2 Dios unay willajnin Isaiaspa kelkaskanpi willarka Wawan Cristota cachamunanta. Wawan jamunanpajtaj willajninta cachamunanta nerka, runaspa sonkoncuta waquichinanpaj. Willajnintaj ñaupajta jamunan carka. 3 Paymantataj nin:

Chꞌin pampapi uj runa khaparishan:

4 Ajinataj bautizaj Juanka chꞌin pampapi riqhurimorka. Runasmantaj willaspa nerka:

—Juchasniyquichejta kꞌalata sakespa bautizacuychej. Chaywan ricuchinquichej Diosman cutiricuskayquichejta juchasniyquichejta pay khechunanpaj, —nispa.

5 Ashqha runas tucuy Judea jallpꞌamanta Jerusalén llajtamantapis payta uyarinancupaj chayamoj cancu. Juchasnincuta willacojtincutaj Jordán mayoj yacusninpi Juanka paycunata bautizaj.

6 Juantaj camello millmamanta pꞌachawan pꞌachallicoj. Kara chumpiwantaj chumpicoj. Langostasta monte misqꞌitawan miqhoj. 7 Payka willaraj:

—Khepayta nokamanta uj aswan atiyniyoj jamushan. Nokaka mana paypa camachinpajjinallapischu cani, runalla caskayraycu. 8 Nokaka yacullawan bautizashayquichej. Payrí kancunata bautizaspa Santo Espirituta cachamusonkachej Diosllapaj causanayquichejpaj, —nispa.

9 Chay pꞌunchaycunapi Jesuska Nazaret llajtamanta jamorka. Nazaretka Galilea jallpꞌapi carka. Juantaj Jordán mayupi payta bautizarka. 10 Yacumanta llojsimushaspataj Jesuska ricorka janaj pachata quicharicushajta. Santo Espiritutapis paloma rijchꞌaypi payman uraycamushajta ricorka. 11 Janaj pachamanta Diostaj nimorka:

—Kanmin munaska Wawayka canqui. Kanwanmin may cusiska cani, —nispa.

12 Khepanpachataj Santo Espíritu sumaj callpanwan Jesusta chꞌin pampaman pusarka. 13 Tawa chunca pꞌunchaycunata cacorka, qꞌita animalespis cancu, chaypi. Supay Satanasri tucuy imata ruwasharka Jesusta juchallichinanpaj. Manataj payta juchallichiyta aterkachu. Diospa angelesnintaj jamuspa Jesuspa pisichicuskanta jaywarkancu.

14 Bautizaj Juanta japꞌiycuspa wiskꞌachiskancumantaña Jesuska Galilea jallpꞌaman rerka. Chaypi Diospa sumaj willanasninta willararka.

15 Nerkataj:

—Diospa ajllaskan pꞌunchayka cunan chayamushanña. Cunan payka munacoj Camachejniyquichej canka. Chayraycu juchasniyquichejta sakespa payman cutiricuychej sumaj willanasnintataj japꞌicuychej, —nispa.

16 Jesuska Galilea kocha cantonnejta purishaspa ricorka Simonta wauken Andrestawan. Paycunaka challwasta japꞌinancupaj chꞌipasta kochaman churasharkancu, challwiris caskancuraycu. 17 Jesusri paycunata nerka:

—Nokawan jamuychej. Kancuna challwa japꞌejcuna cashanquichej. Cunanmantapachataj Diosman runasta pusamojcuna cayta yachachiskayquichej, —nispa.

18 Chay quiquinpachataj chꞌipasnincuta sakerpayaspa Jesusta khaticorkancu yachacojcunan canancupaj.

19 Tumpatawan riskanpitaj Jesús ricorka Zebedeoj wawasninta. Paycunaka Jacobo wauken Juanwan carkancu. Chꞌipasta tꞌirispataj barconcupi casharkancu. 20 Jesusri paycunatapis wajyarka yachacojcunan canancupaj. Ajinapi paycunaka Jesusta khaticorkancu tatancu Zebedeota sakespa. Llancꞌajcunapis Zebedeowan barcopi carkancu.

