—Ayllu-masis, allintapuni tucuy sonkowan Diospa ñaupakenpi causacushani, —nispa.

2 Chanta yupaychana-wasimanta curaj, Ananiaska, Pabloj kayllanpi sayashajcunata camacherka siminpi lakꞌananta. 3 Chanta Pabloka payta nerka:

—Dios kanta lakꞌachisonka, puraj uya. Yurajchaska perkajina canqui. Kan churaska carkanqui chekanta khawanawayquipaj Diospa camachiskasninmanjina ninayquipaj juchayojchus manachus caskayta. Chanta ¿imaraycutaj camachiskata mana casuspa nokata lakꞌachiwanquirí?

4 Chaypi cashajcunataj payta taporkancu:

—¿Ajina sajratachu cꞌamispa cutichinqui Diosmanta chay curajninchejman?

5 Pablo nerka:

—Ayllu-masis, pay curaj caskanta mana yacharkanichu. Dios palabranpi nin: “Llajtayquej camachejninpaj ama sajrata parlanquichu”, —nispa.

6 Pabloka chay tantaskacunata repararka saduceo partemanta tꞌakacoj fariseo partemantawan caskancuta. Chayraycu jatun tantacuypi tantaska runasman khaparispa nerka:

—Ayllu-masis, nokaka chay tꞌakacoj partemanta cani tatasniymantapacha. Wañuymanta runas causarimunancuta suyaskayraycutaj caypi japꞌiska cashani, —nispa.

7 Chay parlajta uyarispa iscay partesmanta cajcunaka paycunapura churanacoj sayaycorkancu. Chay tantacuytaj iscayman tꞌakacaporka. 8 Saduceo partecuna nincu runa mana wañuymanta causarimuskanta. Nillancutaj Diosmanta willaj angeles mana caskancuta. Ni almas nitaj chaycunajina mana cuerpoyojcunapis caskancuta nincu. Tꞌakacojcunarí tucuy chaytaj caskanta nincu. Chayraycu tꞌakanacaporkancu. 9 Tucuynincu sinchꞌita khaparerkancu. Ajinapi tꞌakacoj partemanta waquin yachachejcuna sayaricorkancu. Chaymantataj sinchꞌiwan churanacuspa nerkancu:

—Cay runaka mana ima juchayojchu. Diospa contranpi ama churacunachu. Ichapis uj willaj angel chayrí uj mana cuerpoyoj caj payman parlarka, —nispa.

10 Paycunataj astawan sinchꞌita churanacusharkancu. Chayraycu curaj camachejka manchachicorka Pablota tꞌunanancuta. Ajinapi soldadosta camacherka orkhonancuta payta chay chaupimanta soldadocunaj cuartelnincumantaj pusarparinancuta.

11 Chay chꞌisitaj Señor Jesús Pabloman chimpaycuspa nerka:

—Callpachacuy, Pablo. Imaynatachus Jerusalenpi kan nokamanta runasman willarkanqui, ajinallatataj Roma llajtapipis nokamanta willanayqui tiyan, —nispa.

12 Pꞌunchayña cajtintaj waquin israelcunaka Pablota wañuchinancupaj cusca yuyaychanacorkancu. Diospa sutinta okharispataj nerkancu:

—Pablota wañuchinanchejcama mana miqhusunchu nitaj ujyasunchu, —nispa.

13 Ajinata Diospa sutinta okharejcuna carkancu tawa chunca curaj. 14 Chanta paycuna yupaychana-wasimanta curajcunaman waj curajcunamanwan chimpaspa nerkancu:

—Nokaycu Diospa sutinta okharispa nerkaycu mana ni imata miqhunaycuta Pablota wañuchinaycucama. 15 Chayraycu cunanka kancuna jatun tantacuywan camachejman Pablota pusarkamunanta mañaychej. Aswan sutꞌita paymanta yachanayquichejpaj mañajjinalla tucuychej. Nokaycurí manaraj jatun tantacuyman kayllamushajtin payta wañuchinaycupaj waquichiskas cashaycu, —nispa.

