—Wawáy, ama manchachicuychu. Juchasniyqui khechuskasña cancu, —nispa.

3 Waquin yachaysapacuna sonkoncupi nisharkancu: “Cay runaka Dios caskanmanjina parlaspa payta phiñachishan”, nispa. 4 Jesustaj yuyaskancuta yachaspa nerka:

—¿Imaraycutaj chayjina sajrata sonkoyquichejpi yuyashanquichejrí? 5 Cay runaman nejtiy “juchasniyqui khechuskaña” nispaka, mana ricunquichejchu chekachus manachus caskantaka. Astawanrí cay mana cuyurej runata jatarichiyman chayka, ricuwajchej. 6 Noka, Diospa cachaska Runan caspa, cay pachapi atiyniyoj cani juchasta khechunaypaj. Chayta yachanayquichejpaj cay mana cuyurej runata nini: Jataricuy. Callapuyquita okharicapuspa ripuy wasiyquiman.

7 Runataj jataricuspa wasinman riporka. 8 Ashqha runasri chayta ricuspa manchachicorkancu. Diosta yupaycharkancutaj chayjina atiyta runasman koskanmanta.

9 Jesuska chaymanta ripuspa Mateo sutiyoj runata ricorka. Mateori vendejcunamanta cobrana wasipi tiyacusharka. Jesustaj payta nerka:

—Yachacojníy cay, —nispa.

Jatarispataj Jesusta khaticorka.

10 Ajinaka Jesús yachacojcunanwan Mateoj wasinpi miqhusharka. Chay wasimantaj ashqha impuesto japꞌejcuna, juchasapaspaj khawaska runaswan jamorkancu paycunawan miqhoj. 11 Chayta ricuspataj fariseo partemanta runas Jesuspa yachacojcunanta taporkancu:

—¿Imaraycutaj yachachisojniyquichejka impuesto japꞌejcunawan juchasapaswan cusca miqhunrí?

12 Jesusrí chayta uyarispa nerka:

—Onkoska runaslla medicotaka munancu manataj sano runaska. 13 Kancunari sumajta yachamuychej Dios cayta niskanta: “Runas qhuyanacunancoka astawan cusichiwan uywa wañuska jaywanasmanta niskaka”. Juchasapasta wajyaj jamorkani paycuna sajra ruwaskasnincuta sakespa Diosman cutirinancupaj. Manataj jamorkanichu chekan cajcunata wajyaj, —nispa.

14 Chanta Juanpa yachacojcunan Jesusman chimpaycorkancu. Taporkancutaj:

—Nokaycu, fariseocunawan ayunaycu ajllaska pꞌunchaycunapi yachacuskaycumanjina. Kanpa yachacojcunayquirí ¿imaraycutaj mana ayunancuchu paycunajinata?

15 Jesusrí paycunaman cuticherka:

—¿Casamientoman wajyaskacunaka phutiska uyasllachu cancuman casaracoj runa paycunawan cashajtin? Waj pꞌunchaycuna jamojtincurí paycunamanta casaracoj runa khechuska canka. Chaypacha yachacojcunay phutiywan mana miqhonkancuchu, —nispa.

16 Cay quiquinchanawan mosoj yachachiyninmanta parlarka:

—Ni pipis uj mosoj remiendota uj maucꞌa pꞌachaman siraycunmanchu. Chayta ruwanman chayka, mosoj pꞌachamanta remiendoka kꞌentispa aswan jatunta lliqꞌirparinman maucꞌa pꞌachataka. 17 Manallataj pipis mosoj pokoshaj vinota maucꞌa karasman churanchu. Chayta ruwanman chayka, pokoshaj vinoka phatarparichinman maucꞌa karastaka. Ajinapitaj karas lliqꞌiycucunman vinotaj jichꞌacuspa chincapunman. Chayraycu mosoj vinotaka mosoj karasman churana tiyan. Ajinamanta iscaynincu allin wakaychaskas cancu, —nispa yachacherka Jesús.

