—Jesucristopi japꞌicushaspa ¿Santo Espirituta japꞌicorkanquichejchu?

Paycunataj cuticherkancu:

—Santo Espíritu caskanta ni uyarillarkaycupischu, —nispa.

3 Paytaj tapurerka:

—¿Imatataj yachachisorkachej Diosman tꞌakacuspa bautizacushajtiyquichejrí?

Paycunataj cuticherkancu:

—Bautizacunaycupajka Juan yachacherka, ajinallatataj yachacorkaycu juchasniycuta sakenaycuta, —nispa.

4 Pablotaj nerka:

—Juanka runasta bautizarka yacupi ricuchinanpaj paycuna juchasnincuta sakespa Diosman cutiricuskancuta. Juantaj runasta unaytaña nerka: “Khepayta uj runa jamushan, paypi japꞌicunayquichej tiyan. Payka Diospa ajllaskan Jesucristomin”, —nispa.

5 Chay japꞌicojcunaka uyariytawan bautizacorkancu Señor Jesús tucuy atiyniyoj caskanta japꞌicuspa. 6 Pablo maquisninta paycunaman churajtintaj Santo Espiritoka sonkoncuman uraycamorka. Paycunataj waj parlaycunata parlarkancu. Diosmanta willanastapis willararkancu. 7 Paycunari tucuynincu chunca iscayniyojjina kharis carkancu.

8 Pabloka tantacuna-wasiman rispa mana manchachicuspa sutꞌita parlarka entiendenancucama. Dios camachinantaka chekapuni caskanta yachacherka quinsa quilla juntꞌata. 9 Waquin runasrí rumi sonkos ruwacaporkancu. Ajinapitaj Diospi mana japꞌicorkancuchu. Astawanpis tucuypa ñaupakencupi sajrata parlarkancu Diospa cheka ñanninpi purinanpaj, chay yachachinasmanta. Chayraycu Pabloka paycunamanta tꞌakacaporka. Cristopi japꞌicojcunatapis wajnejman pusarka tantacunancupaj. Chaypitaj sutꞌita yachacherka sapa pꞌunchay Tiranno sutiyojpa yachachina wasinpi. 10 Ajinata Asia jallpꞌapi Pablo yachacherka iscay wata juntꞌata. Chaypi tucuy tiyacojcunataj Señor Jesuspa niskanmanta uyarerkancu israelcunapis waj llajtayojcunapis. 11 Diostaj Pabloman atiyta korka jatuchej tꞌucunasta ruwananpaj. 12 Ajinapi Pabloj cuerponmanta pañuelosta chayrí uj juchꞌuy pꞌachallatapis apaj cancu onkoskasman churanancupaj. Diospa atiyninwanka chay onkoyniyojcuna thañicapoj, supaycunapis runasmanta llojsillajtaj cancu.

13 Waquin purisquiri israelcunarí supaycunata kharkollajtaj cancu. Ajinapi Jesuspa sutinta okharispa yuyaskancumanjina supaycunata nerkancu:

—Pablo willarashan, chay Jesuspa sutinpi, noka camachiyquichej llojsinayquichejta, —nispa.

14 Chayta ruwajcunaka Esceva sutiyoj, israel runaj, kanchis wawasnin carkancu. Payka yupaychana-wasimanta uj curaj carka. 15 Supayrí paycunaman cutichispa nerka:

—Rejsini Jesustaka. Pichus Pablo caskantapis yachani. Kancunarí ¿pi caskayquichejtataj yuyacapunquichejrí?

16 Chay supayniyoj runataj paycunaman phawaycorka. Tucuynincutataj callpawan atiparka. Paycunaka makaskas kꞌaraslla chay wasimanta aykecorkancu. 17 Chayjina ruwacuskanta tucuy Efeso llajtapi tiyacojcuna, Diospa ajllaskan israelcuna, waj runaspis yacharkancu. Tucuy paycunataj mayta manchachicorkancu. Señor Jesustataj jatuncharkancu.

18 Jesuspi japꞌicojcunamanta ashqhas ajina layka ruwaynincumanta sutꞌita willacoj jamorkancu. 19 Ashqha pantaska laykacunapis millay librosnincuta tantamorkancu. Tucuypa ñaupakencupitaj ruphaycucherkancu chaycunata. Phishka chunca waranka jornalesmanjina chay libros valerka. 20 Ajinapi Señor Jesusmanta willanas tucuynejpi uyaricorka atiynintataj ricucherka. Astawan ashqhastaj Jesuspi japꞌicorkancu.

21 Chay imas ruwacuskanpa khepantataj Pabloka sonkonpi yuyasharka:

—Macedonia jallpꞌanejta Acaya jallpꞌanejta Jerusalén llajtaman risaj. Jakayman chayaspari Roma llajtamanpis rinallaytaj tiyan, —nispa.

