—Moisespa camachiskanmanjina kharej cuerponpi uj señalta^a churanayquichej tiyan. Mana churawajchej chayka, mana wiñay causayniyoj cayta atinquichejchu, —nispa.

2 Chayraycu Pablopis Bernabepis paycunawan churanacuspa sinchꞌita parlarkancu. Chantaña tantacoj hermanos ajllarkancu Pablota Bernabeta ujcunatawan rinancupaj Jerusalén llajtaman. Chaypitaj parlanancu carka Jesuspa cachasninwan, Cristopi hermanosmanta curajcunawan cay imasmanta sutꞌita yachamunancupaj.

3 Antioquiapi tantaska hermanos paycunata cacharkancu. Chanta cachaskacunaka pasarkancu Fenicia jallpꞌanejta Samaria jallpꞌanejta ima. Chaycunapi willararkancu imaynatachus mana israel cajcuna juchancuta sakespa Jesuspi japꞌicuskancuta. Cristopi tucuy hermanostaj chayta uyarispa mayta cusicorkancu.

4 Chanta chay cachaskacunaka Jerusalenman chayarkancu. Chaypi tantaska hermanoswan, Jesuspa cachasninwan, curajcunawanpis paycunata cusiywan tariparkancu. Cachaskacunataj willarkancu Dios paycunawan sumajta ruwaskanta tucuy chay imasta. 5 Waquin fariseo parte caj hermanosrí sayarispa nerkancu:

—Mana israelmanta hermanoska kharej cuerponpi uj señalta churanancu tiyan wiñay causayniyoj canancupaj. Chaywanpis paycunaman willananchej tiyan Moisespa camachiskasninta casunancuta, —nispa.

6 Ajinapi tantacorkancu Jesuspa cachasninwan hermanosmanta curajcunawan chay jawa sumajta khawanancupaj. 7 Ashqhataña parlaycuskancumantataj Pedroka sayarispa nerka:

—Hermanosníy, yachanquichej Dioska ñaupajpi cachacunamanta ajllawaskanta waj llajtayojcunata willaramunaypaj. Ajinapi sumaj willanasta willarajta cachawarka paycuna uyarispa paypi japꞌicunancupaj. 8 Runaj sonkonpi tucuy yuyaskanta sutꞌita yachan Dios. Chay waj llajtayojcunatapis wawasninpaj japꞌiskanta sutꞌita ricucherka. Dioska cachamuspa Santo Espirituta sonkoncuman tiyacunanpaj chayta sutꞌincharka. Paycunaj sonkoncumanpis chay Espirituta cachallarkataj nokanchejpamanjina. 9 Paypajka uj rejlla canchej waj llajtayojcunapis, nokanchej israelcunapis. Sonkoncutataj juchamanta llimpucharka Jesuspi japꞌicuskancuraycu. 10-11 Dios munayninta ricucherkaña Moisespa camachiskasninnejta. Ni unay tatasninchejpis nitaj nokanchejpis chayta juntꞌayta aterkanchejchu. Astawanpis cꞌacha Señor Jesucristopi japꞌicuspa qhuyacuyninraycu nokanchejpis wiñay causayniyoj canchej. Ajinallatataj waj llajtayojcunapis wiñay causayta japꞌincu. Chanta ¿imaraycutaj Jesusta casojcunaman waj ruwanasta kꞌepichinquichejrí?

12 Chayta uyarispa tucuy chay ashqha hermanos chꞌinyacorkancu. Uyarerkancutaj Pablota Bernabetawan Dios paycunanejta waj llajtayojcuna uqhupi ruwaskanta. Imaynatachus Dios atiyninwan cꞌacha jatuchej tꞌucunastawan ricuchinasta ruwaskanta uyarillarkancutaj. 13 Parlayta tucojtincutaj Jacobo nerka:

—Hermanosníy, uyariwaychej. 14 Simón Pedro willawarkanchejña ñaupajpis Dios qhuyacuskanta waj llaytayoj runastapis. Paycunamanta runasta ajllarka cheka wawasnin canancupaj. 15 Unay willajcunaj kelkaskancupipis Dioska ajinatapuni nin:

19 —Chayraycu noka yuyani waj llajtayojcunata amaña llaquichinanchejta waj ruwanaswan. Paycuna sajra ruwaskasnincuta sakespa Diosman cutirerkancuña. 20 Astawanpis paycunaman kelkasunman: “Amaña ruwaska dioscunapaj jaywanasta miqhunancuta, ni khenchachacunancuta, nitaj sipiska uywaj aychanta miqhunancuta yawarnintin caskanraycu, nillataj ima yawarta miqhunancuta”. 21 Imaraycuchus Moisespa camachiskasnintaka runas unaymantapacha sapa llajtapi yachachincupuni. Sapa samacuna pꞌunchaypitaj runas chayta leencu tantacuna-wasispi, —nispa nerka Jacobo.

