Runas astawan ñacꞌarichincu Cristopi hermanosta
12
Chay pꞌunchaycunapi camachej Herodes ñacꞌarichiyta kallarerka Cristopi tantacojcunamanta waquin hermanosta. 2 Juanpa wauken Jacobotapis uj jatun makana cuchillowana wañuchicherka. 3 Herodesrí repararka israelcunata chay ruwaskanwan cusichiskanta. Chayraycu Pedrotapis japꞌiycucherka israelcunaj jatun pꞌunchaycunancupi. Chay pꞌunchaycunapi paycunaka mana pokochinayoj tꞌantata miqhoj cancu. 4 Chanta Herodes wiskꞌacherka Pedrota carcelman. Chaypi chunca sojtayoj soldadosman jaywarka tawamanta tawa tuta pꞌunchay sumajta khawanancupaj. Yuyasharka Pedrota orkhomuyta israelcunaj ñaupakencupib juchachaska cananpaj pascua jatun pꞌunchaycuna pasaytawan. 5 Ajinapi Pedroka carcelpi wiskꞌaska casharka sumaj khawaska. Cristopi japꞌicuspa tantacoj hermanostaj tucuy sonkowan Pedropaj Diosmanta mañapushallarkancupuni.Angel orkhon Pedrota carcelmanta
6 Herodestaj kꞌayantin Pedrota runaspa ñaupakencuman orkhonan casharka. Chay tutataj Pedroka puñusharka iscay soldados chaupipi. Paycunaman wataska casharka iscay cadenaswan. Soldadostaj carcel puncupi sayasharkancu wakaychanancupaj. 7 Ajinallaman Dios cachamorka uj willaj angelta. Sumaj cꞌanchaytaj riqhurerka carcelpi. Chay angeltaj Pedrota maquinwan thalaspa rijchꞌaricherka. Nerkataj:
—¡Jataricuy uskhayta! —nispa.
—¡Chumpiycucuy! ¡Abarcasniyquita churacuy!
Pedrotaj casorka. Chanta angel nillarkataj:
—Ponchoyquita churaycucuy. Khatiwaytaj, —nispa.
9 Ajinamanta Pedro llojsispa risharka angelpa khepanta. Mana yacharkachu ruwacuskan chekachus manachus caskanta. Manachayrí yuyarka musphashaskanta chay angelwan. 10 Ajinapi angelwan llojserka ñaupaj caj wakaychaj soldados chayninta khepan cajtapis. Llajtaman llojsinapaj fierro puncuman chayamojtintaj chay puncoka payllamanta quicharicaporka paycunapaj. Llojsispataj ñanta purerkancu uj chhicanta. Chanta angel Pedrota ujllata sakerpayaporka. 11 Pedrotaj yuyayninman churacuspa nerka:
—Cunan chekamanta yachani Señor Dios angelta cachamuskanta Herodespa maquinmanta khechunawanpaj. Israelcuna ñacꞌarichiwayta tucuy munaskancumantapis jarcꞌawarka, —nispa.
12 Chay ruwacuskanta reparaspa Maríaj wasinman rerka. Cay Mariaka Juan Marcospa maman carka. Chaypitaj ashqha tantaska hermanos Diosmanta mañapusharkancu Pedropaj. 13 Calle puncuta tocajtintaj uj camachi warmi, Rode sutiyoj, llojserka uyarej. 14 Payri Pedrota parlaskanmanta rejsirpaspa cusiymanta puncuta mana quicharkarajchu. Manachayrí uqhuman correycuspa paycunaman willamorka Pedro puncupi cashaskanta. 15 Wasipi cajcunataj nerkancu:
—¡Manachá yuyayniyquipichu cashanqui!
Paypuni caskanta nisharka. Hermanosrí ninacorkancu:
—Ni paychu canman. Paypa wakaychaj angelninchá, —nispa.
16 Chaycamataj Pedroka puncuta tocamushallarkapuni. Paycuna puncuta quichaspa Pedrota ricuspataj tꞌucorkancu. 17 Payrí maquinwan chꞌinyanancuta nerka. Paycunaman willarkataj imaynata tucuy atiyniyoj Señor payta carcelmanta orkhomuskanta. Nerkataj:
—Caycunata Jacoboman willamuychej chay waquin hermanosmanpis, —nispa.
Llojsispataj Pedro wajnejman riporka.
18 Sutꞌiyajtincamataj carcel soldados uqhu sinchꞌita chꞌajwarkancu Pedromanta yachayta munaspa. 19 Herodeska Pedrota mascꞌacherka. Soldadosninrí payta mana tariyta aterkancuchu. Khawaj soldadosta sumajta tapuspataj camacherka paycuna wañuchiskas canancuta. Chay pasayta riporka Judea jallpꞌamanta Cesarea llajtaman tiyacoj.
20 Camachej Herodestaj ancha phiñaska carka chay Tirowan, Sidón jallpꞌapiwan tiyacojcunapaj. Paycunaj curajcunancuri uj yuyaylla churacorkancu Herodespaman rinancupaj. Herodeswan allinyacuynincupi yanapananpajtaj Blastowan munachicorkancu. Chay Blastoka Herodespa wasinpi jatun camachi carka. Herodespa jallpꞌasninmanta jamoj miqhunawan causaskancuraycu allinyacuyta munarkancu. 21 Herodeska paycunawan parlananpaj uj pꞌunchayta ajllarka. Chay pꞌunchaypitaj camachinan pꞌachasta churaycucorka. Camachina tiyananpi tiyaycuspataj parlamorka. 22 Runastaj khaparerkancu:
—Parlamushan, payka uj diosjinamin, manataj runajinallachu, —nispa.
23 Chaypachitataj Señor Diosmanta uj cachamuska angel onkoycucherka Herodesta. Diosta mana jatunchaskanraycu qhuruycuskataj wañorka.
24 Diospa sumaj willanasnintarí astawan ashqhas uyarerkancu japꞌicorkancutaj.
25 Bernabewan Saulowan ruwanancuta juntꞌarkancu. Chanta Juan Marcostawan pusaspa Jerusalén llajtamanta cuterkancu.