2 Chayraycu ashqha runas payman tantaycacamorkancu. Ajinapitaj campoka manaña carkachu puncu jawapipis. Jesustaj paycunaman Diospa niskanta willasharka. 3 Chaypachitataj tawa runas riqhurimorkancu uj mana cuyurej runata Jesusman wantumuspa. 4 Chay ashqha runas chaypi cashaskancuraycutaj Jesusman chimpaycuchiyta mana aterkancuchu. Chayraycu tejasta orkhorkancu wasi patapi uj juscꞌuta ruwanancupaj Jesús casharka chay chekanpi. Chay juscꞌunejtataj mana cuyurej runata callapunpi wantuspa Jesuspa ñaupakenman uraycucherkancu. 5 Jesuska cayta ricuspa repararka paycuna tucuy sonkowan creeskancuta onkoskata pay thañichinanta. Chayraycu runaman nerka:

—Wawáy, juchasniyqui kanmanta khechuskaña, —nispa.

6 Waquin israel yachachejcunamanta chaypi tiyashajcuna sonkoncupi tanteyacusharkancu:

7 —¿Imaraycutaj cay runaka ajinata parlashanrí? ¡Diosta phiñachishan! Dioslla juchasta khechuytaka atin, —nispa.

8 Jesuska sonkonpi paycunaj tanteyacuskancuta yachaspa nerka:

—Amaña sonkoyquichejpi ajinata tanteyacuychejchu. 9 Cay runaman nejtiy “juchayqui khechuskaña” nispaka, mana ricunquichejchu chekachus manachus caskantaka. Astawanrí cay mana cuyurej runata jatarichiyman chayka, ricuwajchej. 10 Noka, Diospa cachaska Runan caspa, cay pachapi atiyniyoj cani juchasta khechunaypaj. Chayta yachanayquichejpaj, cay mana cuyurej runata nini: 11 Kanta niyqui: Jataricuy, callapuyquita okharispa ripuy wasiyquiman, —nispa.

12 Chay quiquinpachataj tucuypa ñaupakencupi mana cuyurejka jatarerka. Callapunta okharispataj llojsiporka. Ajinamanta tucuy runas mayta tꞌucorkancu. Diosta yupaychaspataj nisharkancu:

—¡Manapuni ni jaycꞌajpis cayjinataka ricorkanchejchu! —nispa.

13 Ujtawan Galilea kocha cantoman Jesús llojserka. Tucuy chay may ashqha runastaj payman jamorkancu, paycunatataj yachachisharka.

14 Chaymanta Jesús purishaspa Alfeoj wawan Levita ricorka impuesto japꞌinanpi tiyashajta. Payta nerkataj:

—Yachacojniy cay, —nispa.

Levitaj jatarispa Jesusta khaticorka.

15 Wasinpitaj miqhunapaj Jesús tiyacusharka yachacojcunanwan. Paycunawan ashqha impuesto japꞌejcunapis juchasapaspaj khawaska runaspiwan tiyacusharkancu, ashqhas paycunamanta Jesusta khaticuskancuraycu. 16 Juchasapaswan, impuesto japꞌejcunawan miqhushajta ricuspataj, waquin israel yachachejcuna fariseo partemanta yachacojcunanta taporkancu:

—Yachachejniyquichej impuesto japꞌejcunawan, juchasapaswan cusca miqhun. ¿Imaynataj cayrí?

17 Chayta uyarispa Jesús paycunaman nerka:

—Onkoska runaslla medicotaka munancu, manataj sano runaska. Mana jamorkanichu chekan cajcunata wajyaj. Manachayrí juchasapasta wajyaj jamorkani, paycuna sajra ruwaskasnincuta sakespa Diosman cutiricunancupaj, —nerka Jesús.

18 Bautizaj Juanpa yachacojcunan fariseocunawan ñaupa yachachinamanjina ayunaj cancu. Runastaj Jesusman jamuspa payta taporkancu:

—Juanpa yachacojcunan fariseocunaj khatejcunancupis ajllaska pꞌunchaycunapi ayunancu. ¿Imaraycutaj kanpata mana ayunancuchu paycunajina?

19 Jesustaj paycunaman cuticherka:

—Casamientoman wajyaskacunaka casaracoj khari paycunawan cashanancama cusiywan miqhuncupuni. 20 Khepan pꞌunchaycunapi casaracoj khareka paycunamanta khechuska canka. Chaypacha yachacojcunayka phutiywan mana miqhonkancuchu. —nerka Jesús.

21 Jesustaj nerka:

—Sichus pipis uj maucꞌa pꞌachaman uj manaraj kꞌentiska remiendota siranman chayka, mosoj remiendo maucꞌa pꞌachata aysaspa astawan lliqꞌinman. 22 Sitajchus pipis mosoj pokoshaj vinota maucꞌa vino churana karasman churanman chayka, pokoshaj vinoka phatarparichinman maucꞌa karastaka. Ajinamanta vinoka usunman vino churana karaspis usullanmantaj. Astawanpis mosoj vinotaka mosoj karasman churana tiyan. [Ajinallataj mosoj yachachiypipis mosoj ruwanas canan tiyan^a —nerka Jesús.

23 Uj samacuna pꞌunchaypi Jesús trigo chajra chaupinta risharka. Purin purintaj yachacojcunan trigo umasta muruyta kallarerkancu.

24 Fariseosrí Jesusta taporkancu:

—¡Uyariy! ¿Imaraycutaj yachacojcunayqui samacuna pꞌunchaypi chay mana ruwana cajta ruwashancurí?

25 Jesusri cuticherka:

—¿Manachu leerkanquichej unay tatayquichej Davidpa ruwaskanmanta? Chay pꞌunchaycunapeka yupaychana-wasimanta Abiatar curajka casharka. Davidka runasninwan ima pisichicuspa yarkhachicorka. 26 Chayraycutaj yupaychana-wasiman yaycorka. Abiatarka Diosman tꞌakaska tꞌantata Davidman korka. Camachiskapeka nin, chay tꞌantataka yupaychana-wasipi ruwanayojcunalla miqhunancuta. Davidrí chay tꞌantata miqhuycorka runasninmanpis kollarkataj, —nispa.

27 Fariseosmanri Jesuska nerka:

—Runaj allinninpajmin Dioska samacuna pꞌunchayta churarka. Manataj samacuna pꞌunchayta jatunchanallanpajchu runataka ruwarka. 28 Nokari, Diospa cachaska Runan, atiyniyoj cani camachinaypaj imatachus ruwanata samacuna pꞌunchaypipis, —nispa.