—Diospa ajllaskan camachinanpaj chayamunña. Chayraycu juchasniyquichejta sakespa payman cutiriychej, —nispa.

4 Willaraj Juanka llamajina camello millmamanta pꞌachawan pꞌachallicorka. Kara chumpiwantaj chumpiska carka. Langostastataj miqhoj lachiwana misqꞌitawan. 5 Ashqha runas payta uyarej llojsimoj cancu. Jerusalén llajtamantapis tucuy Judea jallpꞌamantawan Jordán mayu tucuy chaynejmantawan jamoj cancu. 6 Paycuna juchasnincuta willashajtincu Juan Jordán mayupi paycunata bautizasharka. [Ajinapi runas ricucherkancu Diosman cutiriskancuta.]^a

7 Juanka ashqha fariseo partecunata saduceo partecunatawan bautizacoj jamushaskancuta ricorka. Paycunatataj nerka:

—Kancuna runa wañuchi catarisjina canquichej. Diospa cꞌajaj phiñacuyninmanta aykecunayquichejpaj ¿pitaj willasorkachejrí? —nispa. 8 Diospa phiñacuyninmanta aykecuyta munanquichej chayka, juchasniyquichejta sakeychej. Chaywanpis cꞌacha ruwaskasniyquichejwan Diosman cutiriskayquichejta ricuchiychej. 9 Kancunaka Abraham unay tatanchej caskanta nishanquichej. Diospa cheka wawasnin caskayquichejta yuyaspa pantanquichej. Amaña sonkoyquichejpi ajinata jatunchacuychejchu. Imaraycuchus niyquichej Dioska atiyniyojmin cay rumismantapis Abrahampaj cheka wawasninta ruwananpaj. 10 Hachaka waquichiskaña cashan sachꞌa saphinmanta cꞌutunanpaj. Sapa sachꞌa mana allin pokojtaka runas cꞌutuspa ninaman wijchꞌuncu. 11 Chekatapuni noka yacupi bautizayquichej Diosman cutiriskayquichejta ricuchinapaj. Khepaytarí Diospa ajllaskan Cristo jamonka. Payka aswan curaj atiyniyoj nokamanta niskaka. Mana paypajka [camachinpajjinallapischu cani runalla caskayraycu.]^b Paymin kancunata bautizaspa Santo Espirituta sonkoyquichejman cachamusonkachej Diosllapaj causanayquichejpaj. Ninawantaj bautizasonkachej. 12 Trigo erata wayrachejka jorcꞌata maquinpiña japꞌishan. Erata sumajta pichanka trigota chꞌuyachananpaj. Trigota pirwanman jallchꞌanka. Pajatarí ni jaycꞌaj wañoj ninaman ruphachenka, —nispa willararka Juan.

13 Chanta Jesuska Galilea jallpꞌamanta Jordán mayuman jamorka. Chaypitaj Juanwan bautizachicuyta munarka. 14 Juanrí mana munarkachu bautizayta. Jesusmantaj nerka:

—Nokata astawanpis kanka bautizanawayqui tiyan. Chanta ¿imaraycutaj nokaman jamuwanqui? —nispa.

15 Jesusrí payman cuticherka:

—Cunan bautizanawayqueka allillan. Yachanchej Diospa tucuy munayninta ruwananchejpuni caskanta, —nispa.

Chanta Juanka Jesuspa mañaskanta ruwarka. 16 Jesuska bautizachicuytawan yacumanta llojsiporka. Janaj pachari paypaj quichariska carka. Ricorkataj Diosmanta cachamuska Santo Espirituta palomatajina uraycamojta payman tiyaycucojtapis. 17 Ajinapitaj Dios janaj pachamanta nimorka:

—Paymin cꞌata munaska Wawayka. Paypi mayta cusicuni, —nispa.