Timoteo purin Pablowan Silaswan
16
Pablo Silaswan chayarkancu Derbe llajtaman. Chaymantataj Listra llajtaman rerkancu. Chaypitaj tarerkancu Jesuspi uj japꞌicoj runata Timoteo sutiyojta. Mamanpis Jesuspi japꞌicoj carka, Diospa unay ajllaskan israelcunamanta. Tatanrí griego llajtayoj runa carka. 2 Hermanos Listrapi Iconiopipis Timoteota sumaj hermanopaj khawarkancu. 3 Pablori munarka Timoteo paywan purinanta. Chaycunanejpi tiyacoj israel runasraycutaj Pablo Timoteoj cuerponpi uj señalta churacherka. [Chaytataj israelcuna ruwaj cancu sapa uj kharita Diospa unay ajllaskasnin caskancuta ricuchinancupaj.]a Tucuy chaycuna yacharkancu Timoteoj tatan griego runa caskanta. Chayraycu Pablo yuyarka chay señalta churanan caskanta. 4 Tucuy llajtasman chayaspataj Pablowan llancꞌaj-masisninwan hermanosta yachachisharkancu. Jesuspa cachasninwan Jerusalenpi curaj hermanoswan niskancu ruwanancuta chayta casunancuta munacuywan camacherkancu. 5 Tucuynejpi Jesuspa cachasnenka tantaska hermanosta astawan callpacharkancu Jesuspi japꞌicunancupaj. Sapa pꞌunchaytaj astawan runas Jesuspi japꞌicorkancu.Pablo Macedonia runata ricun moskoypijina
6 Santo Espíritu jarcꞌarka Pablota chay llancꞌaj-masisnintawan Asia jallpꞌapi sumaj willanasta Jesusmanta willaramunancuta. Chayraycu Frigia jallpꞌanejta Galacia jallpꞌanejtawan rerkancu. 7 Ajinapitaj Misia jallpꞌa kayllaman chayamorkancu. Paycunataj Bitinia jallpꞌaman riyta yuyarkancu. Jesuspa cachamuskan, chay Espiriturí, rinancuta jarcꞌallarkataj. 8 Chayraycu Misia jallpꞌa ladollanta pasaspa Troas llajtaman chayarkancu. 9 Chaypitaj Pabloka tutapi moskoypijina Macedonia jallpꞌamanta uj runata ricorka sayashajta. Chay runari Pablota mayta niricorka: “Macedonia jallpꞌaman jamuspa yanapariwaycu”, nispa. 10 Ajinata Pablo ricuskantawancama Macedonia jallpꞌaman rinaycupaj churacorkaycu. Nokaycuri chekamanta yacharkaycu Dios camachiwaskaycuta paycunaman sumaj willanasta willaranaycupaj.
Pablo Silaswan Filipospi
11 Troas llajtamanta yacunta barcopi puririmuspa chekanta Samotracia jallpꞌaman chayarkaycu. Kꞌayantintaj Neápolis llajtaman chayarkaycu. 12 Rispa chaymanta Filipos llajtaman chayarkaycu. Filiposka Macedonia jallpꞌapi jatun llajta carka. Chaypitaj Roma llajtamanta runaspis tiyacuncu. Chaypi nokaycu pisi pꞌunchaycunata khepacorkaycu. 13 Samacuna pꞌunchaypitaj llajtamanta mayu cantoman llojserkaycu. Chaypi yuyarkaycu tincuyta Diosmanta mañacoj rejcunawan. Ajinapi tantacoj warmiswan parlaspataj Jesusmanta yachacherkaycu. 14 Carka paycunamanta uj uyarej warmi, Lidia sutiyoj. Payka Tiatira llajtamanta carka, Diostapis munacoj. Culli-puca, sumaj pꞌachata vendejpis carka. Señor Jesucristo payman sumaj yuyayta korka Pabloj parlaskanta casunanpaj. 15 Ajinapi payka wasinpi tiyacojcunawan bautizacorkancu Jesuspi japꞌicuskancuta ricuchinancupaj. Chaymantataj payka mayta niwasharkaycu:
—Señor Jesuspi chekamanta japꞌicojpaj khawawanquichej chayka, wasiyman jamuychej caricunayquichejpaj, —nispa.
Ajinata wasinman pusawarkaycu.
Pablo Silaswan wiskꞌaskas Filipos llajtapi
16 Diosmanta mañacoj rincupuni, uj cuti chayman risharkaycu. Ajinallapi uj camachi sipaswan mana yuyaymanta tincucorkaycu. Chay sipaska supaywan apaycachaska carka. Chayraycu runasman mana yachaska imasta willaj. Ajinaspataj patronninpaj ashqha kolketa ganaj carka. 17 Chay sipaska Pablotawan nokaycutawan khatiyta kallariwarkaycu. Khaparispataj nisharka:
—Cay runaska tucuy atiyniyoj Diospa camachisnin cancu. Paycuna willasonkachej imaynata juchamanta cachariskas canayquichejta, —nispa.
18 Ashqha pꞌunchaycunata ajinata khaparillajpuni. Pablorí chayta muchuyta manaña aterkachu. Chayraycu cutiricamuspa sajra supayta nerka:
—Jesucristoj atiyninwan camachiyqui: Llojsiy paymanta, —nispa.