18 Jesús cay imasmanta parlashajtillanraj uj curaj runa payman kayllaycorka. Jesusta yupaychaspataj nerka:

—Tatáy, warmi waway cunallan wañupun. Astawanpis payman maquiyquita churanayquipaj jamuy. Wawayka chaywan causarenka, —nispa.

19 Ajinataj Jesuska rerka curaj runawan cusca. Yachacojcunanpis Jesuswan rerkancu.

20 Rishajtincutaj uj warmi Jesusman kayllaycorka. Payka chunca iscayniyoj watastaña yawar apay onkoywan carka. Khepanmanta jamuspataj Jesuspa ponchonpa tꞌicasninta japꞌirerka. 21 Ajinata ruwarka sonkonpi niskanraycu: “Pꞌachallantapis llanqharisaj chayka, thañicapusaj”. 22 Jesusrí cutiricuspa warmita khawarerka. Nerkataj:

—Cusicuy, mamáy. Diospi japꞌicuskayquiraycu thañiska canqui.

Warmeka chaypachita sumajta thañicaporka.

23 Jesustaj curaj runaj wasinman chayamuspa pꞌampanapaj tocajcunata ricorka. Ashqha chꞌajwashaj runastapis ricuspataj 24 nerka:

—Ithiricuychej. Imillitaka mana wañuporkachu. Manachayrí puñushallan, —nispa.

Runastaj Jesusta asipayarkancu. 25 Jesuska paycunata jawaman llojsichispa wasiman yaycorka. Imillitatataj maquinmanta japꞌispa causaricherka. 26 Chay ruwaskanmantari tucuynejpi runas yacharkancu.

27 Jesús chaymanta ripushajtintaj iscay ciego runas paypa khepanta khaterkancu. Khaparispa nerkancu:

—Diospa ajllaskan Cristo,^a qhuyacuwaycu.

28 Jesuska wasiman yaycorka. Chaymantataj ciego runaska payman kayllaycorkancu. Jesusri paycunata tapurerka:

—¿Tucuy sonkowanchu creenquichej kancunata thañichiyta atinayta?

Paycunataj cuticherkancu:

—Arí, tucuy atiyniyoj Señor, —nispa.

29 Chanta Jesuska ñawisnincuta llanqhaycuspa nerka:

—Diospi japꞌicuskayquichejmanjina ricuychej.

30 Ciegostaj ricorkancu. Chaymanta Jesús sinchꞌita paycunata nerka:

—Ama ni pimanpis willaychejchu, —nispa.

31 Paycunarí Jesuspa niskanta mana casorkancuchu. Astawanpis tucuy chay jallpꞌanejpi Jesusmanta willarkancu.

32 Paycuna llojsishajtincutaj runas Jesusman supayniyoj uj upa runata pusamorkancu. 33 Jesusri supayta kharkorka. Chay quiquinpachataj upaka parlarerka. Chaypi caj ashqha runastaj tꞌucusharkancu:

—¡Ni jaycꞌajpis cayjina imaska Israel jallpꞌapi ricucorkachu! —nispa.

34 Tꞌakacoj fariseocunarí nerkancu:

—Chay runaka supaycunaj curajnincoj atiyninwan supaycunata kharkon, —nispa.

35 Jesuska tucuy llajtasta ranchostawan purerka. Tantacuna-wasisnincupitaj yachachisharka. Willarasharka sumaj willanastapis Diospa ajllaskan cay pachapi caskanta camachinanpaj. Tucuy laya onkoyniyojcunatapis nanayniyojcunatapis thañicherka. 36 Chanta ashqha runasta ricuspa paycunata may munacuywan qhuyacorka. Jesuspa sonkon nanarka paycunata llaquiywan saycꞌuskasta llauchhuyaskastataj ricuspa. Imaraycuchus paycunaka mana michejniyoj ovejasjina carkancu. 37 Chantataj yachacojcunanman nerka:

—Cheka Diosmanta chincapushaj runaska uj jatun trigo chajrajina cancu. Ashqha trigo cashan ruthunapajjina pokoskaña. Ruthojcunarí pisislla cancu. 38 Chayraycu tucuy atiyniyoj Diosmanta mañacuychej llancꞌajcunata uskhayta chajranman cachamunanta. Caytaka paymin camachin.