Pablo Bernabewan Iconio llajtapi
14
Pablo Bernabewan Iconio llajtaman chayaspataj israelcunaj tantacuna-wasincuman rerkancu. Chaypitaj sumajtapuni willararkancu. Ajinapi ashqhas, israel runaspis, waj runaspis Jesuspi japꞌicorkancu. 2 Jesucristopi manapuni creej israelcunarí waj runasta yachaycucherkancu. Okharicherkancutaj hermanospa contranta phiñacunancupaj. 3 Chayraycu Pablo Bernabewan chaypi unayta khepacorkancu. Callpachacuspataj sumajta willararkancu Dios runasta maytapuni yanapayta munashaskanta. Dios ricuchinasta tꞌucunastawan ruwarka paycunanejta, runas yachanancupaj chay willanas cheka caskanta. 4 Chay llajtayojcuna ashqhasrí iscayman tꞌakacorkancu. Ujcuna israelcunaman sayaskas carkancu ujcunataj Jesuspa cachasninman. 5 Ajinaka israelcunawan waj runaswan curajcunancuwan uj yuyayllaman tucuspa yachachinacorkancu. Ninacorkancu:—Chay cachasta ñacꞌarinachej, rumiswan chꞌankaspa wañuchinachej, —nispa.
6 Pablowan Bernabewanrí chay unanchacuskancuta reparaspa chaymanta aykecorkancu. Licaonia jallpꞌapi Listra llajtaman riporkancu, chanta Derbe llajtaman, chay jallpꞌaj kayllasninmanwan. 7 Chaycunapipis Jesusmanta willararkancu.
Listra llajtapi, Derbe llajtapiwan Pablota chꞌankaycuncu
8 Listra llajtapi carka uj runa, chaquinmanta mana puriy atej. Payka ajina suchupuni nacecorka. Tiyaskalla cacoj ni jaycꞌaj purerkachu. 9 Pablo willashajta uyarisharkataj. Pablori payta sumajta khawaycorka. Repararkataj thañicunanpaj chay runa Diospi japꞌicuskanta. 10 Chanta jatunmanta nerka:
—Sayaycuy chekanta, —nispa.
Chay suchu runataj ujllata phinquirispa sayaycucorka. Puriytataj kallarerka. 11 Runastaj chayta ricuspa Licaonia parlaynincupi khaparerkancu:
—¡Dioscuna runaman tucuspa uraycamuwanchej! —nispa.
12 Bernabeta suticharkancu Júpiter dios. Pablotataj suticharkancu Mercurio dios pay curaj parlaj caskanraycu. 13 Jupiterta yupaychana-waseka llajtaman yaycunapi carka. Jupiterta yupaychachej runataj chayman apamorka wacasta tꞌica pillustawan. Paywan ashqha runaswan munarkancu apamuskasnincuta jaywaspa yupaychayta Bernabeta Pablotawan. 14 Jesuspa cachasninrí chayta uyarispa pꞌachasnincuta lliqꞌicorkancu mana munaspa runas paycunata yupaychanancuta. Chay ashqha runas chaupiman correycuspataj khaparerkancu:
15 —Tatacuna, ¿imaraycutaj cayta ruwashanquichejrí? Nokaycupis kancunajina runaslla caycu. Sumaj willanastataj willaraj jamuycu. Chay ruwaska dioscunaman yankha yupaychayta sakespa causaj Diosman cutiricunayquichejta, niycu. Pay ruwarka janaj pachata, cay pachata, jatun kochasta, tucuy chay ruwaskasninpi cajcunatawan. 16 Unay pꞌunchaycunapi tucuy runacuna munaynincumanjina causanancuta Dios sakellarka. 17 Astawanpis payka runaswan sutꞌita rejsichicorka cꞌacha Dios caskanta. Pay apachimuwanchej parata. Payllataj miqhunatapis pokochipuwanchej. Pay sajsachiwanchej miqhunawan. Sonkonchejpitaj mayta cusichiwanchej, —nispa.
18 Tucuy cay imasta nishajtincupis runaska manapuni munarkancuchu casuyta. Ñacꞌayta Pablo Bernabewan chay ashqha runasta jarcꞌarkancu ama paycunaman uywasta jaywaspa yupaychanancuta.
19 Chanta waquin israelcuna chayamorkancu Antioquía llajtamanta Iconio llajtamantawan. Paycuna runasta yuyaychaspa Pabloj contranpi okharicherkancu. Ajinamanta runas payta rumiswan chꞌankarkancu. Wañuchiskancuta yuyaspataj llajta jawaman khataterkancu. 20 Jesuspi japꞌicojcunarí Pabloman muyuchaycucorkancu. [Paycuna manaña jatarinanta yuyashajtincutaj Pabloka jatarerka.]a Kꞌayantintaj Pabloka Bernabewan Derbe llajtaman riporkancu.
21 Chay llajtapi tiyacojcunaman Jesusmanta sumaj willanasta willararkancu. Ashqha runastaj Jesuspi japꞌicuspa payta casorkancu. Chaymanta Pablo Bernabewan cutimorkancu Listra, Iconio, Antioquía, chay quinsa llajtasman. 22 Chay llajtaspi Jesuspi japꞌicojcunata sonkoncupi callpacharkancu. Yuyaycharkancutaj paycunaka Cristota casuspapuni causanancuta. Chantapis nerkancu: “Dios camachin, chaymanka sinchꞌita muchuspa yaycunanchej tiyan”, nispa. 23 Cristopi hermanos tantacoj cancu, chaypi Pablo Bernabewan curajcunata churarkancu sapa uj tantacuypaj. Mana imata miqhuspa Diosmanta mañaporkancu. Señor Jesucristopi ñapis japꞌicuskancu tucuy paycunata wakaychananpajtaj paymanta mañaporkancu.
Pablo Bernabewan waj Antioquía llajtaman cutimpuncu
24 Chanta Pisidia jallpꞌanejta pasaspa Panfilia jallpꞌaman chayarkancu. 25 Perge llajtapi Jesusmanta willaraspataj Atalia llajtaman uraycamorkancu. 26 Chanta barcopi yacusnejta rerkancu Siria jallpꞌapi caj Antioquiaman. Chaypi hermanos ñaupajpi mañapuskancu ruwaynincupi Dios paycunata yanapananpaj. Cunantaj ruwanancuta tucuspaña chay llajtaman cutimporkancu. 27 Pablo Bernabewan Antioquía llajtaman chayampuspataj Cristopi tucuy hermanosta tantacherkancu. Chaycunamantaj willarkancu Dios paycunawan tucuy ruwaskanta. Willarkancutaj imaynata Dioska willaraskancunejta ricuchiskanta waj llajtayojcunatapis Jesuspi japꞌicuyta atiskancuta. 28 Chaypitaj paycuna Cristota casojcunawan unayta khepacorkancu.