3 Jesuspa chunca iscayniyoj cachasninmanta Iscariote niska Judaska ujnin caj carka. Supay Satanasrí sonkonman yaycorka. 4 Ajinapi payka yupaychana-wasimanta curajcunawan, guardia camachejcunawan parlamorka Jesusta jaywaycunanpaj. 5 Paycunataj mayta cusicuspa Judasta nerkancu:

—Jaywawaskaycumanta kanman kolketa kosajcu, —nispa.

6 Judastaj nerka:

—Allin canka, —nispa.

Chanta mascꞌasharka imaynapichus pacayllamanta Jesusta jaywaycuyta chay ashqha runas mana yachashajtillancu.

7 Mana pokochinayoj tꞌanta pꞌunchay chayamorka. Chay pꞌunchaypeka pascua corderota wañuchinancu caj. 8 Jesuska Pedrota Juantawan nerka:

—Rispa, pascua miqhunata miqhunanchejpaj waquichimuychej, —nispa.

9 Paycunataj payta taporkancu:

—¿Maypitaj munashanqui chay miqhunata waquichinaycuta?

10 Paytaj paycunata nerka:

—Uyariwaychej: Llajtaman yaycuspa uj yacu pꞌuñuta apaj runawan tincunquichej. Payta khatiychej maymanchus yayconka, chay wasiman. 11 Chay wasiyojtataj niychej: “Yachachejninchej nisunqui: ‘¿Maypitaj cashan chay sala yachacojcunaywan pascua miqhunata miqhunaypaj?’ ” 12 Paytaj uj allinchaska jatun salata alto pisopi ricuchisonkachej. Chaypi waquichimuychej nokanchejpaj, —nispa.

13 Yachacojcunataj llajtaman rispa tucuy imata Jesuspa niskanmanjinata tarerkancu. Pascua miqhunatataj waquichimorkancu.

14 Miqhunancupaj hora chayamojtin, Jesús tiyaycucorka cachasninwan. 15 Paycunata nerka:

—Maytapuni munarkani kancunawan cay pascua miqhunata miqhuyta manaraj noka ñacꞌarishaspa. 16 Chekatapuni manaña ujtawan cay pascua miqhunata miqhusajchu Dios tucuyta camachin, chaypi miqhunaycama. Chay pꞌunchaypi Diospa mosoj traton runasninpaj juntꞌaconka, —nispa.

17 Chanta Jesuska copata japꞌispa Diosman graciasta kospataj nerka:

—Cay ujyanata japꞌiychej ujyacuychejtaj. 18 Niyquichej: Cunanmantapachaka cay uvasmanta ruwaskata manaña ujyasajchu Dios tucuyta camachejtin, chay pꞌunchaycama, —nispa.

19 Tꞌantata maquisninwan japꞌispataj Diosman graciasta kospa tꞌantata parterka. Cachasninman jaywaspataj nerka:

—Cayka cuerpoy ninacun. Kancunaraycu koska cashan. Cayta ruwaychej miqhuspa nokamanta yuyaricunawayquichejpaj, —nispa.

20 Miqhuskancumanta Jesús quiquillantataj copawan ruwaspa nerka:

—Cay copaka Diospa mosoj tratonmin. Yawarniyka traton atiyniyoj cananpaj jichꞌaskamin cashan ama wiñaypaj wañunayquichejpaj.

21 ‘Chaywanpis cunanka jaywaycojniypa maquin maquiywan cusca mesapi cashan. 22 Noka, Diospa cachaska Runanka, paypa yuyaskanmanjina wañunay tiyan. Astawanpis ¡phutiy, ari, chay jaywaycojpajka! —nispa.

23 Cachasnintaj tapunacuyta kallarerkancu maykennincuchus chayjina sajrata ruwaj rishaskanmanta.

24 Chanta cachasnin churanacusharkancu pichus paycuna uqhupi aswan curajpaj khawaska cananmanta. 25 Jesusrí paycunata nerka:

—Llajtasta camachejcuna runasta llaquichispa camachincu. Chaywanpis allin imasta ruwaj, nichicuytaraj munancu. 26 Kancuna uqhupirí mana ajinachu canka. Astawanpis kancuna uqhupi curaj cajka sullcꞌajina cachun. Camachejtaj yanapajjina cachun. 27 ¿Miqhunapaj tiyacojchu chayrí miqhunata jaywajchu astawan curajpaj khawaska? Miqhunapaj tiyacojmin astawan curajpaj khawaska cashan. Nokarí yanapajniyquichejjina kancuna uqhupi cashani.