16 Pabloj pananpa wawan uyarerka wañuchiyta munashaskancuta. Chanta cuartel wasiman rispa chayta Pabloman willamorka. 17 Chaymanta Pablotaj soldado camachejta wajyaspa nerka:

—Cay joventa curaj camachejniyquipaman pusay. Payka uj imata payman willanan tiyan, —nispa.

18 Chayraycu camachej curajninman joventa pusarka. Nerkataj:

—Wiskꞌaska Pablo wajyawaspa niricuwarka cay joventa kanman pusamusunayta. Payka uj imata kanman willasunan tiyan, —nispa.

19 Curaj camachejtaj joventa maquinmanta wajnejman sapallanta aysarka. Payta taporkataj:

—¿Imatataj willanawayqui tiyanrí?

20 Joventaj nerka:

—Israelcuna tucuy cusca yuyashancu Pablota mañasuyta. Kꞌaya tantaska runasman Pablota pusanayquita mañayta yuyancu. Paycunaka aswan sutꞌita paymanta yachanancupaj mañajjinalla tuconkancu. 21 Kanrí mañaskancuta ama casuychu. Tawa chunca runas Diospa sutinta okharispa nerkancu: “Mana miqhusunchu nitaj ujyasunchu Pablota wañuchinanchejcama”, nispa. Cunantaj paycunaka waquichiskas pacaypi suyashancu kanpa ninallayquitaña.

22 Chanta curajka chay joventa cachaporka: “Ama pimanpis willaychu chay willaskayquita”, nispa.

23 Curaj camachejka iscay camachejcunata wajyaspa nerka:

—Iscay pachaj soldadosta, kanchis chunca caballoyojcunatawan iscay pachaj jatun cuchilloyojcunatawan,^a waquichipuway. Paycuna puñuna horata tutapi Cesarea llajtaman rinancupaj waquichiskas cashachuncu. 24 Chaywanpis Pablota llokꞌachinayquichejpaj caballosta waquichipuychej. Ajinapi paytaka camachej Felixpaman mana imanaskallata chayachinquichej, —nispa.

25 Cayjina cartatataj kelkaspa paycunawan apacherka:

26 “May curajpaj khawaska camachej Félix: Noka, Claudio Lisias, napaycamuyqui. 27 Israelcuna cay Pablota japꞌiycucherkancu. Paytataj wañuchiytaña munasharkancu. Nokarí romano runa caskanta yachaspa soldadosniywan maquisnincumanta cacharichimorkani. 28 Runas juchachaskancuta sutꞌita yachayta munaspataj paytaka tantacuynincuman pusacherkani. 29 Khawaskaymantarí yacharkani payka mana wañunanpajjina juchayojchu, nitaj wiskꞌaska cananpajjinapischu. Manachayrí paycunaj camachiskasnincupi caj imasllamanta juchacharkancu. 30 Israelcuna payta wañuchinancupaj churacuskancuta yacharkani. Chayraycu chay quiquinpacha kanpaman cachamuyqui. Chaywanpis camacherkani contranpi cajcuna kanpa ñaupakeyquipi Pablota ninancuta. Allillanta caricushay”, nispa kelkarka.

31 Chanta soldadoska camachiskata casuspa Pablota tutapi Antipatriscama pusarkancu. 32-33 Kꞌayantintaj chaquipi caj soldadoska cuartelnincuman cutimporkancu. Caballospi soldadostaj Pablota pusaspa Cesarea llajtaman chayarkancu. Chay jallpꞌaj camachejninmantaj cartata jaywarkancu Pablotapis. 34 Camachejtaj cartata leespa taporka maymanta Pablo caskanta. Cilicia jallpꞌamanta caskanta yachaytawan 35 Pablota nerka:

—Juchachasojcuna chayamojtincu kanmanta parlasunchej, —nispa.

Chanta soldadosta camacherka Herodespa ruwachiskan sumaj wasinpi wiskꞌanancuta khawanancutataj.