—Cay runapi tarerkaycu llajtaycuta romano camachejpa contranpi chꞌajwachej caskanta. Camachejman impuestota konaycuta jarcꞌan. Nicunpis pay camachej Cristo caskanta, —nispa.

3 Pilatori Jesusta taporka:

—¿Kanchu israelcunaj camachejnin canqui?

Jesustaj payman cuticherka:

—Kan ninqui, ajinamin, —nispa.

4 Pilatotaj yupaychana-wasimanta curajcunaman chaypi caj ashqha runasmanwan nerka:

—Cay runapeka mana ni ima juchatapis tarinichu, —nispa.

5 Paycunarí sinchꞌita nisharkancu:

—Tucuy Israel jallpꞌapi Galilea jallpꞌamanta kallarispa caycamapis yachachispa chꞌajwachishallanpuni, —nispa.

6 Cayta uyarispa Pilatoka taporka:

—¿Cay runa Galileamantachu?

7 Galileamanta nejtincutaj, Pilatoka Jesusta cacharka camachej Herodesman. Herodeska Galilea runaspa camachejnincu carka. Payka chay pꞌunchaycunapi Jerusalenpi casharka.

8 Jesusta ricuspataj mayta cusicorka. Unayña Jesusmanta runas parlaskancuta uyariskanraycu ricuyta munajpuni. Cunanka ñaupakenpi Jesuspa ruwaskan ima ricuchinallatapis ricuyta munasharka. 9 Ashqha tapunastapis Jesusta tapusharka. Jesusrí Herodesmanka ni imata cuticherkachu. 10 Chaypi casharkancu yupaychana-wasimanta curajcuna israel yachachejcunapiwan. Paycunaka sinchꞌiwan tumpasharkancu Jesusta. 11 Herodestaj soldadosninpiwan Jesusta manacajpaj khawarkancu. Asipayanancupajtaj camachejpa pꞌachanwanjina pꞌachalliycucherkancu. Ajinatataj watejmanta Pilatoman cacharka. 12 Chay pꞌunchaypi Herodeswan Pilatowanka allinyanacaporkancu; ñaupajpeka phiñanaska carkancu.

13 Pilatoka chay curajcunata, runastawan tantachimuspa 14 nerka:

—Cay runata pusamuwarkanquichej “runasta chꞌajwachej” nispa. Nokarí ñaupakeyquichejpi chꞌataskayquichejmanta khawaspa,^a cay runapeka ni ima juchatapis tarerkanichu. 15 Nillataj Herodespis juchayoj caskanta tarerkachu. Chayraycu cutichimorka. Uyariychej, ni imatapis wañunanpajjinaka ruwarkachu. 16 Chayraycu sekꞌochispa cacharipusaj, —nispa.

17 Pascua pꞌunchaycunapi Pilatoka costumbrencumanjina cacharinan caj wiskꞌaska runasmanta ujta. 18 Tucuy chay runastaj cusca sinchꞌitapuni khaparerkancu:

—¡Wañuchiy chay runataka! Barrabastataj cacharipuwaycu, —nispa.

19 Chay Barrabaska runasta llajtapi chꞌajwachiskanmanta runa wañuchiskanmantawan wiskꞌaska carka.

20 Pilatoka Jesusta cacharichiyta munaspa ujtawan chꞌajwaj runasman khaparerka. 21 Paycunarí aswan sinchꞌita khaparerkancu:

—¡Payta chacataycuy, payta chacataycuy! —nispa.

22 Quinsa caj cutita Pilato paycunaman nerka:

—¿Ima mana allintataj ruwarkarí? Ni imatapis wañunanpajjina paypi tarerkanichu. Chayraycu sekꞌochispa cacharipusaj, —nispa.

23 Paycunarí Jesús chacataska cananta sinchꞌita khaparishallarkancupuni. Paycunataj khapariskancuwan Pilatota atirparkancu. 24 Ajinata Pilatoka camacherka mañaskancumanjina ruwaska cananta. 25 Paycunaj mañaskancu Barrabasta cacharerka. Payka runasta chꞌajwachiskanmanta runa wañuchiskanmantawan carcelpi wiskꞌaska caj, chay runa carka. Jesustarí jaywaycorka khaparejcunaj munaynincumanjina wañuchiska cananta.

26 Jesusta pusashajtincu Cirene llajtayoj Simonpis Jerusalenman yaycumushallarkataj. Soldadosri payta camacherkancu chacatanata lijraycucuspa Jesuspa khepanta apananta.

27 Ashqha runas khatisharkancu. Warmispis may phutiywan Jesusmanta wakaspa risharkancu. 28 Jesusrí paycunaman cutirispa nerka:

—Jerusalén llajtayoj warmis, ama nokamantaka wakaychejchu. Astawanka wakaychej kancuna quiquiyquichejmanta wawasniyquichejmantawan. 29 Uyariwaychej: Jamoj pꞌunchaycunapitaj runaska nenkancu: “Cusiskas cancu mana wawa rejsejcunaka, mana ñuñuchejcunapis”. 30 Chanta runas niyta kallarenkancu orkosta: “¡Pꞌampaycuwaycu!” Lomastataj: “¡Pacaycuwaycu!” nispa. 31 Mana juchayoj runa kꞌomer sachꞌatapis cayjinata cunan ruwashancu. Khepatarí ¿imaynapunichus chꞌaqui sachꞌapi ruwaconka?