22 Chanta Jesuspa cachasninwan, tucuy tantacoj hermanoswan, curajcunawan unanchanacorkancu. Tantacuynincumantataj ajllarkancu runasta cachanancupaj Antioquía llajtapi caj hermanosman. Pablowan Bernabewan rinancupaj ajllarkancu Judasta Silastawan. Paycunaka sumajpaj khawaska hermanos carkancu. Cay Judasta Barsabás nispa sutichallajtaj cancu. 23 Paycunawan apacherkancu uj cartata nispa:

“Nokaycu Jesuspa cachasnin, curajcunawan, Cristopi hermanospiwan napaycamuycu tucuy kancuna waj llajtayoj hermanosman. Kancuna Antioquiapi, Siria, Cilicia jallpꞌaspi tiyacojcunamanwan napaycamuycu. 24 Uyarispa yachaycu waquin hermanos mana nokaycumanta cachaskalla jamuskancuta. Paycuna llaquichispa pantachisunayquichejpaj nerkancu: Moisespa camachiskasninta casunayquichej, kharej cuerponpi uj señalta ruwanayquichejpis tiyan wiñay causayta japꞌinapaj, nispa. 25 Chayraycu yuyaycu ajllaska hermanosta cachamunaycoka allin caskanta sumaj sutꞌi cananpaj. Tucuyniycu uj yuyayman chayaspa paycunata cachamuycu. Paycuna jamushancu munaska hermanosninchej Pablowan Bernabewan. 26 Pablo Bernabewan yakha wañorkancu Señorninchej Jesuscristomanta willaskancuraycu. 27 Ajinaka cachamushaycu Judasta Silastawan. Paycunamin chay kelkaskaycujinatapuni willasonkachej. 28 Santo Espiritupis nokaycupis yuyaycu allin caskanta cay yuyaychaskasllata casunayquichejta: 29 Amaña ruwaska dioscunaman jaywaska aychata miqhuychejchu. Nitaj yawarta miqhuychejchu. Nitaj sipiska uywaj aychanta miqhuychejchu yawarnintin caskanraycu. Nitaj khenchachacuychejchu. Chaywanka allillan canka. Allillanta causacuychej”, nispa kelkarkancu.

30 Ajinataj cachaskacunaka rerkancu Antioquía llajtaman. Chaypi Cristopi tucuy hermanosta tantaspa cartata jaywarkancu. 31 Hermanoska chay yuyaychaj cartata uyarispataj mayta cusicorkancu. 32 Judas Silaspiwan Diospa willajcunan carkancu. Ashqhata willaraspa hermanosta yuyaycharkancu. Sonkoncupitaj callpacharkancu Jesucristopi astawan japꞌicunancupaj. 33 Uj pꞌunchaycunata caricuspa paycunapis cachamojnincuman riporkancu Jerusalén llajtaman. Tucuy hermanostaj paycunata cachaporkancu:

34 Silasrí kheparicuyta yuyarka. 35 Pablo Bernabewanri Antioquía llajtapi kheparicuspa yachachillarkancupuni. Ashqha waj hermanospiwan willararkancu Señor Jesucristomanta sumaj willanasta.

36 Khepan pꞌunchaycunamanta Pablo Bernabeman nerka:

—Jacu ujtawan watucamuna hermanosta ñaupajpi willararkanchej Señor Jesucristoj niskanmanta, tucuy chay llajtasman. Watumunataj imaynachus Cristopi cashancu, —nispa.

37 Bernabeka paycunawan pusayta munarka Juan Marcosta. 38 Pablorí mana munarkachu. Nerka mana allinchu caskanta riskancupi Panfiliamanta cutiripuskanraycu ruwananta mana tucuchaysispa. 39 Chay jawa mayta rimanacorkancu tꞌakanacunancucama. Ajinamanta Bernabé pusarka Marcosta. Chipre jallpꞌamantaj yacunta rerka. 40 Pablotaj Silasta ajllarka. Hermanostaj Diosmanta mañaporkancu Señor paycunata yanapaspapuni wakaychananpaj. Chanta Pablo llojserka. 41 Rerkataj Siria jallpꞌanejta Cilicia jallpꞌanejtawan. Chay jallpꞌaspi Cristopi japꞌicuspa tantacojcunata sonkoncupi sumajta callpacharka astawan paypi japꞌicunancupaj. ^b