—Niwaycu: ¿Ima atiywantaj cay imasta ruwashanqui? Chayrí ¿pitaj cay atiyta kosorka?

3 Jesusrí paycunaman cuticherka:

—Nokapis uj tapunata tapuskayquichej, kancunapis cutichiwaychej. 4 ¿Pitaj cachamorka Juanta runasta bautizananpaj? ¿Dioschu chayrí runaschu?

5 Paycunapura tanteyacuspa ninacusharkancu:

—Sichus nisunman Dios payta cachamuskanta chayka, Jesús tapuwasun: “¿Imaraycutaj paypa niskanta mana creerkanquichejchu?” 6 Sitajchus nisunman runas payta cachamuskancuta chayka, tucuy runas rumiwan chꞌankawasunchej. Imaraycuchus runaska tucuy sonkowanmin creencu Juan Diospa willajnin caskanta, —nispa tanteyacorkancu.

7 Chayraycu Jesusman cuticherkancu:

—Pichus payta cachamuskanta mana yachaycuchu, —nispa.

8 Jesustaj paycunata nerka:

—Ni nokapis willaskayquichejchu ima atiywanchus cay imasta ruwashaskayta, —nispa.

9 Jesús runasman cay quiquinchanawan parlayta kallarerka:

—Uj runa jallpꞌanpi ashqha uva sachꞌitasta yuracharka. Llancꞌaj runasman jallpꞌanta arrendarka pokoyninmanta konancupaj. Chanta jallpꞌayoj runaka unaypaj caru llajtaman riporka. 10 Uva pallana tiempotataj uj camachinta cacharka llancꞌajcunaman, uvasta payman konancupaj. Llancꞌajcunarí payta sekꞌospataj mana imayojllata cutichiporkancu. 11 Jallpꞌayojtaj ujnin camachinta cachallarkataj. Chay ujnintapis llancꞌaj runas sekꞌorkancu pꞌenkaytataj paywan ruwarkancu. Mana imayojllatataj cutichiporkancu. 12 Jallpꞌayoj runaka quinsa caj camachinta cachallarkataj. Llancꞌaj runasrí payta sinchꞌita makaycuspa jallpꞌamanta kharkorkancu.

13 ‘Chayraycu jallpꞌayoj señorka nerka: “¿Imanasajtaj? Munaska wawayta cachasaj. Camachisniyta khesacharkancu. Ichapis paytaka jatunpaj khawankancu”, nispa. 14 Llancꞌaj runasrí camachejpa wawanta ricuspa paycunapura tanteyanacusharkancu: “Cay wawanman cay jallpꞌa koska canka. Wañuchinachej chayaken nokanchejpata cananpaj”, nispa. 15 Jallpꞌamanta kharkospataj payta wañucherkancu.

‘Chanta ¿imanankataj uva jallpꞌayoj señorka chay llancꞌaj runastarí? 16 Cayta ruwanka: Jamuspa chay llancꞌaj runasta wañurachenka jallpꞌantataj wajcunaman arrendayconka, —nispa.

Chayta uyarejcunataj nerkancu:

—¡Ni jaycꞌaj ajinaka cachunchu! —nispa.

17 Jesusrí paycunata sinchꞌita khawaspa nerka:

—Cay kelkaskata ¿imaynatataj entiendenquichejrí? Nin: Wasichajcuna rumita khawaspa khesacharkancu. Wasita sinchꞌita sayachinanpajrí chay khesachaska rumeka aswan sumaj cashan tucuy waj rumismanta niskaka. 18 Chay rumiman urmacoj runaka tꞌunaska canka. Pimanchus chay rumi urmaycunman chayka, payta ñutꞌurparenka, —nispa.

19 Israel yachachejcunawan yupaychana-wasimanta curajcunawanka repararkancu Jesús chay quiquinchanata paycunamanta parlaskanta. Chayraycu payta japꞌiycuchiyta churacorkancu.

20 Curajcunarí Jesusta japꞌiycuyta munaspa sinchꞌita khawasharkancu. Chayraycu watekajcunaman kolketa kospa cacharkancu Jesusta parlaskanpi japꞌerkonancupaj. Chaywan curaj camachejpa atiyninman jaywaycuyta munarkancu. Watekajcunaka cꞌacha runasjinalla tucorkancu puraj uyas cashaspapis. 21 Paycunataj Jesusta nerkancu:

—Yachachej, yachaycu chekanta parlaskayquita yachachiskayquitapis. Runastapis mana rijchꞌacuynillanmantachu khawanqui, manachayrí caskancumanta. Astawanpis cheka cajta yachachishanqui imatachus Dios munan runas ruwanancuta chayta. 22 Cunan kan niwaycu: Nokanchej, israelcuna ¿romano gobiernoman impuestota konachus manachus?

