Tantacoj hermanos Bernabeta Saulotawan churancu willaranancupaj
13
Antioquiapi tantaska hermanosmanta carkancu Diospa niskanta willajcuna, yachachejcuna ima. Carkancu Bernabé, yana runa niska Simón, Cirenemanta Lucio, camachej Herodeswan cusca uywaska caj Manaén, Saulopiwan. 2 Uj pꞌunchaypi paycuna mana imata miqhuspa tantaskas Diosta yupaychasharkancu mañacusharkancutaj. Ajinapitaj Santo Espíritu paycunata parlapayarka:—Nokapaj ruwanancupaj tꞌakapuwaychej Bernabeta Saulotawan. Paycunatamin chaypaj wajyarkani, —nispa.
3 Chanta Diosta yupaychanapaj mana miqhuspa paymanta mañacorkancu. Ajinapi maquisnincuta chay ajllaska runaspa umasnincuman churarkancu ricuchispa Diospaj ruwanancupaj churaskas caskancuta. Chaymanta paycunata cacharparerkancu.
Chiprepi willarancu
4 Khepanta Santo Espíritu rinancuta niskanraycu Bernabé Saulowan Seleucia llajtaman uraycamorkancu. Chaymanta yacunta barcopi rerkancu Chipre jallpꞌaman. 5 Chayman chayaspataj kocha canto Salaminapi willarayta kallarerkancu. Chaypi Diospa sumaj willanasninta israelcunaj tantacuna-wasisnincupi willararkancu. Juan Marcospis paycunawan rispa yanapasharka. 6 Yacuwan muyuska, tucuy chay jallpꞌata purerkancu willaraspa. Pafos llajtaman chayarkancu. Chaypi tariparkancu uj israel runata. Payka Barjesús sutiyoj uj layka carka. Llullacuspa “Diospa willajnin cani”, nej. 7 Chay jallpꞌapi Sergio Paulo camacherka, sumaj yuyayniyoj runataj carka. Chay layka paywan caj. Camachej Sergiotaj munarka yachayta Diospa sumaj willanasninta. Chayraycu wajyacherka Bernabeta Saulotawan. 8 Chay laykarí paycunata anchata jarcꞌarka. Griego parlaypi sutenka, Elimas, layka niyta munan. Camachejtataj Jesuspi ama japꞌicunanpajpis atiskanta yuyaychasharka. 9 Saulorí, ujnin sutinpis Pablo, Santo Espirituwan juntꞌa yuyayninpi callpachaskaa carka. Ajinataj laykata allinta khawaycuspa 10 nerka:
—¡Tucuyta pantachej llulla runa! ¡Sajrataj canqui! ¡Supay Satanaspa apaycachaskan! ¡Tucuy chekan cajta chejnicojpuni! ¿Runas Jesucristoj cheka munayninta casunancuta jarcꞌallanquipunichu? 11 Chay ruwaskayquimanta cunan tucuy atiyniyoj Señor Dios ñacꞌarichisonka. Ciegoman tucunqui. Intej cꞌanchayninta mana ricunquichu uj pꞌunchaycunapaj, —nispa.
Chaypachitantaj laykaka ñawisnin tutayaycojtin lakhapi ricucorka. Thamaycachaspataj uj pusaycachajta mascꞌacorka. 12 Chayta ricuspa Sergio Paulo Jesuspi japꞌicorka. Maytataj tꞌucorka Señor Jesuspa yachachinasninta uyarispa.
Pablo Bernabewan waj Antioquía llajtapi
13 Pabloka llancꞌaj-masisninwan yacunta rerkancu Pafos llajtamanta Perge llajtacama. Chay llajta Panfilia jallpꞌapi carka. Juan Marcosrí paycunata sakerparipuspa Jerusalén llajtaman cutiriporka. 14 Paycunataj rillarkancupuni Perge llajtamanta Pisidia jallpꞌapi Antioquía llajtacama. Chaypi caspataj samacuna pꞌunchaypi yaycorkancu tantacuna-wasiman. Tiyaycucorkancutaj. 15 Moisespa camachiskasninmanta unay willajcunaj kelkaskasnincumantawan leejta uyarerkancu. Khepanta tantacuypa curajcunan Pablota Bernabetawan nichimorkancu:
—Llajta-masis, ima yuyaychanapis tiyan nokaycupaj chayka, cunan niwaycu, —nispa.