22 Ajinataj payka yanapajcunan Timoteotawan Erastotawan chay iscaynincuta, Macedonia jallpꞌaman cacharka. Payri waquin pꞌunchaycunatawan Asia jallpꞌapi cacorka.

23 Chaypacha uj jatun chꞌajwa okharicorka. Chay chꞌajwari Diospa cheka ñanninpi purinanpaj, chay yachachinas jawa okharicorka. 24 Uj runa, Demetrio sutiyoj, chayta okharicherka. Payka ruwaj carka kolkemanta mamita Dianaj yupaychana-wasinman rijchꞌacojta. Ajinapi Demetrio ashqha kolketa ganachej paywan llancꞌajcunaman. 25 Kolkewan ruwajcunata payjina platerocunatawan tantaycuspataj nerka:

—Llancꞌaj-masis, yachanquichej cay llancꞌaymanta ashqha capuyniyoj caskanchejta. 26 Kancuna ricushanquichej uyarishanquichejtaj chay Pablota. Payka ashqha runasta umallichishan runaj ruwaskancunaka mana dioscunachu caskancuta nispa. Ajinata ruwashan mana cay Efeso llajtallapichu manachayrí tucuy Asia jallpꞌantinpiña. 27 Chaywanpis mana chayllachu. Astawanka llancꞌayninchejpis khesachaska canman. Ajinallataj jatun mamitanchej Dianapis khawaraska canman. Chay yupaychana-wasintaj manaña jatunpaj khawaskachu canman. Asia jallpꞌapi tiyacojcuna ashqhas, waj runaspis paytaka yupaychancu, —nispa.

28 Chayta uyarispa paycunaka maytapuni rabiacorkancu. Khaparisharkancutaj:

—¡Efesocunaj mamita Dianancoka jatunpaj khawaskamin! —nispa.

29 Tucuynin runas chay llajtamanta uj chꞌajwaypi okharicorkancu. Pabloj purej-masisnin Macedonia jallpꞌamanta Gayotawan Aristarcotawan japꞌiycuspa khatatarkancu. Ajinaspataj jatun tantacunancuman uj yuyaylla uskhayta junyarkancu. 30 Pablori chay tantaska runasman rispa parlayta munasharka. Jesuspa yachacojcunanrí payta mana sakerkancuchu yaycunanta. 31 Waquin Asia jallpꞌapi camachejcuna Pabloj amigosnin carkancu. 32 Paycunapis Pabloman willachimorkancu amapuni chay runa tantacuyman parlananta. Tucuy chay tantaska runaska khasi chꞌajwallata chꞌajwarkancu. Ujcuna ujjinata khaparisharkancu. Waquintaj wajjinata khaparisharkancu. Ashqhas paycunamanta mana yacharkancuchu imapajchus chayman tantacuskancuta. 33 Israelcuna Alejandrota chay ashqha runaspa ñaupakencuman tankarkancu. Chayraycu runas yuyarkancu pay parlayta munaskanta. Alejandrotaj maquinta okharispa tantaska runasta chꞌinyachinayasharka pay quinquinta jamachꞌacunanpaj. 34 Runasrí Alejandro israel runa caskanta repararpayarkancu. Chayraycu unayta tucuynincu uj yuyayllawan khaparerkancu iscay horatajina:

—¡Efeso llajtayojcunaj mamita Dianancoka jatunpaj khawaskamin! —nispa.

35 Llajtata camachejcunaj kelkaj runantaj chay ashqha runasta chꞌinyachispa paycunata nerka:

—Efeso llajtayoj tatacuna, tucuy runaspis yachancu nokanchej caypi tiyacojcunaka mama Dianata paypa wasintapis khawapojcuna caskanchejta. Janaj pachamanta uraycamoj rumipi rijchꞌacuynintapis khawapojcuna canchej. 36 Chaytaka ni pi atinchu niyta mana ajina caskantaka. Chayraycu chꞌinyacapullaychej. Manaraj allinta yuyaspaka ama imatapis ruwaychejchu. 37 Chay khatatamuskayquichej runaska yupaychana-wasimanta mana imatapis suwarkancuchu. Nitaj mamitanchejpajpis sajrata rimarkancuchu. 38 Demetrio llancꞌaj-masisninwan uj runaj contranpi cashan chayka, curajcunaman willachuncu. Chaypaj curajcuna tiyan, churaska pꞌunchaycunapis chay imasmanta autoridadcuna uyarispa khawanancupaj. Chaypi paycuna uyanchanacuspa sutꞌinchanacuchuncu. 39 Waj imamanta yachayta munanquichej chayka, jatun chekanchana tantacuypi sutꞌinchaconka. 40 ¡Pajtataj juchachaska casunman cunan pꞌunchay chꞌajwaskamanta! Imamantachus chay chꞌajwa caskanta ni ima niyta atisunman khasillamanta caskanraycu, —nispa.

41 Chayta niytawantaj tucuy runasta cacharpayaraporka.