23 Jesuska puraj uyawan watekaskancuta sumajta reparaspa nerka:

24 —Uj kolketa ricuchiwaychej, —nispa.

Payman ricuchejtincutaj Jesús taporka:

—¿Pejpa uyantaj pejpa sutintaj cay kolkepi cashanrí?

Cuticherkancu:

—Romano curaj camachej Cesarpata, —nispa.

25 Jesustaj paycunata nerka:

—Cesarpata cajtaka Cesarman koychej; Diospata cajtataj Diosman koychej, —nispa.

26 Mana aterkancuchu Jesusta parlaskanpi japꞌerkoyta runaspa ñaupakencupi. Cutichiskanmanta tꞌucuspataj chꞌinyacorkancu.

27 Saduceos nej cancu wañuska runaska mana ujtawan causarimunancuta. Paycunamanta waquin Jesusman jamuspa nerkancu:

28 —Yachachej, Moisés nokanchejpaj kelkarka: “Sichus uj casaraska runa mana wawayoj wañupuman chayka, paypa wauken casarachun wañojpa viudanwan. Chayta ruwachun wawa cananpaj curaj waukenpa sutin ama chincapunanpaj”, nispa. 29 Cunanri, carkancu kanchis waukes. Curaj cajka casaracorka mana wawayojtaj wañuporka. 30 Chanta iscay caj khareka wañoj waukenpa viudanwan casaracorka. Paypis wañuporka mana ni uj wawata rejsispa. 31 Quinsa cajwanpis quiquillantaj carka. Ajinataj carka kanchis waukesnintinwanpis. Sapa uj curaj waukenpa viudanwan casaracorkancu. Sapa ujtaj mana ni uj wawata rejsispa wañuporka. 32 Khepata chay warmipis wañupullarkataj. 33 Cunanka wañuska runas causarimojtincu chay warmi kanchis runaswan casaracuskanmanta ¿maykennincoj warmintaj cankarí?

34 Jesús paycunata cuticherka:

—Cay pachapi kharis warmispis casaracuncu. 35 Wañuymanta causarimpojcunarí janaj pachaman yaycunancupajjina khawaskasmin cancu. Paycunaka causarimuspa mana casaraconkancuchu. 36 Imaynachus angeles mana wañupuncuchu, ajinallataj causarimoj runaspis mana ujtawan wañonkancuchu. Paycunaka janaj pachaman yaycoj Diospa wawasnin cancu. 37 Chaywanpis Moisés ricucherka wañuska runas chekatapuni causarimunancuta. Kelkarka, Dios nina lauraj sachꞌitamanta nimuskanta: “Noka cani Abrahampa Diosnin, wawan Isaacpa Diosnin, allchhin Jacobpatapis Diosnintaj”. Abraham Isaacwan Jacobwanpis may unay wanupuskancumantaña, chayta nerka Dios. 38 Diospajka wañuskaspis causashancu. Chayraycu pay mana wañuskacunaj Diosnincuchu, manachayrí causashaj runaspa Diosnincumin, —nispa.

39 Waquin israel yachachejcunataj nerkancu:

—Yachachej, sumajta cuticherkanqui, —nispa.

40 Ajinapi manaña astawan imatapis Jesusta tapoj churacorkancuchu.

41 Jesusrí paycunata taporka:

—Cristoka Davidpa wawan^a caskanta ¿imaynapitaj nincurí? 42 Quiquin Davidka taquina libropi kelkarka:

Señor Diosninchej nerka Señorniy Cristoman:

“Nokawan cusca tiyaycucuy camachinanchejpaj

43 churanacojcunayquita kꞌalata atipanaycama”.

44 Ajinata Davidpis Cristota, Señorñiy, nerka. Chanta ¿imaynatataj Cristoka Davidpa wawallan^b canman? —taporka Jesús.

45 Tucuy runas uyarishajtincu, Jesuska yachacojcunanta nerka:

46 —Sumajta khawacuychej israel yachachejcunamanta. Paycuna sumaj pꞌachalliskas puriyta munancu. Munancutaj plazaspi sumajta napaycuchicuyta. Tantacuna-wasipitaj curajcunaj tiyanasnincupi tiyacuyta munancu. Jatun miqhunaspipis sumaj khawaskacunaj tiyanasnincupi tiyacuyta munancu. 47 Chaywanpis viudaspa pisi capuynincuta suwaspajina khechuncu. Diosmanta anchata mañacushaskancuwan sajra munaynincuta pacayta munancu. Cay runastaka Dios aswan sinchꞌiwan juchachanka, —nispa.