—Chekatapuni niyquichej. Diospajka cay wajcha viudaj churaskan astawan carka tucuy ujcunajmanta niskaka. 4 Tucuy chay waj runas ashqha capuynincoj puchuskanmanta Diosman korkancu. Payrí wajcha cayninmanta tucuy kolkenta korka. Chayka causananpaj casharkapis, —nispa.

5 Waquin ninacusharkancu yupaychana-wasi may cꞌachitu caskanta. Imaraycuchus sumaj rumiswan, Diosman khapaj koskaswan ima, cꞌachachaska carka. Jesusrí nerka:

6 —Tucuy cay cꞌachitu rumi wasista ricushanquichej, chaycunaka urmachiskas cankancu. Jamoj pꞌunchaycunapi cay yupaychana-wasejta ni uj rumillapis sayashaj sakeskachu canka, —nispa.

7 Paycunataj Jesusta taporkancu:

—Yachachiwajníy, ¿maycꞌajtaj ajina cankarí? ¿Imastaj ricuchiwasajcu, chay imas canayashaskantarí?

8 Jesús cutichispa nerka:

—Sumajta khawacuychej ama pantachiskas canayquichejpaj. Ashqhas llullacuspa jamonkancu sutiypi. Nenkancu: “Nokamin Diospa ajllaskan Cristoka cani”; “Cunan chay pꞌunchay chayamunña”, nispa. Ama paycunaj khatejnincoka caychejchu. 9 Chaywanpis guerrasmanta uyarispa guerrasmanta parlajta uyarispapis ama manchachicuychejchu. Cay imaska ñaupajta cananpuni. Astawanrí manaraj tucucuyrajchu canka, —nispa.

10 Chanta nillarkataj:

—Uj ayllu waj aylloj contranpi okhariconka. Uj llajtayoj runas waj llajtayoj runaspa contranpi okhariconka. 11 Jallpꞌapis may sinchꞌita qharcatitenka. Caynejpi jakaynejpi yarkhaycuna, onkoycuna canka. Mancharinasta janaj pachamanta jatun ricuchinastawan runas riconkancu.

12 ‘Manaraj tucuy cay pasashajtintaj, runaska kancunata japꞌiycuspa ñacꞌarichisonkachej. Jaywaycusonkachej tantacuna-wasipi curaj runasman juchachaskas wiskꞌaycuskaspis canayquichejpaj. Camachejcunaman pusasonkachej sutiyraycu, nokaj yachacojcunay caskayquichejraycu. 13 Ajinapi kancunaka paycunaman nokamanta willarayta atinquichej. 14 Imatachus cutichinayquichejtarí ama ñaupajta yuyaychejchu. 15 Imaraycuchus noka quiquiymin yachayniyoj parlaycunata parlachiskayquichej. Chay niskasniyquichejta juchachasojcuna mana atipayta nitaj cutichiytapis atenkancuchu. 16 Tatasniyquichej, waukesniyquichej, ayllusniyquichej, amigosniyquichejpis enemigosniyquichejman jaywasonkachej. Kancunamanta waquinta wañurachisonkachej. 17 Tucuy runas chejnisonkachej, nokaj yachacojcunay caskayquichejraycu. 18 Chaywanpis ni uj chujchapis umayquichejmanta chincaponkachu. 19 Diospi japꞌicuspapuni allinta sayaskayquichejwan wiñay causayta japꞌinquichej.

20 ‘Soldados Jerusalenta muyuycamojta ricuspa yachanquichej cay llajtaka tucuchiskaña cananta. 21 Chaypacha Judea jallpꞌapi cashajcuna orkosman aykecuchuncu. Jerusalenpi cashajcuna llojsichuncu. Llajta jawapi cashajcunapis ama chayman yaycuchuncuchu. 22 Jakay pꞌunchaycunaka chaypi tiyacojcunaj juchancuraycu Dios sinchꞌita phiñaconka. Ajinapi Diospa tucuy kelkaskan paycunamanta juntꞌaconka. 23 ¡Phutiy, ari, jakay pꞌunchaycunapi wijsayoj warmispaj ñuñoj wawitasniyoj warmispajpis! Manchay ñacꞌariymin cay pachapi canka. Cay runaspaj Dios cꞌajajta phiñaconka. 24 Ashqhas jatun cuchilloswan^a wañurachiskas cankancu. Ashqhastaj waj llajtasman japꞌiycuska apaskas cankancu. Waj llajtayojcunaka Jerusalenta saronkancu chay niska pꞌunchaycuna tucucunancama.

25 ‘Cutimuyniypaj ricuchinas canka intipi, quillapi, chꞌaskaspiwan. Cay pachapi runaska mayta llaquiconkancu jatun kochaj chꞌajwaskanmanta khallacuskanmantawan. Manchachicuymantataj musphankancu. 26 Runaska cay pachawan imachus cananta manchachicuywan suyaspa wañunayashankancu. Cielopi cajcunata Dios cuyuchenka. 27 Chaymantamin runas ricuwankancu. Noka, Diospa cachaska Runanta, uj phuyupi jamushajta atiyniywan lliphipej cꞌanchaywanpis ricuwankancu. 28 Kancunarí chay imas kallaricojtin sumajta Diospi japꞌicuychej, nokata suyawaspa. Cachariska canayquichej pꞌunchayka kayllamushanña, —nerka Jesús.

29 Quiquinchaspataj nerka:

—Reparaychej higo sachꞌata tucuy sachꞌastapis. 30 Laphisnincu chꞌillchimojtinña yachanquichej kꞌoñi tiempo chayamushaskantaña. 31 Ajinallatataj kancunapis chay imasta ricuspa yachanquichej Dios tucuyta camachinanpaj chayamushaskanta. 32 Chekamanta niyquichej cunan pꞌunchay runas cashajtincuraj tucuy cayka ruwacunanta. 33 Janaj pacha cay pachapis chincaponkancu; niskasniyrí juntꞌaconkancupuni.

34 ‘Kancuna quiquiyquichejta sumajta khawacuychej. Pajtataj sonkoyquichej rumiyapunman. Pajtataj millay causaywan, machaywan, cay pacha causay imasmanta llaquicuywanpis atipachicuwajchej. Pajtataj ajinapi chay pꞌunchay mana yuyayllata kancunaman chayamusunquichejman. 35 Trampaka ujllata animalta japꞌiycun. Ajinallatataj jakay pꞌunchaypis tucuy cay pachapi tiyacoj runasman japꞌirparenka. 36 Kancunarí tuta pꞌunchay Diosmanta mañacuspa rijchꞌariskas caychej. Chaywan sonkoyquichejpi sumaj callpachaskas canquichej tucuy chay canayashajcunata muchunayquichejpaj. Ajinapi noka, Diospa cachaska Runanman jakay pꞌunchaypi chimpacuwanquichej, —nerka Jesús.

37 Pꞌunchaycunaka payka yupaychana-wasi patiopi yachachej. Tutastaj Olivos orkoman samacoj rej. 38 Tucuy runastaj tutamanta payta uyarej yupaychana-wasiman rej cancu.