Bautizaj Juanpa cachasnin Jesusta tapuncu
11
Jesuska chunca iscayniyoj yachacojcunanta ruwanancuta yachacherka. Chayta tucuytawantaj llojserka chay kayllapi llajtasman yachachej willarajtaj.2 Juanrí wiskꞌaska cashaspa uyarerka Cristoj ruwaskasninmanta. Chayraycu yachacojcunanta Jesusman tapunancupaj cacharka. Ajinapi Jesusta taporkancu:
3 —¿Kanchu Diospa niskanmanjina jamoj, Cristoka canqui? chayrí ¿wajtachu suyallasajcupuni?
4 Jesusri paycunaman cutichispa nerka:
—Cay uyarishaskayquichejta ricushaskayquichejtawan cutispa Juanman willamuychej. 5 Ciegos ricushancuña. Suchuspis purishancuña. Lepra onkoyniyoj runaspis thañiskasña cashancu. Lojtꞌuspis uyarishancuña, wañuska runastaj causarichiskasña cashancu. Sumaj willanasta wajcha runaspis uyarishallancu. 6 ¡May cusiska mana pꞌenkacuspa nokapi japꞌicojka!
7 Juanpa cachamuska yachacojcunan ripushajtincu Jesuska ashqha runasman paymanta parlarka:
—Juan chꞌinnejpi willarashajtin ¿imatataj khawaj rerkanquichejrí? Ichhu wayrawan cꞌumuycachachiska ¿chayjinata iscayrayaj runatachu khawamorkanquichej? 8 Mana ajina cajtinri ¿imata khawajtaj rerkanquichejrí? ¿Uj sumaj cꞌachitu pꞌachalliska runata khawajchu rerkanquichej? Reparaychej, ajinata pꞌachallicojcunaka jatun camachejcunaj wasisnillancupi tiyacuncu. 9 Chantarí ¿imata khawajpunitaj rerkanquichej? ¿Diosmanta uj willajtachu? Arí, niyquichej payka Diospa unay willajcunanmanta aswan curajmin caskanta. 10 Dios palabranpi Juanmanta kelkacherka:
Willajniyta naupakeyquita cachamushani.
Payka runaspa sonkoncutaa waquichipusonka paycunaman rinayquipaj.
11 Nokataj chekatapuni niyquichej: Tucuynin runas uqhupi ni uj runa canchu aswan curaj bautizaj Juanmanta niskaka. Dios camachin, chaypirí aswan pisipaj khawaska cajka aswan curajpunimin Juanmanta niskaka.
12 ‘Bautizaj Juan willaraskan pꞌunchaymantapacha cunancama juchasapa runas Diospa camachisnin cayta mayta callpacushancu. Astawanrí Diospa churanacojninta atiywan atipaspalla paypa camachisnin cayta atincu. 13 Diospa tucuy unay willajcunanwan Moiseswanka sutꞌincharkancu Juan jamunancama. Paycunaka Dios tucuyta wiñaypaj camachinanmanta parlarkancu. 14 Nerkancutaj Juanka willaj Eliasjina jamoj caskanta. Chay sutꞌinchaskancuta japꞌiyta munanquichej chayka, atinquichej. 15 Ningriyoj cajka, sumajta uyarichun.
16 ‘¿Picunamantaj rijchꞌacuncu cunan pꞌunchay runas? Plazaspi tiyaska pujllacoj wawasman rijchꞌacuncu. Uj tantaska wawas waj tantaska wawasta khaparincu: 17 “Kenata tocaporkaycu tusunayquichejpaj. Kancunarí mana tusorkanquichejchu. Wakanapajjina taquiporkaycu kancunarí mana wakarkanquichejchu”, nispa. 18 Ajinata Juanpis riqhurimuspa sumaj miqhunasta mana miqhojchu nitaj vinota ujyajchu chaywan Diosta casunanpaj. Runastaj nerkancu: “Supayniyoj chay runaka”, nispa. 19 Chanta noka, Diospa cachaska Runan, jamorkani, runaswantaj miqhuni. Nokamantataj nincu: “¡Khawaychej! Cay runaka miqhuysapa ujyaysapataj. Juchasapaswan impuesto japꞌejcunawan rejsinaycucun”, nispa. Chaywanpis tucuy cheka yachayniyojka rejsin Diospa yachaynin cheka caskanta. Ruwaskasninwantaj cheka caskanta ricuchin.
