—¿Imaraycutaj causashajta wañuskas chaupipi mascꞌashanquichej? 6 Jesuska mana caypichu, causarimpunña. Yuyaricuychej Galilea jallpꞌapiraj cashaspa nisuskayquichejmanta. 7 Payka nerka: “Noka, Diospa cachaska Runan, juchasapa runaspa atiynincuman jaywaska chacataskataj canay tiyan. Quinsa caj pꞌunchaypitaj causarimpunay tiyan”, nispa.

8 Warmistaj Jesuspa niskasninta yuyaricorkancu.

9 Pꞌampanamanta cutimuspataj tucuy chay imasta chunca ujniyoj Jesuspa cachasninman willarkancu, tucuy paycunawan cajcunamanpis. 10 Chayta willajcuna carkancu Magdala llajtayoj María, Juana, Jacoboj maman Mariawan. Paycunawan waj warmispis chay imasta cachasninman willashallarkancutaj. 11 Cachasmanrí chay niskancoka mana yuyayniyojmanjina rijchꞌacorka, manataj creerkancuchu.

12 Pedrorí jataricuspa pꞌampanaman correrka. Cꞌumuycuspataj Jesuspa maytꞌunasninta chꞌusajllata ricorka. Payri chay ruwacuskanmanta tꞌucuspa wasinman riporka.

13 Chay pꞌunchayllapitaj iscay yachacojcuna risharkancu Emaús niska ranchoman. Jerusalenmanta iscay leguasjina carka. 14 Chay pꞌunchaycunapi tucuy ruwacuskanmanta, rishaspa parlanacusharkancu. 15 Chay ruwacuskanta parlanacushajtincu mayta yuyashajtincu ima, quiquin Jesús taripaycorka. Paycunawan risharka. 16 Ricushaspapis mana Jesusta rejsiyta aterkancuchu. 17 Jesustaj paycunata taporka:

—Ñanta purispa ¿imamantataj sinchꞌita parlanacushanquichej?

Paycunari sayarkancu ancha llaquiska uyaslla. 18 Ujnin paycunamanta, Cleofas sutiyoj, cuticherka:

—Kanka purej runallachá cawaj, cay pꞌunchaycuna Jerusalenpi ruwacuskanta mana yachaspaka, —nispa.

19 Chanta Jesús paycunata taporka:

—¿Imataj ruwacorkarí?

Paycunataj cuticherkancu:

—Nazaret llajtayoj Jesusta ruwaskancuta. Payka Diospa willajnin caskanta ricucherka jatunta ruwaskanwan yachachiskanwan. Atiyniyoj carka Diospa khawayninpi runaspa ñaupakencupipis. 20 Cayjina carka: Yupaychana-wasimanta curajcunanchej camachejcunanchejpiwan Jesusta jaywaycorkancu wañuyman juchachaska cananpaj. Chacatacherkancutaj. 21 Nokaycurí yuyasharkaycu pay israel runasta cacharinanta. Chaywanpis cunanwan Jesusta chacatachiskancoka quinsa pꞌunchayña cashan. 22 Cunanrí cay tiyan: Nokaycumanta waquin warmis tutamanta pꞌampanaman rispa tꞌucuchiwarkaycu. 23 Jesuspa cuerponta mana taripaskancuchu. Cutimuspataj nishawarkaycu moskoypijina angelesta ricuskancuta niskancutataj Jesús causashaskanta. 24 Chaywanpis nokaycumanta waquin runas pꞌampanaman rerkancu. Warmis niskancumanjinataj taripaskancu. Jesustari mana ricuskancuchu, —nispa.

25 Jesustaj paycunata nerka:

—¡Ancha pisi yuyayniyoj canquichej! ¡Diospa unay willajcunanpa tucuy willaskancutapis ñacꞌaypi creej sonko canquichej! 26 Diospa ajllaskan Cristoka chekamanta ñacꞌarinan carka. Chaymantataj Tatan Dioswan wiñaypaj jatunchaska canan carka, —nispa.

27 Chaymanta paycunaman Jesús sutꞌincharka Diospa tucuy palabranpi paymanta cajta. Moisespa kelkaskasninmanta kallarispa Diospa tucuy unay willajcunanpa kelkaskasnintawan sutꞌincharka.

