2 Jesuspa chunca iscayniyoj cachasnincoj sutisnincoka caycuna cancu: Ñaupaj cajka Simonmin, paytari Pedrota Jesús suticharka, wauken Andreswan, Jacobowan wauken Juanwan. Paycuna iscaynin Zebedeoj wawasnin cancu. 3 Felipe, Bartolomewan; Tomás, impuesto japꞌej Mateowan; Jacobo, Alfeoj wawan Tadeowan. Payka Lebeo niskapis. 4 Simón cananista partemanta, Judás Iscariotewan. Payka khepata Jesusta churanacojcunanman jaywaycorka.

5 Chay chunca iscayniyoj ajllaskasninta Jesús cacharka, cayjinata camachispa:

—Ama Samaria llajtasman yaycuychejchu nitaj waj runasmanpis riychejchu. 6 Manachayrí llajta-masisninchejllaman riychej. Paycunaka Diospa ajllaskan israelcuna ayllumanta chincaska ovejasjina cancu. 7 Rispataj willaraychej: Cunanka Dios caypiña cashan camachinanpaj. 8 Onkoskasta thañichiychej. Manchay lepra onkoyniyojcunata llimphuchaspa thañichimuychej. Wañuskacunata causarichimuychej. Runasmanta supaycunata kharkoychej. Tucuy chayta ruwanayquichejpaj atiyta khasillamanta korkayquichej. Chayraycu kancunapis runaspaj chay atiywan khasillamanta ruwamuychej.

9 ‘Ñanniyquichejpaj kolketa ama waquichicuychejchu. 10 Puriyniyquichejpaj ama kꞌepichacuychejchu imatapis. Nitaj iscay camisasta nitaj ojotꞌasta nillataj cꞌaspita purinayquichejpaj apaychejchu. Imaraycuchus llancꞌajcunaman causanancupajka konancupuni tiyan.

11 ‘Mayken llajtaman ranchomanpis yaycuspaka tapucuychej maykenchus chaypi cꞌacha runa caskanta. Ajinapi yachanquichej piwanchus samarinayquichejta. Paypa wasinpitaj caricuychej waj llajtaman rinayquichejcama. 12 Wasinman yaycuspataj chaypi tiyacojcunata napaycuychej: “Dioswan allinyaska cacuychej”, nispa. 13 Chaypi tiyacojcuna napaycuskayquichejta japꞌicuncuman chayka, Dioswan allinyaskas cankancu. Mana japꞌicuncumanchu chayrí, kancunaman cutimpusonkachej.

14 ‘Pillapis mana wajyarisunquichejmanchu nitaj niskasniyquichejta uyarinmanchu chayka, paycunata sakerparipuychej. Chaymanta llojsipuspa chaquisniyquichejmanta jallpꞌancutapis thalarpariychej. Chaywan runas yachankancu Diosmanta willanasta khesachaskancuta. 15 Chekata niyquichej: Chay llajtapi tiyacojcunata Dioska astawan ñacꞌarichenka cꞌajaj phiñacuyninwan. Sodoma llajtayojcuna Gomorra llajtayojcunatawanka pisitaraj ñacꞌarichenka paycunamanta niskaka.

16 ‘Reparaychej noka cachashayquichej mana michejniyoj ovejastajina sajra atojcunaj chaupincuman. Chayraycu kancunaka sumaj yuyayniyoj llampꞌu sonkoyojtaj canayquichej tiyan. 17 Khawacuychejpuni sajra runasmanta. Imaraycuchus curajcunaman jaywaycusonkachej. Tantacuna-wasisnincupitaj cꞌaspiswan wajtasonkachej. 18 Yachacojcunay caskayquichejraycu curajcunaman jatun camachejcunamanpis pusasonkachej. Ajinapi israelcunaman Diosta mana rejsejcunamanpis nokamanta willaranquichej. 19 Curajcunaman jaywasojtiyquichejka imatachus chayrí imaynatachus ninayquichejmanta yuyaspa ama manchachicuychejchu. Dios chay quiquinpacha sonkoyquichejman churanka imatachus ninayquichejta. 20 Imaraycuchus mana sapallayquichejchu parlanquichej. Manachayrí Santo Espíritu Tatayquichejmanta kancunanejta parlanka.

