—Uyariwaychej, uj runa mujuta tꞌacaj llojserka. 4 Tꞌacashajtinri waquin mujoska ñan pataman urmarkancu. Pꞌiskostaj jamuytawan pallacaporkancu. 5 Waquin mujusri pisi jallpꞌayoj rumi pataman urmarkancu. Chay mujoska uskhayta pꞌuturamorkancu pisi jallpꞌa caskanraycu. 6 Mana sumaj saphiyoj caskanraycutaj inti ruphamojtin chꞌaquiporkancu. 7 Waquin mujustaj qhishca chaupiman urmarkancu. Qhishcawan cusca wiñaycuytawantaj trigota sipꞌicaporkancu. 8 Waquin mujusrí sumaj jallpꞌaman urmarkancu. Chaypi waquenka uj mujullamanta pachajta pokorka. Waquintaj sojta chuncata, waquintaj quinsa chuncata pokorka. 9 Ningrisniyoj cajka sumajta uyarichun, —nispa nerka Jesuska.

10 Yachacojcunaka Jesusman kayllaycuspa tapurerkancu:

—¿Imaraycutaj runasman quiquinchanaspa parlanquirí?

11 Paytaj paycunaman cutichispa nerka:

—Dios runasninta camachin, chaymanta yachachinaska wajcunapaj pacaska cancu. Cunanrí kancunallaman sutꞌi ricuchiskas cancu entiendenayquichejpaj. 12 Niskanta japꞌicojmanka Dios astawanraj entiendeyta yanapanka. Ajinapi japꞌicojka astawan astawanraj japꞌiconka. Mana japꞌicojmantarí pisi japꞌiska yuyaskanpis khechuska canka. 13 Chayraycu paycunaman quiquinchanaswan parlani ricushaspapis mana entiendenancupaj uyarishaspapis mana chekata reparanancupajchu. 14 Ajinapi Isaiaspa sutꞌinchaskan paycunamanta juntꞌacun. Dios palabranpi nin:

16 ‘Kancunarí may cusiskas canquichej ñawisniyquichejwan chaycunata ricuskayquichejraycu ningrisniyquichejwantaj uyariskayquichejraycupis. 17 Niyquichej chekatapuni kancuna ricushanquichej chayta ashqha unay willajcunawan cheka ruwajcunawan ricuyta mayta munaskancuta. Manataj ricorkancuchu. Uyarishaskayquichejtapis uyariyta mayta munarkancu manataj aterkancuchu.

18 ‘Tarpojwan quiquinchaskayta entiendenayquichejpaj uyariwaychej.

19 ‘Waquin runas Dios camachin, chaymanta willanasta uyarincu, manataj casuncuchu. Chaycunaka ñan purinaman urmaj mujusjinamin cancu. Supay Satanás jamuspa Diospa niskanta sonkoncumantaka siqꞌirpayan mana juchamanta cachariska canancupaj. Chay runaska ñanpi tꞌacaska mujujinamin. 20 Waquin runaska pisi jallpꞌayoj rumi pataman urmaj mujusjina cancu. Diospa niskanta uyarispa cusiywan japꞌicuncu. 21 Chay runaska pisi saphiyoj mujusjinamin. Chayraycu pisi ratullapaj japꞌincu. Paycunata llaquiycuna khatirishajtin chayrí Diospa niskanraycu muchojtincu paycunaka chaypacha urmacapuncu. 22 Waquin runas Diospa niskanta uyarispa cay pacha imasmanta anchata yuyancu. Chayjina runaka munashan ancha khapaj caytaraj. Tucuy chay imastaj payta pantachispa Diospa niskanta sonkonpi mana sakenchu wiñajta. Ajinapi mana pokoyniyoj caspa payka Diosta mana cusichinchu. Chayraycu qhishca chaupiman urmaj mujujina cashan. 23 Waquin runas Diospa niskanta tucuy sonkowan uyarispa casuncu. Chay runaka sumaj jallpꞌaman urmaj mujujina cashan. Diosta casuskancuraycutaj payta cusichincu. Ajinapi waquin runas ancha sumajta ruwaspa pachajman pokoj mujujina cancu. Waquinri sumajllata ruwaspa sojta chuncaman pokoj mujujina cancu. Waquintaj quinsa chuncaman pokoj mujujina callancutaj.