Diosta mana casojcuna
20 Waquin llajtaspi Jesuska astawan ashqha tꞌucuna imasta atiyninwan ruwarka. Chaywanpis chaypi tiyacoj runaska juchasnincuta mana sakerkancuchu. Nitaj Diosman cutirerkancuchu. Chayraycu Jesuska chay llajtaspi tiyacojcunata cꞌamerka:
21 —¡Ay, phutiy, ari, kancuna Corazín llajtapi tiyacojcunapajka! ¡Ay, phutiy, ari, kancuna Betsaida llajtapi tiyacojcunapajka! Dios atiyninwan jatun tꞌucunasta kancuna uqhupi ruwarka. Tiro llajtayojcuna Sidón llajtayojcunapis ancha sajras carkancu. Chaywanpis paycuna uqhupi chay jatun tꞌucunasta Dios ruwanman carka chayka, paycunaka payman unayña cutiricapuncuman carka. Ajinaka llampꞌu sonkowan juchallicuskancumanta mayta llaquicuspa sajra ruwaskasnincuta sakepuncuman carka. Chayta ricuchinancupaj luto pꞌachasnincuta usphatawan umasnincuman jichꞌacuncuman carka. 22 Chaywanpis niyquichej: Diospa cꞌajaj phiñacuynin pꞌunchaypiri kancunata astawan ñacꞌarichisonkachej Tiropi Sidonpi tiyacojcunamanta niskaka. 23 Capernaum llajtapi tiyacojcuna, kancuna mayta munasharkanquichej janaj pachaman okhariskas jatunpaj khawaskas canayquichejta. Astawanpis kancunaka uqhu pachapi tucuchiskas canquichej manacajpaj khawaskas canayquichejcama. Kancuna uqhupi ruwacuskan ajina ricuchinasllatajchus Sodoma llajtapi ruwacunman carka chayka, cunan pꞌunchaycama cacushanman carka. 24 Chaywanpis niyquichej: Dios cꞌajaj phiñacuy pꞌunchaypi kancunata astawan ñacꞌarichisonkachej Sodoma llajtamanta niskaka, —nerka Jesús.
“Nokaman jamuychej samachiskayquichejtaj”
25 Chaypacha Jesuska Diosman nerka:
—Yupaychayqui Tatáy, kanka janaj pachata cay pachata camachej canqui. Imaraycuchus cay imasta yachaysapasmanta yuyaysapasmanta pacaycorkanqui. Wawajina llampꞌu sonkoyojcunamantaj cay imasta sutꞌincharkanqui. 26 Arí, Tatáy, ajina ruwaskayquimanta cusicunqui, —nispa.
27 Runasman nillarkataj:
—Dios Tatay tucuy yachayta kowarka. Payllamin noka Wawataka rejsiwan. Noka Wawallanmin Dios Tataytaka rejsini. Pimanchus noka, Wawan, rejsichiyta munani chay runallataj Dios Tataytaka rejsin. 28 Juchawan tucuy saycꞌuchiska cajcuna tucuy llaquiska cajcunapis nokaman jampuwaychej. Nokataj samarichiskayquichej. 29 Wacas yugota apancu ajinata yachachinasniyta casuychej. Nokamantataj yachacuychej. Llampꞌu sonkoyojmin caspa mana jatunchacunichu. Kancunataj nokaman jamuspa sonkoyquichejpi cheka samacuyta tarinquichej. 30 Imaraycuchus nokata casuyka cusicuymin. Nokapaj llancꞌaytaj mana llasachu, —nispa.