21 Jesús yachacojcunanwan Capernaum llajtaman chayarkancu. Samacuna pꞌunchay cajtintaj Jesuska tantacuna-wasiman yaycuspa runasta yachachiyta kallarerka. 22 Paycunataj yachachiskanmanta tꞌucorkancu niskasnin atiywan caskanraycu. Manataj israel yachachejcunajinallachu yachacherka. 23 Jesús yachachishajtintaj uj millay supayniyoj runa riqhurimuspa tantacuna-wasincupi khaparerka:

24 —Jesús Nazaret llajtayoj ¿imamantaj chapucuwaycu? ¿Tucuchinawaycupajchu jamunqui? Sumajta yachani pichus caskayquita. Kan Diospa santo Cajninmin canqui, —nispa.

25 Jesusrí sinchꞌiwan camacherka supayta:

—¡Chꞌin cay! Llojsiy paymanta, —nispa.

26 Chay millay supayri runata tꞌucuta japꞌicherka. Sinchꞌita khaparichispataj supayka paymanta llojserka. 27 Tucuy chaypi cajcunari mayta tꞌucorkancu tapunacusharkancutaj:

—¿Imataj cayrí? ¡Cayka waj mosoj yachachiymin atiyniyojtaj! Chaywanpis supaycunatapis camachin, paytataj casuncu, —nispa.

28 Jesusmantataj tucuynejpi runas uskhayta uyarerkancu, tucuy Galilea jallpꞌa muyuynintinpi.

29 Chaymanta tantacuna-wasimanta Jesús llojserka Jacobowan Juanwan. Yaycorkancutaj Simonpa Andrespawan wasincuman. 30 Simonpa suegranka sinchꞌi kꞌoñi onkoywan siricusharka. Jesús yaycuskantawantaj chaypi cajcuna payman onkoskamanta willarkancu. 31 Jesustaj payman kayllariytawan maquinmanta japꞌispa jataricherka. Chay quiquinpachataj kꞌoñi onkoymanta thañichiska carka. Miqhunatataj paycunaman jaywarka.

32 Chꞌisiyaycuyta inti yaycuskanmantaña runaska tucuy onkoyniyojcunatawan supayniyojcunatawan Jesusman pusamorkancu. 33 Chay llajta runastaj tucuynincu wasi puncuman tantacamorkancu. 34 Ashqha onkoska runasta tucuy laya ñacꞌarichiskasta Jesuska thañicherka. Ashqha runasmantataj supaycunata kharkorka. Supaycunari payta rejserkancu. Chayraycu Jesuska mana parlarejta sakerkachu.

35 Tutallataraj manaraj sutꞌiyamuyta Jesús jatarispa llojserka. Chꞌinnejman rispataj jakaypi Dios Tatanwan parlasharka mañacuypi. 36 Simonri chay waj yachacojcunawan Jesusta mascꞌamoj llojserkancu taripanancucama.

37 Payta tarispataj nerkancu:

—Yachachejníy, tucuy mascꞌashasuncu, —nispa.

38 Payri nerka:

—Jacu rina kayllapi caj llajtasman chaypi willaranaypaj. Chaypajmin cay pachaman jamorkani, —nispa.

39 Ajinamanta tucuy Galilea llajtasman rispa tantacuna-wasisnincupi Jesús willaraj. Runasmanta supaycunatapis kharkoj.

40 Uj cuti Jesusman jamorka uj manchay lepra onkoyniyoj runa. Konkoricuspa mayta mañacorka:

—Sichus munanqui chayka, thañichiway. Yachani atiyniyoj caskayquita, —nispa.

41 Jesustaj may qhuyacuywan payta japꞌirerka. Nerkataj:

—Munani. Thañiskaña canqui, —nispa.

42 Onkoyniyoj runataj chay quiquinpacha thañiska carka. 43 Sinchꞌita camachispa Jesús payta cachaporka. Nerkataj:

44 —¡Uyariway! Ama ni pimanpis thañichisuskaymanta willaychu. Astawanrí chekanta riy Jerusalenman yupaychana-wasipi ruwanayojman. Kan quiquiyqui sumajta khawachicamuy paywan. Chaymanta Moisespa camachiskanmanjina jaywanata komuy. Ajinapi thañicuskayquita yachaconka, —nerka Jesús.

45 Payrí llojsipuspaka Jesusmanta anchata willarayta kallarerka. Thañicuskanmantapis tucuynejpi parlasharka. Chayraycu Jesuska pacayllamantaña llajtasman yaycoj. Llajta jawa chꞌinnejcunapitaj cacoj. Chaywanpis tucuynejmanta runas payman jamullarkancupuni.