Supay munarka Jesusta juchallichiyta
4
Chanta Santo Espiritoka chꞌin lomaman Jesusta pusarka. Chaypitaj supay Satanás imaymanamanta juchallichiyta munarka.2 Jesuska tawa chunca pꞌunchayta tawa chunca tutatawan mana miqhorkachu Diosta yupaychananpaj. Chaymantataj payka yarkhachicorka. 3 Chay pantachej supayri Jesusman kayllaycuspa nerka:
—Sichus Diospa cheka Wawan canqui chayka, niy cay rumista tꞌantaman cutinancuta.
4 Jesusrí cutichispa nerka:
—Palabranpi Dios nin: “Mana miqhunallawanchu runaka causan. Manachayrí Diospa tucuy niskanta casuspa causan”, —nispa.
5 Chanta supayka Diospa ajllaska llajtan Jerusalenman Jesusta pusarka. Chaypitaj yupaychana-wasi patapi sayaricherka. 6 Jesusmantaj nerka:
—Diospa Wawan canqui chayka, cay patamanta pampaman phinquiycuy. Imaraycuchus Diospa palabranpi nin:
Angelesninta camachenka kanta wakaychasunancupaj.
Maquisnincuwantaj kanta japꞌisonkancu ama rumisman urmanayquipaj.
7 Jesusrí payta cꞌamerka:
—Dios palabranpi nillantaj: “Ama Señor Diosniyquej atiyninta mana cajpaj mañacuychu”.
8 Uj cutitawan supayka Jesusta pusallarkataj. Cunanpeka may jatun orko patamanña chayacherka. Jesusmantaj tucuy cay pachapi caj camachiska jallpꞌasta, khapaj capuynincutawan ricucherka. 9 Chaymantataj supayka nerka:
—Tucuy cayta kopuskayqui sichus kan konkoricuspa yupaychawanquiman chayka.
10 Chanta Jesuska payman cuticherka.
—Ripuy nokamanta, supay Satanás. Imaraycuchus Dios palabranpi nin: “Señor Diosnillayquita yupaychay. Pay sapallamantaj konkoricuspa casuy”, —nispa.
11 Chaymanta supayka Jesusta sakeporka. Yanapaj angelestaj jamuspa Jesusman pisichicuskanta jaywarkancu.
Jesús Galileapi ruwanasninta kallarin
12 Jesustaj Juan wiskꞌaska caskanta uyarispa Galilea jallpꞌaman rerka. 13 Nazaret llajtamanta llojsispa payka Capernaum llajtaman tiyacoj rerka. Chay llajtaka Galilea kocha cantopi carka. Zabulonwan Neftaliwan jallpꞌas chaynejpi carkancu. 14 Chaypi Jesús tiyacorka Diospa unay willajnin Isaías niskanmanjina:
15 Zabulón jallpꞌapi Neftalí jallpꞌapiwan tiyacojcuna, kancuna tiyacunquichej kochaman rina ñan Jordán mayu chimpapi.
Galilea jallpꞌapi tiyacuncu Diosmanta mana yachajcuna.
16 Dioska willarajninta cachamorka wiñay causaymanta mana yachajcunapaj.
Chay runaska wiñay wañuyman risharkancu.
Paycunataj juchancumanta cachariskas canancupaj sumaj willanasta uyarerkancu.
Chaytaj uj cꞌanchayjina carka tucuypaj.
17 Chaymantapachataj Jesús kallarerka willarayta:
—Diospa ajllaskan pꞌunchayka cunan chayamushanña. Cunan payka munacoj Camachejniyquichej canka. Chayraycu juchasniyquichejta sakespa payman cutiricuychej sumaj willanasnintataj japꞌicuychej.
Jesús tawa challwirista wajyan
18 Jesuska Galilea kocha cantonejta purishaspa ricorka iscay waukesta. Ujnin Simón, Pedro sutiyoj carka, ujnintaj Andrés. Paycuna challwiris caspa jatun chꞌipata kochaman chokaycusharkancu. 19 Paycunaman Jesús nerkataj:
—Jamuychej nokawan yachacojcunay canayquichejpaj. Kancuna challwiris canquichej. Cunanmantapachataj Diospi japꞌicunancupaj runasta nokaman pusamuwanquichej.
20 Chay quiquinpacha chꞌipasnincuta sakerpayarkancu. Jesuswan rerkancutaj yachacojcunan canancupaj.
21 Uj chhicatawan rispataj Jesuska waj iscay waukestawan ricullarkataj. Paycuna Jacobo Juanwan carkancu. Cusca tatancu Zebedeowan barcopi chꞌipasnincuta tꞌirisharkancu. Jesús chay waukesta wajyarka yachacojcunan canancupaj. 22 Chay quiquinpachataj barcota tatancutawan sakerpayaspa kallarerkancu Jesuswan puriyta yachacojcunan canancupaj.
Jesús ashqhasta yachachin
23 Jesús tucuy Galilea jallpꞌata purispa tantacuna-wasisnincupi yachachisharka. Sumaj willanastataj willarasharka Diospa ajllaskan chaypiña caskanta camachinanpaj. Astawanpis runas uqhupi tucuy laya onkoycunata thañichisharka. 24 Tucuy caru Siria jallpꞌapipis Jesús atiyniyoj caskanta uyarerkancu. Jesusman apamorkancutaj tucuy laya onkoyniyojcunata: nanayniyojcunata, ñacꞌarejcunata, supayniyojcunata, tꞌucu onkoyniyojcunata, suchustawan. Jesusri tucuynincuta thañicherka. 25 May ashqha runastaj Jesusta khaticorkancu. Galilea jallpꞌamanta, Decápolis jallpꞌamanta, Jerusalén llajtamanta, Judea jallpꞌamanta, Jordán mayu chimpamantawan paycuna jamorkancu.