28 ‘Nokawan cuscapuni cacorkanquichej ñacꞌarishajtiy. 29 Ñacꞌariskaymanta Tatay Dios camachinaypaj churawanka. Quiquillantataj nokapis camachinayquichejpaj churaskayquichej. 30 Ajinapi camachishajtiy nokawan cusca miqhunquichej ujyanquichej. Churaskayquichejtaj chunca iscayniyoj Israel ayllusta camachinayquichejpaj,^b —nispa.

31 Jesús nerka:

—Simonníy, uyariway. Supay Satanás kancunata sinchꞌi llaquiycunawan^c juchaman urmachisunanpaj mañarka. 32 Nokari kanpaj Diosmanta mañaporkayqui, Diospi japꞌicuyniyqui ama chincapunanpaj. Nokaman cutiricamuskayquimanta cay hermanosniyquita sonkoncupi callpachanqui, —nispa.

33 Simonrí payta nerka:

—Señorníy, kanwan cusca rinaypaj carcelmanpis wañuymanpis waquichiska cani, —nispa.

34 Jesusrí payta nerka:

—Kanta niyqui, Pedro, cunan tutapacha manaraj gallo wakashajtin quinsa cutita ninqui nokata mana rejsiwaskayquita, —nispa.

35 Jesús cachasninta nerka:

—Ñaupajpi willarajta cacharkayquichej mana kolke churanayojta ni wayakayojta ni ojotꞌasniyojta. Chaypacha ¿imapis pisisorkachejchu?

Cuticherkancutaj:

—Ni imapis pisiwarkaycuchu, —nispa.

36 Chanta paycunata nerka:

—Cunanrí kolke churanayoj caj chayrí wayakayoj apacuchun. Mana jatun cuchilloyoj^d cajtaj pꞌachanta vendechun ujta rantinanpaj. 37 Imaraycuchus cay kelkaskaka nokapi juntꞌacunan tiyan: “Payka yupaska carka juchasapaswan cusca”. Cay pachapi ruwanasniy tucucapun, —nispa.

38 Paycunarí nerkancu:

—Señorníy, khaway, caypi iscay jatun cuchillos^e tiyan, —nispa.

Jesustaj paycunata nerka:

—Chayllaña cachun, —nispa.

39 Jesús wasimanta llojsispa Olivos orkoman rerka, rej caskanmanjina. Yachacojcunapis khatillarkancutaj. 40 Chayman chayaspataj paycunata nerka:

—Diosmanta mañacushaychej ama juchaman urmanayquichejpaj, —nispa.

41 Paycunamanta caruncharicuspa uj rumi chokaymanjina Jesús konkoricorka. Diosmantataj mañacusharka:

42 —Tatáy, munanqui chayka, cay ñacꞌariypi wañunayta nokamanta khechupuway. Astawanpis ama munayniyka ruwacuchunchu. Manachayrí munayniyqui ruwacuchun, —nispa.

43 Janaj pachamanta uj angel riqhurispa payta callpacharka. 44 Jesús sonkonpi mayta ñacꞌarispa aswan sinchꞌita mañacusharka. Jumpꞌintaj sutꞌuspi yawarjina pampaman urmarka.

45 Jesús Diosmanta mañacuskanmanta jatarispa yachacojcunanman cuterka. Paycunata phutiywan puñuskasta tariparka. 46 Chanta nerka:

—¿Imaraycutaj puñushanquichej? Jatarispa Diosmanta mañacuychej ama juchaman urmanayquichejpaj.

47 Jesús parlashajtillanraj, ujllata ashqha runas riqhurimorkancu. Judas paycunata pusamusharka. Payka chunca iscayniyoj yachacojcunamanta ujnin carka. Jesusman kayllamuspataj muchꞌaycorka. 48 Jesusrí payta nerka:

—¿Judas, uj muchꞌawanchu jaywaycunqui Diospa cachaska Runanta?

