Yachaysapacuna Jesusta taripaspa yupaychancu
2
Jesuska Judea jallpꞌa Belén llajtapi nacecorka, Herodes camachishajtin, chay pꞌunchaycunapi. Chaypacha yachaysapacuna inti llojsimuy caru llajtamanta jamuspa Jerusalén llajtaman chayamorkancu. 2 Tapucorkancutaj:—¿Maypitaj cashan israel runasta camachinanpaj nacecoj Wawarí? Chꞌascanta inti llojsimuy ladopi ricuycu. Chayta khatispataj payta yupaychanaycupaj jamuycu, —nispa.
3 Chayta uyariytawantaj camachej Herodeska mancharicorka. Jerusalén llajtapi caj tucuy runaspis paywan mancharicullarkancutaj. 4 Chaymantataj Herodes tantachimorka yupaychana-wasimanta curajcunata, israel yachachejcunatawan. Paycunata taporka:
—¿Maypitaj Diospa ajllaskan Cristo nacecunan tiyan?
5 Paycunataj cuticherkancu:
—Judea jallpꞌa Belén llajtapi naceconka. Ajinata Dios unay willajninta kelkacherka:
6 Kancuna, Judá jallpꞌa Belén llajtapi tiyacojcunata niyquichej:
Judá jallpꞌapi caj curajcunamanta aswan jatunpaj khawaskas canquichej.
Kancunamanta uj curaj camachej naceconka.
Paytaj, ajllaska israelcunayta michenka.
7 Chanta Herodes pacayllamanta yachaysapacunata wajyacherka. Ajinallatataj taporka yachananpaj maycꞌajchus chay chꞌasca riqhurimuskanta. 8 Paycunatataj Belén llajtaman cacharka nispa:
—Riychej. Allintataj yachamuychej chay wawitamanta. Payta tarispataj willawaj cutimuychej. Nokapis rispa payta yupaychamusaj, —nispa. [Chaytari mana cheka sonkowanchu nisharka.]a
9 Yachaysapacunaka camachejpa niskanmanjina riporkancu. Inti llojsimuy, chay ladopi ricuskancu chꞌascaka ñaupakencuta risharka. Jesús casharka, chaycama pusamuspa patannejpi sayacorka. 10 Yachaysapacunataj chay chꞌascata ricuspa maytapuni cusicorkancu. 11 Paycuna wasiman yaycuspataj Wawitata ricorkancu maman Mariatawan. Konkoricuspataj Jesusta yupaycharkancu. Apaskancuta quicharispa khapaj capuynincuta payman korkancu. Korita, inciensota, kꞌapayniyoj mirra jampitawan payta yupaychaspa jaywarkancu. 12 Chaymantataj moskoynincupi Dios paycunata willarka Herodespaman ama cutinancuta. Chayraycu paycunaka jallpꞌancuman waj ñanta cutiporkancu.
Egiptoman aykecuncu
13 Yachaysapa runas ripuskancuwantaj Dios uj willaj angelta cachamorka. Joseman moskoyninpi riqhurimuspataj nerka:
—Jataricuy. Wawitata, Wawaj mamantawan pusaricuspa Egipto jallpꞌaman aykecuy. Jakaypi tiyacamuy noka willasunaycama. Herodeska mascꞌaj rishan Wawitata wañuchinanpaj, —nispa.
14 Chay quiquinpachataj José tutapi rijchꞌarispa jatarerka. Wawitata mamantawan pusariycucuspa Egipto jallpꞌaman riporka. 15 Jakaypitaj Herodes wañunancama tiyacamorkancu. Tucuy cayka ruwacorka Diospa niskan juntꞌacunanpaj. Chaytaka unay willajninnejta nerka: “Egiptomanta llojsimpunanta Wawayta wajyarkani”.
Herodes wawasta wañuchin
16 Herodeska chay yachaysapacuna anchata asipayaycuskancuta reparaspa mayta phiñacorka. Runasnintataj camacherka tucuy khari wawasta iscay watayojcama wañuchimunancuta. Paycunataj wawacunata wañucherkancu Belén llajtapi tucuy chaynejpipis. Jesuspa chꞌascan riqhurimuskan pꞌunchaycunata yachaysapacunamanta yachaspa chayta ruwarka. 17 Ajinapi Diospa niskan juntꞌaska carka. Pay unay willajnin Jeremiasnejta nerka:
18 Phutiy wakay uyaricun Ramá llajtapi.
Raquel wawasninmanta khaparispa wakashan jatun llaquiywan “ay, ay” nispa.
Manaña sonkochacunmanñachu wawasnin wañuskas caskancuraycu.
19 Herodes wañupojtinrí Dios uj willaj angelta cachamorka. Joseman moskoyninpi riqhurispa Egipto jallpꞌapi 20 nerkataj:
—Jataricuy. Wawitata mamantawan pusaricuspa ripuy Israel jallpꞌaman. Wawitata wañuchiyta munajcunaka ñapis wañupuncuña, —nispa.
21 Chay quiquinpacha José jataricuspa Wawitata mamantawan pusaricorka Israel jallpꞌaman. 22 Arquelao tatan Herodespa cuentanpi Judea jallpꞌata camachisharka. Chayta uyarispa Joseka manchachicorka chayman tiyacoj riyta. Moskoyninpi Dios payman willaskanraycutaj Galilea jallpꞌaman riporka. 23 Nazaret llajtaman chayaspa chaypi tiyacorka. Ajina ruwacorka Diospa niskan juntꞌacunanpaj. Unay willajcunanejta nerka Jesús Nazaret llajtayoj sutichaska cananta.