28 Yachacojcuna risharkancu, chay Emausman kayllamorkancu. Jesustaj rejjinallapuni churacorka. 29 Paycunataj jarcꞌarkancu:

—Nokaycuwan khepacuy chꞌisiyaycushaskanraycu, —nispa.

Jesustaj wasiman yaycorka paycunawan khepacoj. 30 Payka paycunawan miqhunanpaj tiyaycucuytawan tꞌantata japꞌispa Diosman graciasta korka. Tꞌantata partispataj paycunaman jaywarka. 31 Ajinallapi Jesús caskanta reparaspa rejsirparekancu. Paytaj paycunamanta chincariporka. 32 Paycunari ninacorkancu:

—Ñanpi parlawashajtinchej Diospa palabranta sutꞌinchawajtinchejpis ¡mayta sonkosninchejka cusiywan tꞌucusharkancu!

33 Chay ratutaj chay iscayka jataricuspa Jerusalenman cutiporkancu. Jakaypi tariparkancu tantaskastaña chay chunca ujniyoj Jesuspa cachasninta paycunawan cajcunatawan.

34 Tantaskacunataj nisharkancu:

—Chekamanta yachanchej Señorka causarimpuskanta. Simonpis payta ricuska, —nispa.

35 Chanta chay iscay paycunaman willasharkancu ñanpi paycunawan caskanmanta. Imaynatachus tꞌantata partishajtin Jesusta rejsiskancuta willasharkancutaj.

36 Chay imasmanta parlashajtillancuraj Jesuska chaupincupi sayashaj riqhurerka. Napaycorkataj:

—Kancunapaj cꞌacha causay cachun, —nispa.

37 Paycunataj mayta mancharicorkancu almata ricuskancuta yuyaspa. 38 Jesusri paycunata nerka:

—¿Imaraycutaj manchariskas cashanquichej? ¿Imaraycutaj sonkoyquichejpi iscayrayashanquichej? 39 Khawaychej maquisniyta chaquisniytawan. Nokaka quiquiymin cani. Llanqhariwaychej reparanawayquichejpaj. Almaka mana aychayojchu nitaj tulluyojchu. Ricushawanquichejjina, noka aychayoj tulluyoj cani, —nispa.

40 Cayta nispataj Jesuska maquisninta chaquisnintawan paycunaman ricucherka. 41 Cusiymanta tꞌucuymantawan manaraj creerkancuchu Jesús caskanta. Iscayrayashajtincutaj Jesús taporka:

—¿Caypi canchu imallapis muqhunapaj?

42 Paycunataj uj chhican challwa cancata lachiwana misqꞌitawan payman jaywarkancu. 43 Paytaj chayta japꞌispa ñaupakencupi miqhorka. 44 Paycunatataj nerka:

—Kancunawanraj cashaspa caycunata nerkayquichej: Tucuy nokamanta kelkaska juntꞌacunan tiyan, Moisespa kelkaskan, unay willajcunaj kelkaskancu, taquina libropipis, —nispa.

45 Chanta tucuy chay imasta paycunaman sutꞌincharka yuyaynincuwan Diospa palabranta entiendenancupaj. 46 Nillarkataj:

—Dios palabranpi nin paypa ajllaskan Cristo wañunanta, quinsa pꞌunchaypitaj causarimpunanta. 47 Sutinpitaj willaracunan tiyan runas Diosman cutiricunancuta juchasnincu khechuska canancupaj. Tucuy jallpꞌapi tiyacojcunaman willaraska canan tiyan kallarispa Jerusalenpi. 48 Kancuna cay imasta ricuskayquichejraycu willajcuna canquichej. 49 Sumajta uyariwaychej. Tatay cachamuskayquichej sumajta nerka, paytaka noka quiquiy cachamuskayquichej. Kancunarí Jerusalenpi suyashaychej Diospa atiyninwan juntꞌaska canayquichejcama, —nispa.

50 Chaymanta Jesuska Betania ranchonejman yachacojcunanta pusarkorka. Maquisninta patancunejman aysarispataj nerka:

—¡Dios kancunawanpuni cachun! —nispa.

51 Chayta niytawantaj Jesuska paycunamanta riporka. Janaj pachaman okhariska carka. 52 Yachacojcunaka Jesusta yupaycharkancu. Jatun cusiywantaj Jerusalenman cutimporkancu. 53 Diosta jatunchaspa yupaychana-wasipipuni carkancu. Ajina cachun.