runaka. Cay runa yachachin khesachayta llajtanchejta, Moisespa camachiskasnintapis, yupaychana-wasinchejtapis. Cunanpis cayka waj llajtayoj runasta yupaychana-wasinchejta juchawan chꞌichichashan, —nispa.
29 Paycunaka ñaupajta Efeso llajtayoj Trofimowan Jerusalén llajtapi pay purishajta ricuskancu. Chayraycu paycuna yuyaskancu Pablo payta yupaychana-wasiman pusaycuskanta. Pablorí payta mana pusaycorkachu.
30 Ajinamanta tucuy chay llajtapi tiyacojcuna chꞌajwanancupaj okharicuspa tantaycacamorkancu. Chanta Pablota japꞌiycorkancu kharkonancupaj. Yupaychana-wasimantataj jawaman khatatarkancu. Chaypachitataj puncusta wiskꞌarkancu. 31 Runas okharicuspa Pablota wañuchiyta munasharkancu. Soldadocunaj curaj camachejnincumantaj willamorkancu tucuy Jerusalén llajtapi tiyacojcuna chꞌajwashaskancuta. 32 Payka chaypachita soldadostawan camachejcunantawan pusaricuspa chꞌajwaj runaspaman uskhayta rerkancu. Paycunari curaj camachejta soldadostapis ricuytawan manaña Pablota makarkancuchu. 33 Chanta curaj camachejka kayllaycuspa Pablota japꞌerka. Ajinaspa iscay watanaswan wataycunancutataj camacherka. Chaymantataj runasta taporka pichus caskanta, imatachus ruwaskantawan. 34 Chay ashqha runaska ujcuna ujjinata, ujcunataj wajjinata khaparisharkancu. Payri mana sutꞌita entiendeyta aterkachu chꞌajwaskancuraycu. Ajinapitaj payka Pablota cuartel wasiman pusaycunancuta camacherka. 35 Soldados Pablota gradascamaña pusashajtincuri runas manchay callpawan payta makayta munasharkancu. Chayraycu soldadoska Pablota okharispa apasharkancu. 36 Tucuy chay runaska khaparispa khatimusharkancu. Nisharkancutaj:
—¡Wañuchinachej cay runata! —nispa.
Contranpi cajcunaman Pablo cutichin
37 Soldados cuartel wasiman pusaycushajtincuña Pabloka curaj camachejnincuman nerka:
—Ujta niricusuyta munani, —nispa.
Chay camachejtaj nerka:
—Griego parlayta yachaskanqui, —nispa.
—Arí, yachani, —nerka Pablo.
38 Chanta camachej nerka:
—Ñaupaj pꞌunchaycunapi uj Egipto runa camachejpa contranpi runasta chꞌajwacherka. Chaymantataj tawa waranka runa wañuchista chꞌinnejman pusarka. Cunan reparani kanka mana chay runachu caskayquita, —nispa.
39 Pablotaj nerka:
—Nokaka Tarso llajtamanta cani Diospa ajllaskan israelcunamanta. Tarsoka Cilicia jallpꞌapi sumaj rejsiska llajtamin. Astawanpis cay runasman parlajta sakenawayquita niricuyqui, —nispa.
40 Camachejka payta parlajta sakerka. Ajinapi Pablo gradas patapi sayaycuspa maquinta okhariytawan runasta chꞌinyacherka. Runas chꞌinyacapojtincutaj payka hebreo parlaynincupi parlarerka. Nerkataj: