Pablo Macedonia jallpꞌaman Grecia jallpꞌamanwan rin
20
Chay chꞌajwa chꞌinyacuskanmanta Pabloka Cristota casojcunata wajyachimorka. Ajinaspataj paycunata sonkoncupi sumajta callpacharka. Chaymantataj “ripusaj”, nispa, Macedonia jallpꞌaman riporka. 2 Tucuy chaynejta purishaspataj ashqha niskasninwan Cristopi hermanosta yuyaycharka. Ajinaspataj Grecia jallpꞌaman chayamorka. 3 Chaypitaj Pablo quinsa quillata cacorka. Siria jallpꞌaman llojsej rishajtinña israelcuna payta wañuchinancupaj okharicushaskancuta pay yachacorka. Chayraycu payka Macedonia jallpꞌanejta cutipuyta yuyarka. 4 Paywantaj rerkancu Berea llajtamanta Sópater, Tesalónica llajtamanta Aristarco, Segundowan, Derbe llajtamanta Gayo, Timoteowan, Asia jallpꞌamanta Tíquico, Trofimowan. 5 Paycuna ñaupaycuspa Troas llajtapi suyamuwarkaycu. 6 Nokaycuri mana pokochinayoj tꞌanta fiesta pasayta Filipos llajtamanta barcopi llojserkaycu. Chaymantataj phishka pꞌunchayninpi Troasman chayaspa paycunawan tincunacorkaycu. Chaypitaj kanchis pꞌunchaycunata khepacorkaycu.Pablo Eutico sutiyoj joventa causarichin
7 Domingo pꞌunchayta nokaycu, Cristopi japꞌicojcuna, tꞌantata partej tantacorkaycu paypa wañuskanmanta yuyarinaycupaj. Pablori kꞌayantin puririna caskanraycu chaupi tutacama tapunacuspa paycunawan parlarka. 8 Wasej pata caj pisonpi tantaskas casharkaycu. Chay wasipitaj ashqha cꞌanchaycuna carkancu. 9 Uj joventaj, Eutico sutiyoj, ventanapi tiyacusharka. Pablo unayta parlaskanraycutaj Eutico puñuywan cꞌaywicusharka. Ajinaspataj payka puñuywan atipachicuspa quinsa caj pisomanta urmaycamorka. Chaymantataj wañuskata okharerkancu. 10 Pablorí uraycamuspa chay jovenman cꞌumuycorka. Chanta munacuywan joventa ojllaycorka. Nerkataj runasman:
—Amaña llaquicuychejchu. Cay jovenka causarinña, —nispa.
11 Chanta Pabloka watejmanta patallamantaj rerka. Hermanoswan cusca, tꞌantata partispa Jesucristomanta yuyaricunancupaj miqhorkancu. Chaymanta parlallarkapuni sutꞌiyamunancama. Chantaña riporka. 12 Joventaka causashajta wasinman pusacaporkancu. Chayraycu sonkochacuspa mayta cusicorkancu.
Troas llajtamanta Pablo rin Mileto llajtaman
13 Nokaycoka barcopi ñaupaycorkaycu kochanta rispa Asón llajtacama. Chaypitaj Pablota okharinaycu carka chaquillapi chaycama riyta munaskanraycu. 14 Ajinataj payka Asón llajtapi taripawarkaycu. Chanta pay barcoman yaycumorka. Mitilene llajtamantaj chayarkaycu. 15 Chay llajtamantataj kꞌayantin barcopi rispa Quío llajta chimpacama rerkaycu. Khepan pꞌunchaytaj Samos jallpꞌaman chayarkaycu. Trogilio llajtaman rispa samarerkaycu. Kꞌayantintaj Mileto llajtaman chayarkaycu. 16 Pablori yuyarka Asia jallpꞌapi mana unaytachu khepacuyta. Chayraycu Efeso llajtata pasapullarkaycu. Ajinapi payka uskhayta Jerusalén llajtaman chayayta munarka. Aticojtenka Espíritu jatun pꞌunchaypaj chayayta munarka.