21 ‘Uj waukeka waukenta jaywayconka wañuchiska cananpaj. Uj tatapis wawanta wañuchiska cananpaj jaywayconka. Wawaspis tatasnincoj contrancupi jataricullankancutaj wañuchichinancupaj. 22 Nokamanta willaraskayquichejraycu tucuy runas kancunata chejnicusonkachejpuni. Tucucunancama nokapi confiaspallapuni muchojrí wiñay causayniyoj canka. 23 Uj llajtapi nacꞌarichisojtiyquichejka waj llajtaman aykecuychej. Noka, Diospa cachaska Runan, niyquichej chekatapuni manaraj tucuy Israel llajtasta rishajtiyquichej cutimunayta.

24 ‘Yachacojka mana curajchu yachachejninmantaka. Camachipis mana curajchu camachejmantaka. 25 Yachacojka yachachejninjinallataj caytawan cusicunanka allinmin. Camachipis camachejninjinallataj cananka allinmin. Noka wasiyojta sutichawarkancu “curaj supay”,^a nispa chayka, kancuna wasiypi tiyacojcunallataka aswan sinchꞌitaraj ñacꞌarichisonkachej.

26 ‘Runataka ama manchachicuychejchu. Arí, tucuy sumaj khataska cajpis kꞌala khataraska canka. Tucuy pacaska cajpis sutꞌinchaska callankataj. 27 Lakhapi parlasuskayquichejtaka sutꞌita tucuypa ñaupakenpi willaychej. Ningrillayquichejpi willasuskayquichejtapis ashqha runasman khaparispa^b willaraychej. 28 Cuerpollata wañuchejcunataka ama manchachicuychejchu. Paycunaka wiñay causayta khechusuyta mana atincuchu. Astawanrí Diosta manchachicuychej. Paylla causayta khechuspa uqhu pacha ninaman wijchꞌuycuchiyta atin.

29 ‘¿Manachu runas iscay phichitanca pꞌisketosta miqhunancupaj vendencu uj phatallapi? Chaywanpis ni ujllapis wañunchu Dios Tatayquichej mana munajtenka. 30 Umayquichejpi chujchaspis ujmanta uj yupaskas cancu. 31 Dios Tatayquichej khawashasuskayquichejraycu ama manchachicuychejchu. Kancuna ashqha phichitancasmanta niskapis astawan yuyanarajmin canquichej Diospajka.

32 ‘Pichari runaspa ñaupakencupi sutꞌita willan noka paypa camachejnin caskayta chayka, nokapis janaj pacha Dios Tatayman willallasajtaj payka nokaj camachiymin caskanta. 33 Pichari runasman nokamanta willanman mana camachejninchu caskayta chayka, paymanta nokapis janaj pacha Dios Tatayman willallasajtaj mana camachiychu caskanta.

34 ‘Ama yuyaychejchu runas juchallapipuni^c allillanta causacunancupaj jamuskaytaka. Manachayrí juchaj contranpi jamuskayraycu runaska paycunapura sinchꞌita tꞌakanaconkancu. 35 Nokata casuwaskancuraycu khari wawaka tatanwan tꞌakanacun. Warmi wawa mamanpa contranpi, khachunapis suegranwan tꞌakanacun. 36 Wasinpi tiyacojcunallataj paytaka nokaraycu sinchꞌita chejniconkancu.

37 ‘Pillapis tatanta chayrí mamanta nokamanta astawan munacojka mana yachacojniy cananpajjinachu cashan. Runa nokata astawan munacunawan tiyan warmi wawanmanta chayrí khari wawanmanta niskaka. Manachayka mana yachacojniy cananpajjinachu cashan. 38 Runaka munayninta sakespa nokata casunawanpuni tiyan nokaraycu wañunancamapis. Mana casuwanpuni chayrí mana yachacojniy cananpajjinachu cashan. 39 Causayninta payllapaj wakaychacuyta munajka mana wiñay causayniyojchu canka. Nokata casuwaskanraycu causayninta chincananta sakejka wiñay causayniyoj canka.

40 ‘Pillapis kancunata wajyacun yachacojcunay caskayquichejraycu, nokatapis wajyacuwan. Pillapis nokata wajyacuwan, camachiwajniy Dios Tataytapis wajyacullantaj. 41 Diospa willajninta cꞌachata wajyarejka willaj caskanraycu, willajpa japꞌinantajinallataj Diosmanta japꞌenka. Chekan ruwaj runata wajyarejka, chekan ruwaj caskanraycu chay ruwajpa japꞌinantajinallataj Diosmanta japꞌenka. 42 Yachacojcunay pisipaj khawaskaspuni cashancu. Pichari paycunamanta ujninman uj chhica yacullatapis jaywarinman yachacojniy caskanraycu, chekatapuni payka uj sumaj konata japꞌenka Diosmanta, —nispa yachacherka Jesús.