32 Jesusta iscay sajrata ruwajcunatawan pusarkancu wañuchiskas canancupaj.

33 Llajta jawa Tꞌojlu niska lugarman chayaspa soldados chacatarkancu Jesusta chay iscay runa wañuchi suwastawan. Chacatarkancu ujninta Jesuspa pañannejpi ujnintataj llokꞌennejpi, sapa ujta waj chacatanapi. 34 Jesustaj payta chacatashajtincu nisharka:

—Tatáy, paycunata perdonay ruwashaskancuta mana yachaskancuraycu, —nispa.

Soldadostaj paycunapura suerteta chokarkancu yachanancupaj pipajchus Jesuspa pꞌachasnin cananta.

35 Runastaj sayaskas khawasharkancu. Curajcunari Jesusta manacajpaj khawaspa asipayarkancu. Nisharkancutaj:

—Wajcunata cacharicherka. Sichus chay runa Cristo, Diospa ajllaskan chayka, pay quiquinta cacharichicuchun, —nispa. 36 Soldadospis Jesusta asipayashallarkancutaj, akhancuta ujyachinancupaj kayllaspa. 37 Paycuna nisharkancu:

—Sichus kan israelcunaj camachejnin canqui chayka, kan quiquiyquita cacharichicuy, —nispa.

38 Tucuy runas yachanancupaj imaraycuchus Jesús chacataska caskanta uman patanejpi kelkaska carka: Cay runaka israelcunaj camachejninmin.

39 Runa wañuchi suwas warqhuska casharkancu, paycunamanta ujnintaj Jesusta millayta cꞌamisharka:

—¿Manachu kanka Diospa ajllaskan Cristo canquirí? Cacharichicuy, nokaycutapis cacharichiwaycu, —nispa.

40-41 Ujninrí payta rimaspa nerka:

—¿Manachu kan Diosta manchachicunqui? Nokanchej juchanchejmanjina juchachaskas canchej ñacꞌarinapajjina ruwaskanchejraycu. Cay runarí ni ima mana allintapis ruwarkachu, —nispa.

42 Jesustataj nerka:

—Jesusníy, camachinqui, chaypacha yuyaricuway, —nispa.

43 Jesustaj payman cuticherka:

—Chekatapuni niyqui cunan pꞌunchaymin janaj pachapi nokawan cusca canayquita, —nispa.

44 Chaupi pꞌunchayjinaña cashajtin tucuy jallpꞌapi lakhayaycorka chaupi tardecama. 45 Intipis mana cꞌancharkañachu. Yupaychana-wasipi warqhuska caj khatanaka cuscanninmanta iscayman lliqꞌicorka. 46 Jesustaj sinchꞌita khaparerka:

—Tatáy, maquisniyquiman causayniyta jaywacuyqui, —nispa.

Chayta nispataj tucucaporka.

47 Romano capitán chayta ricuspa Diosta yupaycharka. Nerkataj:

—Chekamanta payka chekan runa carka, —nispa.

48 Tucuy chay ashqha khawaj jamojcuna ruwaskancuta ricuspa llajtaman cutipusharkancu. Phuticuskancuta ricuchinancupaj pechoncuta tacacuspa risharkancu. 49 Jesuspa tucuy allin rejsiskasnin carunejpi sayacusharkancu ruwacuskanta ricunancupaj. Galileamanta Jesusta khatimoj warmispis chaypi casharkancu.

50 Carka uj runa israel curajcunaj tantacuyninmanta, José sutiyoj. Cꞌacha runa chekanta ruwaj carka. 51 Payka curajcunaj yuyaskancuwan ruwaskancuwanpis mana ujllachu carka. Israel llajta Arimateamanta carka. Dios tucuy runasta camachinanta mayta munaj. 52 Payka camachej Pilatoman rispa Jesuspa cuerponta mañarka apacapunanpaj. 53 Chacatanamanta uraycuchispataj linomanta awaskawan maytꞌuycorka. Chanta uj orko rumipi juscꞌuska pꞌampanaman Jesusta pꞌampaycorka. [Jatun muyu pꞌalta rumitataj pꞌampana puncuman churarka.]^b Chay pꞌampanapeka ni uj ayapis churaskarajchu carka. 54 Samacuna pꞌunchaypis kallaricusharkaña. Waquichicuna pꞌunchay carka.

55 Galileamanta Jesuswan jamoj warmispis Joséj khepanta khaticorkancu. Ricorkancutaj pꞌampana juscꞌuta, imaynatachus Jesús pꞌampaska caskantapis. 56 Llajtaman cutimuspataj kꞌapajcunata jawinatawan waquicherkancu. Samacuna pꞌunchaypiri Diospa camachiskanmanjina samacorkancu.