Chay quiquinpachataj supayka sipasmanta llojsiporka.
19 Chay sipaspa patronesnin ricorkancu manaña paywan kolketa ganayta atinancuta. Chayraycu Pablotawan Silastawan japꞌicherkancu. Ajinaspataj plazapi llajta camachejcunaman khatatarkancu juchachanancupaj. 20 Camachejcunaman chimpaycuchispataj nerkancu:
—Cay runaska israelcunamanta caspa llajtanchejta okharishancu chꞌajwachinancupaj. 21 Wajjina ruwanasta manchayta willashancu. Nokanchejri romanos caskanchejraycu manapuni chaycunata cheka ruwanaspaj japꞌiyta atinchejchu, nitaj ruwaytapis, —nispa.
22 Ashqha runaspis Pabloj contranpi Silaspawan contranpi okharicorkancu. Camachejcunataj iscaynincoj pꞌachasnincuta lluchꞌurparicherkancu. Camacherkancutaj cꞌaspiwan wajtaskas canancuta. 23 Ashqhata wajtachispataj carcelman churaycorkancu. Carcelta khawajtataj camacherkancu paycunata sumajta khawananta ama aykecunancupaj. 24 Khawajri camachiskancuta casuspa uqhu caj carcel wasiman paycunata churaycorka. Chaquisnincutataj raqhu cꞌaspi juscꞌusman churaraspa japꞌiracherka.
25 Chaupi tutatajina Pablowan Silaswanka Diosmanta mañacuspa payta yupaychaspataj taquisharkancu. Chaypi wiskꞌaska runaspis uyarisharkancu. 26 Ajinapi ujllata jallpꞌaka mayta qharcatiterka. Carcelpa cimientosninpis cuyurerkancu. Chay quiquinpacha carcelpa tucuy puncusninpis quicharicaporkancu. Wiskꞌaska runaspata tucuy cadena watanasnincupis phascaracaporkancu. 27 Carcelta khawaj runari puñuymanta rijchꞌarispa carcel puncusta quichariskata ricorka. Payka wiskꞌaska runas aykecapuskancuta yuyarka. Chayraycu jatun cuchillontab siqꞌispa wañuchicunayasharkaña. 28 Pablorí sinchꞌita khaparispa nerka:
—Ama imanacuychu. Tucuyniycu caypi cashaycu, —nispa.
29 Carcelta khawaj runataj cꞌanchata mañacuspa carcel wasiman uskhayta yaycorka. Qharcatitispataj Pabloman Silasmanwan konkoricorka. 30 Paycunata jawaman pusarkamuspataj nerka:
—Wirakochis, juchamanta cachariska canaypaj ¿imatataj ruwanay tiyanrí?
31 Paycunataj cuticherkancu:
—Señor Jesucristopi japꞌicuy. Chaywanka kanpis wasiyquipi tiyacojcunapis ajinata japꞌicuspa juchamanta cachariskas canquichej, —nispa.
32 Ajinatataj paycunaka sumaj willanasta Jesusmanta willararkancu payman tucuy wasinpi tiyacojcunamanpis. 33 Carcelta khawaj runaka Pablotawan Silastawan chay chaupi tutapacha jamperka nanachicuskasnincuta. Chay quiquinpachataj payka tucuy wasinpi tiyacojcunawan bautizacorkancu Jesuspi japꞌicuspa. 34 Chaymantataj Pablota Silastawan wasinman pusaspa miqhunata jaywarka. Payka may cusiska casharka tucuy wasinpi tiyacojcunapis Diospi japꞌicuskancuraycu.
35 Pꞌunchayamojtinña llajta camachej curajcunaka yanapajcunancuta khawajcunaman cachamorkancu. Nichimorkancutaj: “Chay runasta cacharipuychej”, nispa. 36 Ajinataj carcelta khawaj runaka chay niskancuta Pabloman willarka:
—Camachejcuna camachimuncu cachariska canayquichejta. Chayraycu cunanka allillanta ripuychej, —nispa.
37 Pablorí paycunata nerka:
—Roma llajtayoj runas cashajtiycu tucuy runas ricushajtincu jasutꞌichiwarkaycu. Chaywanpis ajinata ruwawarkaycu mana juchachaskasllata. Ajinaspataj carcelman wijchꞌuycuwarkaycu. Cunanrí ¿pacayllamantachu cacharipuyta munawaskaycu? Mana ajinachu canka. Manachayrí paycuna quiquincu jamuspa runaspa ñaupakencupi orkhowachuycu carcelmanta, —nispa.
38 Yanapajcunaka chayta willarkancu camachejcunaman. Camachejcunari Roma llajtayoj runas caskancuta yachaspa mayta manchachicorkancu. 39 Paycunari carcelman jamuspa Pabloman Silasmanwan niricusharkancu:
—Pantarkaycu, perdonariwaycu, —nispa. Paycunata cacharipuspataj nerkancu:
—Cay llajtamanta ripullaychej, ari, —nispa.
40 Carcelmanta llojsispataj Lidiaj wasinman yaycorkancu. Chaypiri Cristopi hermanosta tantaskata ricorkancu. Chayraycu Cristopi sumajta japꞌicunancupaj hermanosta callpacharkancu. Ajinaspataj riporkancu.