49 Jesuswan cashajcunaka repararkancu imatachus chay runas ruwanayashaskancuta. Chayraycu nerkancu:

—Señorníy, ¿cuchillosniycuwan^f wajtasajcuchu?

50 Paycunamanta ujnintaj cuchillonwan^g wajtaspa uj runaj paña ningrinta kholurparerka. Chay runari yupaychana-wasipi camachejpa camachin carka. 51 Jesusrí yachacojcunanta nerka:

—Chayllata. Sakellaychej paycunata.

Cayta nispataj chay camachej kholuska ningrinta llanqharispa thañicherka.

52 Yupaychana-wasimanta curajcuna, yanapajcunancuwan israel curajcunapiwanpis japꞌiycoj jamuspa chaypi casharkancu. Jesustaj paycunata nerka:

—¿Jatun cuchilloswan^h makana cꞌaspiswan uj runa wañuchi suwamanjinachu jamuwanquichej? 53 Sapa pꞌunchay kancunawan casharkani yupaychana-wasi patiopi manataj japꞌiycuwarkanquichejchu. Cunanrí atillanquichej, supay lakhaj atiyninwan camachishajtin, —nispa.

54 Jesusta japꞌispataj yupaychana-wasipi camachejpa wasinman apaycorkancu. Pedrorí chayman caru khepallanta khaticusharka. 55 Runastaj uj sumaj ninata japꞌicherkancu patio chaupipi. Paycuna chaupincupitaj Pedro tiyacusharka kꞌoñicuspa. 56 Chaypitaj uj camachi warmi Pedrota nina cꞌanchaypi tiyacushajta ricorka. Allinta Pedrota khawaspataj nerka:

—Cay runapis Jesuswan casharka, —nispa.

57 Pedrorí mananchacorka:

—Mana rejsinichu paytaka, —nispa.

58 Unitaymantawan uj runapis Pedrota ricuspa nerka:

—Kanpis Jesuspa yachacojcunanmanta ujnin canqui, —nispa.

Pedrorí cuticherka:

—Manapuni, tatáy, —nispa.

59 Uj horamantajinataj waj runa aswan sinchꞌita nerka:

—Chekatapuni yachani cay runaka Jesuswan cashaskanta paypis Galileamanta caskanraycu, —nispa.

60 Pedroka nerka:

—Tatáy, mana yachanichu imatachus nishanqui, —nispa.

Chay quiquinpachataj Pedro parlashajtillanraj galloka wakarka. 61 Señortaj cutiricamuspa Pedrota khawarimorka. Chaytaj yuyaricherka Pedrota Señorpa niskanta: “Cunan tutapacha manaraj gallo wakashajtin kanka quinsa cutita ninqui nokata mana rejsiwaskayquita”, nispa. 62 Pedrotaj llojsispa sonko nanajta wakarka.

63 Wakaychaj camachis Jesusta sekꞌospa asipayarkancu. 64 Ñawisninta wataspataj tapusharkancu:

—Sutꞌinchaspa willawaycu pitaj makasorka, —nispa.

65 May ashqha waj sajra imastawan payta nisharkancu.

66 Tutamanta tucuy israel curajcuna tantacorkancu. Chay jatun tantacuymanⁱ Jesusta pusachimorkancu. 67 Nerkancutaj:

—Willawaycu ¿Diospa ajllaskan Cristochu canqui?

Payrí nerka:

—Sichus willayquichejman chaypis, mana creewanquichejmanchu. 68 Imata tapuyquichejman chaypis, manapuni cutichiwajchejchu nitaj cachariwanquichejmanchu. 69 Cunanmantapacharí noka, Diospa cachaska Runanka, curaj atiyniyoj Dioswan cusca camachisaj, —nispa.

70 Tucuy paycunataj taporkancu:

—Chanta ¿kanka Diospa Wawanchu canqui?

Paytaj nerka:

—Nishanquichejjina, noka Diospa Wawan cani, —nispa.

71 Chayraycu nerkancu:

—Manaña astawan willajcunata munanchejchu, caytaka quiquin siminmanta uyariskanchejraycu, —nispa.