16 Pablotaj sayaycucuspa maquinwan chꞌinyacunancuta mañaspa nerka:
—Israel llajta-masis, waj llajtasmanta Diosta tucuy casojcunawan, uyariwaychej. 17 Israel llajta yupaychan, chay Dioska unay tatasninchejta ajllacorka. Jatun llajtamantaj ashqhayacherka Egipto jallpꞌallapiraj forasteros cashajtincupis. Dios chaymanta jatun atiyninwan paycunata Egipto jallpꞌamanta orkhomorka. 18 Tawa chunca watatajina mana runa tiyacuna jallpꞌaspi paycunata pusaycacharka. May munacuywantaj pantaskasnincuta qhuyaspa muchorka. 19 Payka kanchis ayllucunata Canaán jallpꞌapi atipaspa tucucherka. Chay jallpꞌancutataj unay tatasninchejman koporka japꞌinancupaj. 20 Chaymanta churarka yuyaysapa chekanchajcunata camachinacupaj. Ajinata Dios unay tatasniycuta camachicherka tawa pachaj phishka chuncayoj watatajina unay willajnin Samuelcama. 21 Chanta unay israel tatas uj jatun camachejta mañacorkancu. Diostaj churarka Saulta tawa chunca watata camachinanpaj. Pay carka Benjamín ayllumanta Cispa wawan. 22 Diosrí Saulta wijchꞌuspa Davidta churarka camachinanpaj. Paymantataj allinta parlaspa nerka: “Cay David Isaipa wawanka sonkoymanjinamin. Pay tucuy munayniymanjina ruwanka”, nispa. 23 Chay Davidpa khepa alchhisninmanta Jesús carka. Paytataj Dios churarka israel llajtanta juchamanta cacharichinanpaj sumaj niskanmanjina. 24 Juan jamorka Jesuspa ñaupakenta. Pay willararka tucuy israel runasman millay causaynincumanta Diosman cutiricunancuta. Cutiriskancuta ricuchinancupajtaj yacupi bautizacunancuta willararka. 25 Payllataj willayninta tucuchashaspa nerka: “Diospa ajllaskanta suyashaskayquichejka mana nokachu cani. Manachayrí khepayta jamojmin. Diospa cꞌata Wawan caskanraycu mana paypajka camachinpajjinallapischu cani”, nispa.
26 ‘Llajta-masis, Abrahammanta jatun tatanchej cajcuna, Diosta tucuy casojcunawan: Cay sumaj willanaska nokanchejman apachimuskamin wiñay causayniyoj cananchejpaj. 27 Chay Jerusalén llajtapi tiyacojcuna curajcunancuwan mana yacharkancuchu Jesús juchamanta Cacharichej caskanta. Nitaj entienderkancuchu unay willajcunaj kelkaskasnincuta sapa samacuna pꞌunchay leespapis. Ajinapi chay sutꞌinchaskas juntꞌacorkancu Jesusta wañunanpaj juchachaskancuwan. 28 Camachejcuna Jesuspi wañunanpajjina juchata mana tarerkancuchu. Chaywanpis Jerusalencuna curajcunancuwanka mañarkancu Pilato payta wañuchinantapuni. 29 Ajinapi chay ruwaskancuwan juntꞌacorka Jesusmanta tucuy unay kelkaskas. Chanta Jesuspa yachacojcunan payta chacatanamanta uraycuchispa pꞌampaycorkancu. 30 Diosrí wañuymanta causarichimorka. 31 Galilea jallpꞌamanta Jerusalén llajtaman Jesuswan cusca rejcunaka causarimpuskanmanta ashqha pꞌunchaycunata payta ricorkancu. Cunantaj israel runasman paymanta willajcuna cancu.
32 ‘Nokaycupis sumaj willanasta kancunaman willashaycu unay israel tatasninchejman Diospa sumaj niskanta. 33 Nokanchej, paycunaj khepa alchhisninmantaj Dios sumaj niskanta juntꞌarka Jesusta causarichimuspa. Iscay caj taquinapi Jesusmanta Dios nin:
Waway canqui.
