—Khawaymá, yachacojcunayqui samacuna pꞌunchaypi cayjinata llancꞌancu camachiwaskanchejta mana casuspa, —nispa.

3 Jesusri paycunaman cuticherka:

—¿Manachu leerkanquichej unay camachej Davidpa ruwaskanta? Paywan runasninpiwan yarkhachicorkancu. 4 Paytaj yupaychana-wasiman yaycorka. Diosman tꞌakaska tꞌantasta miqhorka. Camachiwaskanchejmanjinarí chay tꞌantataka yupaychana-wasipi ruwanayojcunalla miqhunancu carka. Ni pay nitaj runasninpis miqhunancuchu carka. 5 Kancuna Moisespa camachiskasninta leerkanquichejcharí. Chaypi Moisés camacherka samacuna pꞌunchaypi runas mana llancꞌanancuta. Yupaychana-wasipi ruwanayojcunarí ruwanallancupuni. Samacuna pꞌunchaypi ruwaskancumantataj mana juchallicorkancuchu Diosta yupaychanapaj ruwaskancuraycu. 6 Nokarí niyquichej caypi cashajka yupaychana-wasipi ruwanasmanta niskaka aswan curajmin caskanta. 7 Dios nin: “Runas qhuyanacunancoka astawan nokata cusichiwan uywa wañuchiska jaywanasmanta niskaka”. Chaytachus reparawajchej chayka, mana juchachawajchejchu allin ruwajcunataka. 8 Noka, Diospa cachaska Runan, atiyniyoj cani camachinaypaj imatachus ruwanata samacuna pꞌunchaypipis.

9 Chaymanta ripuspataj Jesuska tantacunawasincuman yaycorka. 10 Chaypi carka uj wañuska maquiyoj runa. Runaska imaynallamantapis Jesusta juchachayta munasharkancu. Chayraycu taporkancu:

—Niwaycu, camachiwaskanchejmanjina ¿aticunchu runata thañichiy samacuna pꞌunchaypi?

11 Jesusrí paycunaman cuticherka:

—Samacuna pꞌunchaypi uj ovejayquichej jatun tꞌokoman urmaycunman chayka ¿orkhocapuwajchejcharí? 12 Diospa ñaupakenpi runaka aswan yuyanamin ovejamanta niskaka. Chayraycu samacuna pꞌunchaypeka allin cajtapuni ruwana, —nispa nerka.

13 Chanta wañuskajina maquiyoj runaman nerka:

—Aysariy maquiyquita.

Runataj maquinta aysarerka. Chay maquinri ujnin maquinjina thañiska carka. 14 Fariseo partecunarí llojsiytawan tantacamorkancu. Jesuspa contranpi parlanacorkancutaj imaynamantapis payta tucuchinancupaj.

15 Jesusrí chay imasta yachaspa chaymanta llojsiporka. Ashqha runas paywan risharkancu. Tucuy paycunatataj thañichisharka. 16 Paycunataka allinta camacherka:

—Pitaj noka caskaytaka ama pimanpis willanquichejchu, —nispa.

17 Ajinapi juntꞌacorka Diospa unay willajnin Isaiaspa niskan Jesuscristomanta.

Ajinaka Dios nin:

22 Chaymantataj Jesusman uj ciegota pusamorkancu. Chay runari supayniyoj upataj carka. Jesustaj payta thañicherka. Ajinapi upa cajka parlaporka, ricorkataj.

23 Tucuy chay ashqha runastaj tꞌucuspa Jesusmanta nerkancu:

—¿Cay Diospa ajllaskan Cristochu^a canman?

24 Fariseo partecunarí cayta uyarispa nerkancu:

—Cay runaka curaj supaycunaj curajnincu, Beelzebú atiynillanwan supaycunata kharkon, —nispa.

25 Jesusrí yuyashaskancuta yachaspa paycunaman nerka:

—Jatun llajtapi tiyacojcuna paycunapura makanaycucojtincoka tucuchiska canka chay llajtaka. Sapa llajta chayrí wasipis paycunapurallataj makanacojtenka chincaponka. 26 Curaj supay Satanás supaycunallatataj kharkon chayka, payllataj tꞌakanacushan. Camachisnillantaj paywan makanacojtincoka tucuconkancu. 27 Supay Beelzebój atiyninwan supaycunata kharkoskayta ninquichej. Kancunamanta cajcunarí ¿pejpa atiyninwantaj supaycunata kharkoncurí? Chayraycu paycuna pantaskaspuni caskayquichejta ricuchisonkachej. 28 Nokarí Santo Espíritoj atiyninwan supaycunata kharkoskayka niyta munan Dios kancuna uqhupiña caskanta camachinanpaj.

29 ‘Suwayta munajka callpasapaj wasinman yaycunanpajka ñaupajta atipaspa watananraj tiyan. Chanta wasinman yaycuyta atin capuyninta apacapunanpaj. [Nokapis ajinallatataj curaj supayta atipaspa millay supaycunata kharkoni.]^b

30 ‘Ajinata mana nokawan cusca Diosman sayacojka contraypi churanacun. Mana nokata yanapawajka ruwanasniyta jarcꞌawan.