24 Waj quiquinchanatawan Jesuska yachachisharka. Nerka:

—Dios camachishajtenka sumaj mujuta chajranpi tarpoj runaman rijchꞌacun. 25 Tutapi tucuy runas puñushajtintaj uj chejnicojnin jamorka. Millay kora cizaña mujuta trigo tarpuskanman tꞌacaycarparerka. Chaymantataj riporka. 26 Trigotaj wiñaspa sunqhachacorka. Chaypacha millay cizaña trigopis riqhurillarkataj. 27 Tarpojpa camachisninri payman jamuspa nerkancu: “Tatay, “¿manachu sumaj mujullata tꞌacarkanqui chajrayquipi? ¿Imaynamantataj riqhurin chay millay khorarí?” 28 Paytaj paycunaman nerka: “Chayka uj chejnicojpa ruwaskan”, nispa. Chanta camachisnin payman nerkancu: “¿Munanquichu khorata siqꞌiramoj rinaycuta?” 29 Payri cuticherka: “Amaraj, trigotapis koratawan cusca siqꞌirashawajchejchá. 30 Sakellaychej iscaynincuta wiñajta ruthunacama. Ruthushajtincu trigo ruthojcunaman nisaj: Ñaupajta cizañata tꞌakarkoychej. Kꞌapiy kꞌapiyllata churarparispa wataychej ruphachinayquichejpaj. Trigotarí pirwayman wakaychaychej”, —nispa.

31 Waj quiquinchanatawan Jesús paycunaman yachacherka:

—Imaynatachus chajrapi tarpuska juchꞌuy muju^a wiñan, ajinallataj cashan Dios runasta camachishajtenka. 32 Chekatapuni chay mujoka tucuy juchꞌuy mujusmanta aswan juchꞌuysitumin. Wiñasparí tucuy koramanta aswan jatunta wiñan sachꞌitajinaman tucunancama. Pꞌiskospis mallquisninpi thapachacuncu, —nispa.

33 Waj quiquinchanatawan paycunaman yachachispa nerka:

—Dios camachishajtenka, tꞌanta pokochina levadurajina wiñan. Uj warmi chay pokochinata iscay arrobajina trigo jacꞌuman churaycorka. Chanta tucuynin masa pokospa okharicamorka, —nispa.

34 Tucuy chay imasta Jesuska chay ashqha runasman quiquinchanasllawanpuni parlaj. Mana chaywanka mana yachachejchu. 35 Ajinapi Diospa willajninpa niskan juntꞌacorka. Dios palabranpi nin:

36 Chanta Jesuska runasta cacharpayaspa wasiman jamporka. Yachacojcunantaj payman kayllaycuspa nerkancu:

—Chay chajrapi cizaña khorawan quiquinchanamanta sutꞌinchawaycu,

37 Payri cuticherka:

—Noka, Diospa cachaska Runan, sumaj mujuta tarpoj cani. 38 Chajrataj tucuy runas cancu. Sumaj mujutaj Diospa cheka wawasnin cancu. Cizañataj Diosta mana casoj supay Satanaspa wawasnin cancu. 39 Cizañata tꞌacaycojtaj chejnicoj supaymin. Cosechari nokaj cutimunay pꞌunchaymin. Ruthojcunataj Diosmanta cachaska angeles cancu. 40 Chayraycu imaynatachus cizañata runas tantaycuspa ninaman ruphachincu. Ajinallataj canka cay pacha tucucojtenka. 41 Noka, Diospa cachaska Runan, angelesniyta cachamusaj. Maypicha camachini, chaymanta orkhonkancu tucuy pantachej, sajrata ruwaj runasta, Diosta mana casojcunatapis. 42 Paycunata laurashaj uqhu pachaman wijchꞌuyconkancu. Chaypitaj chay runaska jatun nanaywan manchayta wakankancu, phutiywan quirusnincutapis cꞌaruconkancu. 43 Chanta chekanta ruwajcunaka cusiywan riconkancu Diosta janaj pachapi. Chaypitaj Dios Tata atiyninwan tucuyta camachenka. Ningrisniyoj cajka sumajta uyarichuncu.