Cunan pꞌunchay noka kanta jatunchayqui.b
34 Ajinata Dios nerka Jesusta causarichimunanta, cuerpon ni jaycꞌaj ismunanpaj. Chayraycu nillarka: “Kancunata yanapaskayquichej Davidman sumaj niskaymanjina”, nispa. 35 Chayraycu ujnin caj taquinapi nillantaj: “Ajllaska runayquej cuerpontaka mana ismunanta sakenquichu”, nispa. 36 Ciertopuni Davidka causaj-masisninta sumajta yanaparka Diospa munayninmanjina. Chanta wañupuspa tatasninwan cusca pꞌampacorka. Paypa cuerpontaj ismuporka. 37 Diospa causarichimuskan, Jesuspa cuerponrí mana ismorkachu. 38 Llajta-masis, chayraycu yachanayquichej tiyan willaraskayka Jesusnejta runas juchasnincumanta llimphuchaskas canancuta. 39 Moisespa camachiskasninta casuspallaka runa mana atinchu juchasninmanta llimphuchaska cayta. Jesuspi tucuy japꞌicojllata, juchasninmanta llimphuchaska caskanraycu chekan runapaj Dioska khawan. 40 Khawacuychej allinta. ¡Pajtataj unay willajcunaj niskasnincu kancunamantapis canman! Dios paycunata kelkacherka:
41 ¡Allinta khawacuychej nokamanta asicojcuna!
Noka Dios cani.
May jatun tꞌucunata ruwashani ñaupakeyquichejpi.
Ujcuna willasunquichejman chaypis, manapuni creenquichejchu.
Chayraycu ¡ruwaskasniymanta tꞌucushaspapis wiñaypaj chincapunquichej!
42 Pablo Bernabewan chay willanasta tucuchaspa llojsipusharkancu tantacuna-wasimanta. Runastaj paycunata mayta mañacorkancu cutimunancuta khepan samacuna pꞌunchayta paycunaman astawanraj willanancupaj. 43 Tantacuy tucucojtintaj ashqha israel runas paycunata khaterkancu, israelpa Diosninta yupaychajcunaman tucojcunapis. Pablo Bernabewantaj tucuy paycunata yuyaycharkancu cꞌacha Diospa yanapaynillanwanpuni causacunancuta.
44 Khepan samacuna pꞌunchaytataj tantacorkancu yakhalla tucuy llajtantin. Paycuna munarkancu uyariyta Diospa palabranta. 45 Israelcunaka sinchꞌita phiñacorkancu chhica runa Pablota uyarej riskanmanta. Chayraycu churanacorkancu Pabloj niskasninpa contranpi sajrata parlaspa. 46 Callpachacuspa Pablowan Bernabewantaj nerkancu:
—Kancuna israelcunaman ñaupajta willanaycu carka Diospa palabranta. Kancunarí payta mana japꞌicorkanquichejchu. Mana wiñay causayniyojpajjinapischu khawacunquichej. Chayraycu waj runasman ripusajcu. 47 Cayjinatamin Señor Dios camachiwarkaycu:
Uj cꞌanchaytajina churayqui tucuy runas yachanancupaj juchancumanta cacharichiyta munaskayta.
Tucuy cay pachapi runasman wiñay causaymanta willanayquipaj cacharkayqui.
Ajinata Pablo Bernabewan parlarkancu.
48 Chayta uyarispataj mana israelcuna cusicorkancu:
—Señor Diospa niskanka may sumajmin, —nispa.
Wiñay causaypaj tucuy ajllaskaña cajcunataj Jesuspi japꞌicorkancu. 49 Señorpa palabranka tucuy chay jallpꞌapi tiyacojcunaman willaraska carka. 50 Chay israelcunarí mascꞌasharkancu imaynatachus ñacꞌarichiyta Pablota Bernabetawan. Diosta mascꞌaj, khapaj warmisman, llajtapi khapaj runasmanwan yuyayta korkancu Jesuspa cachasninta ñacꞌarichinancupaj. Ajinapi llajtancumanta wijchꞌorkancu. 51 Chanta Pablo Bernabewan ojotꞌasnincuta thalaycorkancu ricuchinancupaj chay runas juchawan juchachaskas caskancuta. Iconio llajtamantaj riporkancu. 52 Jesuspi japꞌicojcunaka Antioquiapi may cusiskas carkancu Dios Espirituwan juntꞌataj.