Pablo Efeso llajtapi curajcunata yuyaychan
17 Pabloka Mileto llajtapi cashaspa Efeso llajtaman uj willajta cacharka. Cristopi tantaskacunamanta curajcunancuta wajyachimorka. 18 Paycuna jamojtincutaj Pabloka nerka:
—Asia jallpꞌaman chayamuskaymantapacha kancunawan carkani allinta causaspa llancꞌaspataj. Chayta kancuna sumajta yachanquichej. 19 Phutichiska cashaspapis may llampꞌu sonkowan Jesucristopaj llancꞌasharkanipuni munaska camachinjina. Diospa ajllaskan israelcuna contraypi churaycucojcunatapis muchorkani. Chaywan paycuna juchaman urmachiwayta munarkancu. 20 Astawanpis kancuna yachanquichej allinniyquichejpaj cajtaka tucuyninta willarkayquichej ni imata pacaspa. Chaytaka tantacuyniyquichejpi wasisniyquichejpipis yachacherkayquichej. 21 Israelcunamanpis waj runasmanpis sutꞌita willarkani. Ajinata sinchꞌita nerkani paycuna juchancuta sakespa Diosman cutiricunancuta, Señorninchej Jesucristopi japꞌicunancutapis. 22 Cunanrí Santo Espirituwan sumaj pusaska caspa Jerusalén llajtaman rishani. Mana yachanichu imachus nokawan jakaypi cananta. 23 Santo Espíritu tucuy llajtaspi sutꞌinchawaskallanta yachani. Payka niwan: “Carcelpi wiskꞌaska caywan llaquiycunawan kanpaj canka”, nispa. 24 Nokarí quiquin causayniytapis mana astawan curajpajchu khawani. Manachayrí cay sumaj willanasta willaraspa purishani. Chayllata imaynamantapis juntꞌayta cusiywan munanipuni. Cꞌacha Dios runasta yanapayta munaskanta willaranaypajmin Señor Jesús churawarka.
25 ‘Ajinapi purerkani willaraspa tucuy kancunaman Dios camachishaskanta payta tucuy munacojcunata. Cunanka yachani manaña uyayta ricunawayquichejta. 26 Chayraycu cunan willapushayquichej manaña nokachu juchayoj caskayta wiñay wañuyman maykenpis wijchꞌuycuska cawajchej chayka. 27 Imaraycuchus tucuy callpaywan Diospa tucuy munayninta willarkayquichej mana imatapis pacaspa. 28 Chayraycu Dioswan causayniyquichejta sumajta wakaychacuychej. Ajinallatataj tucuy hermanostapis wakaychaychej. Santo Espiritumin paycunaj wakaychajnincupaj churasorkachej. Uj sumaj michejjina Diospi japꞌicuspa tantacojcunata michimuychej. Señorninchej Jesuska yawarninwan paycunata juchamanta cacharicherka paypata canancupaj. 29 Yachani nokaj ripuskaymantaka llulla yachachejcuna jamunancuta. Paycuna Cristopi hermanosta munancu pantachiyta. Yarkhaska atojcuna mana qhuyaspa ovejasta wañuchincu, ajinallatataj kancunawan ruwayta munankancu. 30 Kancuna uqhullamantataj kꞌewiska yuyaywan chay yachachejcuna jatarenkancu. Paycuna llullasta yachachispa casucoj hermanosta pantachiyta munankancu paycunajina canancupaj. 31 Chayraycu allin yuyaywan khawacuychej. Yuyaricuychejtaj nokaka tuta pꞌunchay quinsa watantinta sapa ujniyquichejta yuyaychasuskaytapuni. Chayta ruwarkani llaquiycunata muchuspapis. Chayraycu tucuy chayta yuyayniyquichejpi sumajta japꞌicuychej.
32 ‘Cunanri, hermanosníy, mañacuni cꞌacha Dios niskanmanjina kancunata khawasunayquichejta yanapasunayquichejtapis. Ajinapi sonkoyquichejpi callpachaskas cayta atinquichej. Ajinallataj Señor Jesuspa tucuy llimphuchaskasninwan cusca chay sumaj willanasnejta wiñay causayniyoj canquichej. 33 Nokaka manamin pejpa kolkentapis nitaj pꞌachasnintapis munapayarkanichu. 34 Cayta kancuna sumajta yachanquichej. Noka pisichicuspa chayrí nokawan cajcuna pisichicojtincupis maquisniywan llancꞌarkani causanaycupaj. 35 Ajinata llancꞌaspa pisi callpayojcunata tucuypi yanapana caskantaka yachacherkayquichej. Chayraycu Señor Jesuspa niskanta yuyaricuychej: Wajcunaman koymin astawan jatun cusiyka kanllapaj japꞌiymanta niskaka.
36 Chay imasta niytawan Pabloka konkoriycucuspa tucuy paycunawan Diosmanta mañacorka. 37 Tucuy paycunataj mayta wakarkancu. Pablotataj munacuywan abrazaycuspa cacharpariporkancu. 38 Paycunaka mayta llaquiracorkancu manaña uyanta ricunancuta niskanmanta. Chaymantataj barcocama Pablota pusarpayaporkancu.