31 ‘Chayraycu niyquichej Dios khechuyta atiskanta runaspa tucuy juchancuta payta phiñachiskancutapis. Santo Espíritoj contranpi sajrata parlajtarí Dios mana perdonankachu. 32 Noka, Diospa cachaska Runanpa contranpi sajrata parlan chayka, parlaskanmanta perdonaskaraj canka. Santo Espíritoj contranta sajrata parlajrí ni jaycꞌaj perdonaskachu canka, ni cunanpis nitaj khepatapis.

33 ‘Yachanchej sachꞌa sumaj chayka, pokoyninpis sumajllataj. Sachꞌa mana allinchu chayrí pokoyninpis manallataj allinchu. Arí, sachꞌataka pokoyninmantamin rejsinchej. Nokatapis ajinallatataj ruwaskasniymanta atinquichej rejsiwayta. 34 ¡Kancuna runa wañuchi catarisjina canquichej! Sajra caspa ¿imaynatataj allin cajta parlayta atiwajchejrí? Runaka sonkonpi juntꞌa cajmanta parlan. 35 Cꞌacha runaka cꞌacha imasta parlan sonkonpi cꞌacha cajta jallchꞌaskanmanta. Sajra runarí sajra cajta parlan sonkonpi sajrata jallchꞌaskanmanta. 36 Nokarí niyquichej runaska tucuy manacaj niskanmantapis Diosman willacunan tiyan. Chaypi Dios nenka juchayojchus manachus caskancuta. 37 Niskasniyquimanjina Dios chekan ruwaj runapaj khawasonka. Chayrí sajra niskasniyquimanjina pay juchachasonka, —nispa.

38 Chanta waquin yachachejcuna fariseo partecunawan nerkancu:

—Yachachej, Diosmanta cachamuska caskayquita yachanaycupaj uj jatun tꞌucunata ruwaspa kanmanta ricuchiwaycu, —nispa.

39 Jesusrí cutichispa paycunaman nerka:

—Sajra ruwajcunawan Diosta wasanchajcunawan uj tꞌucunapaj ricuchinata mañashancu. Chayka mana ruwaskachu canka. Manachayrí Diospa unay willajnin Jonás ricucherka, chayllataj reparanancupaj cashan. 40 Jonaska quinsa pꞌunchay tutatawan jatun challwaj wijsan uqhupi carka. Ajinallataj noka, Diospa cachaska Runanpis, jallpꞌa uqhupi pꞌampaska casaj quinsa pꞌunchayta quinsa tutatawan. 41 Diospa cꞌajaj phiñacuynin pꞌunchaypi Nínive llajtapi tiyacojcuna cunan pꞌunchaycunaj contrancupi willankancu. Paycunatataj juchachankancu. Imaraycuchus Jonaspa willaraskantawan paycunaka juchasnincuta sakespa Diosman cutiricaporkancu. Reparaychejtaj cunan Jonasmanta aswan curaj caj caypi caskanta. 42 Chay pꞌunchaypitaj Sabá runasta camachej warmipis cunan pꞌunchay runaspa contrancupi willaspa paycunata juchachanka. Imaraycuchus payka may caru jallpꞌmanta jamorka Salomonpa yachayninta uyarej. Reparaychejtaj cunanka Salomonmanta aswan curaj caj caypi caskanta.

43 ‘Uj millay supay runamanta llojsispaka chꞌaqui pampapi khasilla purin. Samaricuyta mascꞌaspataj mana tarinchu. 44 Chanta yuyaspa nin: “Pimantachus llojsimorkani chay runallamantaj cutipusaj”, nispa. Cutimuspa supayka chay runata taripan pichaskata sumaj cꞌuchunchaskatataj chꞌusaj wasitajina. 45 Chaymantaj supayka rispa paymanta aswan millay kanchis supaycunata pusamun. Chay runaman yaycuspataj paypi tiyacuncu. Ajinapitaj chay runaj khepa caynin aswan sajraman tucun ñaupaj caskanmantaka. Cay pꞌunchay sajra runaswanpis ajinallataj canka.

46 Jesús chay ashqha runasman parlashajtinraj, khaway, maman waukesninwan chayamorkancu. Cay jawapi casharkancu paywan parlayta munaspa. 47 Ajinallapi uj runaka Jesusman willarka:

—Khaway, mamayqui waukesniyquiwan jawapi cashancu. Munashasuncutaj kanwan parlanacuyta, —nispa.

48 Jesustaj cutichispa willajman nerka:

—¿Picunataj mamay waukesniy cancumanrí? —nispa.

49 Yachacojcunanta maquinwan ricuchispataj nerka:

—Paycuna mamay waukesniypis cancu. 50 Janaj pacha Dios Tataypa munayninta ruwajmin waukey, panay, mamaypis, —nispa nerka Jesús.