44 ‘Dios runasta camachishajtin uj chajrapi khapaj capuy pꞌampaskaman rijchꞌacun. Chayta taricoj runaka pacaycun. Cusiywan rispataj tucuy capuyninta vendemun chay jallpꞌatataj ranticapun.

45 ‘Dios runasta camachishajtin uj rantej runamanpis rijchꞌacullantaj. Payka may sumaj perlasta mascꞌan rantinanpaj. 46 Aswan sumaj caj perlayojwan tincucuspa: “Cayta ranticuskayqui”, nerka. Chaymanta rerka tucuy capuyninta vendemoj sumaj perlata ranticapunanpaj.

47 ‘Ajinallataj Dios runasta camachishajtin challwa japꞌina jatun chꞌipaman rijchꞌacun. Runas chay chꞌipata kochaman churancu. Chay chꞌipawan imaymana challwasta japꞌincu. 48 Chꞌipa juntꞌaycojtintaj kocha cantoman aysancu. Chaypi tiyaycucuspa challwasta ajllancu. Sumajcunata canastasman tantancu. Mana allin cajcunatataj wijchꞌupuncu. 49 Ajina canka cutimunay pꞌunchaycunapeka. Janaj pachamanta angeles jamonkancu tꞌakanancupaj sajra runasta chekan ruwaj runasmanta. 50 Chay sajra ruwaj runasta laurashaj uqhu pachaman wijchꞌuyconkancu. Jakaypiri manchayta wakankancu, phutiywantaj quirusnincuta cꞌaruconkancu, —nispa nerka Jesús.

51 Jesús yachacojcunata taporka:

—¿Tucuy chayta entienderkanquichejchu? Paycunataj cuticherkancu:

—Arí, yachachiwajníy, entiendeycu, —nispa.

52 Jesusri paycunaman nerka:

—Chayraycu Dios camachin, chaymanta sumaj yachachiska runa uj khapaj wasiyojman rijchꞌacun. Payka jallchꞌaska khapaj khoyasninmanta orkhomun mosoj khoyasta unay khoyastapis, —nispa.

53 Chay quiquinchanaswan parlayta tucuytawan Jesuska chaynejmanta llajtanman riporka. 54 Chayaspa runasta tantacuna-wasincupi yachachisharka. Mayta tꞌucuspa runas ninacorkancu:

—Cay runari ¿maypitaj cayjina yachayniyoj tucumorkarí? ¿Imaynapitaj cayjina tꞌucuna ruwanasta ruwashanrí? 55 ¿Manachu cayka carpintero runaj wawan? ¿Manachu mamanpa sutinpis María? ¿Manachu waukesninpis Jacobo, José, Simón, Judaswan cancu? 56 Panasninpis ¿manachu kayllanchejpi tiyacuncu? Chanta ¿imaynapitaj tucuy cay imasta yachamorkarí?

57 Paycunataj phiñacuspa Jesusta mana japꞌicorkancuchu. Jesusrí paycunaman nerka:

—Diosmanta uj willajka sumajpaj khawaskapuni cashan waj llajtaspeka. Llajtanpi, wasinpiwan cajcunalla paytaka manamin sumajpajchu khawancu, —nispa.

58 Chaypitaj Jesuska pisi tꞌucuna ruwanasllata ruwarka paypi mana japꞌicuskancuraycu.